CDF-Senthang Le Senthang Council/ Battalion 2 Cu Phu Khat Ah An I Fonh Cang. Chin ramkulh, Senthang peng ah dothlengtu phu hnih in a rak dirmi CDF-Senthang le Senthang Council/Battalion 2 cu phu khat ah an i fonh cang, tiah Chinland Defense Force-Senthang sin in kan theih.
“2024, February 17 ah CDF – Senthang le Senthang Council/ Battalion 2 hna cu kaphnih hnatlaknak in Conference kan tuah i Senthang Council/ Senthang Revolution Force min in bukhat ah kan dir cang” tiah CDF-Senthang rianṭuantu pakhat nih nihin February 18 ah Lungmili Post ah a chim.
Thawngpang dang: SAC ralhrang nih an chuahmi ” People’s Military Service Law of 2010 ” phung thar he pehtlai in Chinram hriamtlaiphu CNA, CDF-Mara le CDF -Kanpalet hna nih Chin mino hna mipi ralkap lut ding in sawmnak cathanh an chuah.
Khuapau dothlennak kum 3 chung ah SAC ralhrang nih a ralkap thazaang ningcang loin a hman i ralkap thar a khawmhsuat khawh tilo caah kumtling mizapi cu ralkap luh ter in ralphaw ah hman a duh hna caah a tubantuk in phung thar a chuah hi a si, tiah CNF nih a chim.
SAC ralhrang nih hramhram in ralkap luhternak in nan luat khawhnak ding caah le limhang a ngeimi mipi ralkap nan si khawhnak ding caah nan mah he nan i neihniamnak sakhan le bu sin i fonh in mipi ralkap kan ṭhawn ter hna lai tiah CDF- Kanpalet Kkei Sing sakhan in rianṭuantu pakhat nih a chim.
SAC ralhrang hna cu sungh lei an panh cang caah a tubantuk in ralkap thar an khawmh hi a si, cucaah Mara ram kilven ding in le federal democracy ramthar kan ser khawhnak ding caah Mara mino hna mipi ralkap tintaan kai ding in kan in sawm hna, tiah CDF-Mara nih cathanh an chuah.
SAC ralhrang nih Kanpalet peng, Kyindway khua cozah zung hna ah umhmun khuar i mipi ralkap hna he kahdohnak a um lengmang caah khuami hna cu a himnak hmun ah thlakhat tluk ral an hrial cang, tiah theih a si.