Kyi Myin Daing Zaburaz Sui Chawdawr Ngeitu Pa A Thattu Le Sui Firtu Ah Ruah Zumh Mi 4 An Tlaih Hna
=========
October 8, zaan suimilam 7:30 tluk khan Yangon ramṭhen Kyi Myin Daing pengah Sui chawdawr ngeitu pa cu aho theihlo misual phu nih an hrem hnu ah an tlaihkhih i motor in an kalpi tiah theih arak si. October 9, khan motor lampi cungah a ruak in an hmuh ṭhan hi kong he pehtlai in, thilsual tuahtu ah ruah/zumh mi minung 4 hna cu Yangon ramṭhen palik hna nih October 16, khan an tlaihkhih hna tiah theih asi.
“Zaburaz Sui chawdawr ngeitu pa U, Min Zaw Oo that in a thilmansung firtu hna minung 4 hi Bago ramṭhen Paungde khuapi ah October 16, zing suimilam 9:00 tluk khan ralkap le palik phufonh nih an tlaih hna tiah palik he niahniam mi pakhat nih a chim.
Hi kong he pehtlai in, Yangon ramṭhen palik he niehniam ngai in a ṭhudir mi pakhat nih a chim ning cun, thilsual tuahtu 4 an tlaihkih mi hna he a pehlaihnak a ngeimi midang hna zong an tlaihkhih chih hna tiah a chim. Misualphu nih an firmi Sui thilmansung hna hi, Pago ramṭhen, Paungde, Nattalin, Khor Ping Khok le Zeegone khuapi hna ah anrak zuar micu Ynagon ramṭhen palik nih anlak ṭhna tiah theih asi.
SAC Ralkap Hmanh Mi Bomrap Ruang Ah Zawnglei Khuami Nu 1 A Nunnak A Liam. Falam peng, Zawnglei khuami Nu Biak Hnem (kum 45) cu October 18 zinglei sml 9:00am-10:00am kar ah, Htin-sho sakhaan ah hmunhma a khuar mi SAC ralkap pawl nih an hmanh mi bomrap aa lamh sual caah a nunnak a liam tiah thawng theih a si. “Nu Biak Hnem cu a hawile 4 he လိပ်ပြာဥ kawl ding in ramlak ah an kal. A hawile 4 chung ah amah hi a lai ah a kal mi a si nain bomrap aa lamh sual hi a si.
A ke khatlei a bul i a thi tamtuk a chuah caah a nunnak a liam beh. Zinglei sml 9:00am luan hrawng ah aa lamh sual hi a si i a hawile nih innlei phone an rak chawnh hnu sml 10:00am hrawng lawng ah a ruak kan lak khawh” tiah a unau pakhat nih The Rili Voice ah a chim. Htin-sho sakhaan ah hmunhma a khuar mi SAC ralkap nih an pawngkam ramlak ah siseh, an umnak sakhaan pawngkam ah bomrap an hmanh dih caah mipi hna nih umkal kan i ralrin ngai a herh tiah a chim chap.
Naypyidaw Thonginn In Thongtla Pa 7 An Zaam. Naypyidaw, Tatkone peng Kinthar khua ah a ummi Kinthar 2 sakhan in thongtla pa 7 cu October 17 zanlei ah an zaam, tiah Naypyidaw ummi nih BBC ah an chim. A zaammi thongtla 7 hna hi pa lawngte an si i mi thahnak case in kum saupi thong thlak mi an si pinah rithaisii case le nu tlaihhremnak case in thong a tlami an i tel, tiah Ministry of Interior he naihniam in a ummi hna nih an chim.
Thongtla a zaammi hna hi kum 2-6 tiang thong a tla rih ding an si. Kinthar 2 sakhan hi kum saupi thong thlak le rianhrang ṭuanter in thong a tlami a za leng an umnak a si, tiah theih a si.
SAC nih nawlngeihnak an laak hnu ah thonginn chung in thongtla pawl atu le atu an zaam i Yamithin thonginn le Taungngu thonginn in thongtla a zaammi an rak um cang.
SAC Ralkap Nih Yelaekyun Ah A Ummi Spring Kantkaw Charity Sakhan Chung Sii-ai An Khangh Dih. Magway ramṭhen, Yesagyo peng Yelaekyun ah rallam a sialmi SAC ralkap nih Spring Kantkaw Charity siikhan sii-ai cu an khangh dih hna, tiah tualchung media hna nih an thanh. October 15 ah Yesagyo peng, Yelaekyun hmunram ah rallam a sialmi SAC ralkap nih siikhan chung sii-ai an khangh dih, tiah siikhan ṭuanvo ngei pakhat nih a chim.
“An khanghmi sii-ai dihlak man hi fiang in hngalh a si lo, sii-ai duhning hmanh in kan i pek khawh lo lioah atu bantukin an khangh cu lung a fak ngai, sinain hi sii-ai khanghpiak kan ton ruang ah hin kan lung a dong hrimhrim lo, lungṭhul lo in mipi ca ah pehzulh in kan dir ko lai,” tiah Spring Kantkaw siikhan in ṭuanvo ngei pakhat nih cun a chim. SAC ralkap pawl cu October 12 thawk in Yesagyo hmunram ah rallam sial in tualchung mi nu pakhat an thah i khuate cheukhat inn zong an khanghpiak hna, tiah theih a si.