Ramdang Chuak In Sianginn Kai Mi le Rianṭuan Mi Pawl Zong Ralkap An Lut Lai: SAC. Ramdang chuak in sianginn a kai mi le rian a ṭuan mi vialte zong caan khatkhat ahcun Myanmar ram kir in ralkap an lut cio lai tiah SAC lei chimphuannak nawl a ngeitu Zaw Min Htun nih ramchung thawngzamh sin ah a chim.
Ramdang chuak in sianginn kai mi, rian a ṭuan mi vialte nih pohma 15 (A) ah aa tel ning tein ralkap ṭuan ding chikhat ṭhial piak nan si lai i an cacawn a dih tik le rian an dih tik ah pohma 15 (B) ning in rikhiah mi caan a dih tiang ralkap an lut lai tiah a chim.
A ra lai mi kawl titoih puai a dih in thawk ding mi ralkap khawmh ding kong cu Batch 1 ah pa 5,000 auh a si lai i nu pawl tu cu Batch 5 in auh an si te lai tiah a chim.
Training Batch 1 thawk in ralkap lut ding mipi 5,000 tiah thla fatin auh a si lai caah SAC ralkap nih kum 1 ah mipi 60,000 hrawng ralkap khawmh ding in an timhtuah hi a si. The Chinland Post
Thawngpang dang: SAC Nih Ralkap Tlakternak Upadi An Ser Hnu Ah Mino Tampi Hriamtlai Phu Sin Ah An Lut. SAC nih ram mi ralkap tlakternak upadi an ser hnu ah mino tampi cu dohthlennak hriamtlai phu PDF sin ah a lut mi an tam, tiah PDF nih an chim.
SAC nih upadi an ser hnu in NUG Kuttang PDF, Black panther Column, MDY-PDF, BLDF, Hinthata PDF, Ayeyarwaddy Revolution Front, ATC, BNRA le KNLA nih dohthlennak ralkap thar ca ah auhnak an tuah ve i a sok mi an tam, tiah theih a si.
Dohthlennak hriamtlai phu a si mi BLDF sin ah mino 200 hrawng min an i pe i, a dang PDF sin ah zong ah mino tampi min an i pe, tiah theih a si.
BLDF page in dohthlennak hriamtlai phu sin ah luh a duh mi sok khawh a si tiin thawng kan thanh sin tein ni khat chung ah mino 200 hrawng min an i pe colh. Dohthlennak kum thum chung ah mizapi dohthlennak ah an i tel ko ti a langhnak a si, tiah BLDF ṭuanvo ngeitu nih Ayeyarwaddy Times ah a chim.
Ramkulh le ramṭhen ah a um mi PDF Battalion sakhan ah mino tampi an lut cang i humhimnak ruangah an luhnak sakhan le hmunhma cu kan thanh rih lo, tiah PDF nih cun an chim.Crd:The Chin Post