Saw-PDF nihhin Kanpetlet mipi le CDF-Kanpetlet chungtel an velhmi hna hi,a tlawm bik voi 10 renglo a ti cang!
==========
Nizan ah Saw-PDF nih kan unau a simi hna CDF-Kanpetlet ralkap pa 2 cu ceilak in an velh hna le siizung ah lungfim lo in an um chuahmah lio ti a si. A tanglei ah anmah CDF-Kanpetlet tuanvo ngeitu Lila hna nih an langhter ningah, Saw-PDF nihhin Kanpetlet mipi le CDF-Kanpetlet chungtel an velhmi hna hi,a tlawm bik voi 10 renglo a ti cang lai ti si.
Voi 10 leng taitai tuk le velh hi kan Unau Kanpetlet mipi le CDF-Kanpetlet ralkap an va sual tuk ruang theng ahcun a si lai ka zum lo, biatak tein hma lak a phu mi a si. Kanmah le kanmah chung lawngah ralthat tuk le I ngamh tuk riangmang I miphun dang sinah kan a ralchiat tuk ahcun a poi ngai lai.
CDF Kanpetlet Ralkap Pahnih Cu Saw PDF Nih An Velh Hna! CDF Kanpetlet ralkap pahnih cu September 23 zan suimilam 7:00 hrawng ah Saw peng in Kanpetlet khuapi lei an kir lio, lam tanṭim ah Saw PDF Battalion 3 nih an velh hna, tiah CDF Kanpetlet in chimphuannak nawlngeitu nih The 74 Media ah a chim.
“An velh hnanak a ruang hi keimah zong ṭha tein ka hngal lo. Saw peng ah an velh hna i an hliamhma a fah tuk ruangah sii-inn an phan,” tiah a chim chap. CDF Kanpetlet ralkap pahnih cu an lu a kuai i sii-inn tiang an phan. Saw PDF le CDF Kanpetlet cu ral a tuṭi mi le aa hawikom ngaingai mi kan si ko nain zeiruang ah dah Saw PDF nih an velh hna ti cu kan hngal lo, tiah CDF Kanpetlet in chimphuannak nawlngeitu nih a chim.
Yaw hmunram Saw peng cu Chin ramkulh thlanglei Kanpetlet ramri he aa pehmi a si i Saw khuapi le Kanpetlet hi meng 12 hrawng aa hlat. Saw-Kanpetlet lam ah hin Saw PDF nih Kanpetlet peng mi le CDF Kanpetlet ralkap an velh hna hi voi 10 nak tlawm lo a si cang, tiah Kanpetlet Voice nih a ṭial.
Mindat Ah SAC Ralkap Bomb Hmanh mi Lamsualnak In Tualchung Mi Pakhat Nunnak A Liam! Chin ramkulh, Mindat khua luhnak Vom Thu Maung pangpar dum pawng ah September 26 zing suimilam 10:00 tluk ah SAC ralkap nih an hmanh mi bomb cu tualchung mi nih an i lamhsual i pa pakhat nunnak a liam pinah midang pakhat zong hliam a tuar ve, tiah tualchung mi hna nih an chim.
Nunnak a liammi hi kum 60 leng pa a si i hliam a tuarmi hi kum 60 tluk nu a si. Lo an kal lio ah SAC ralkap nih an hmanhmi bomb cu an i lamsual, tiah tualchung mi hna nih cun an chim. September 26 zinglei ah SAC ralkap nih hriamngan 120mm zong voi 4 hrawng an kah. Hliamhma pumi nu hi Mindat sii-inn ah an thlopbul, tiah theih a si. September 21 ah Falam peng kum 52 tluk Pa Ngun Kip Khuai zong Manipur tiva ah nga tlai ding in a kal lio ah bomb a rak i lamsual i a nunnak a rak liam.
Mindat Ah SAC Ralhrang Nih An Tarh Mi Bomb Lamhsualnak In Khuami Pakhat Nunnak Liam; Pakhat Hliam Tuar. Chin ramkulh thlanglei Mindat khua luh lai ah SAC ralhrang nih Land Mine (Bomb) an tarh mi cu lolam kal mi pa pakhat nih aa lamh sual caah a nunnak a liam i pakhat hliam a tuar tiah khua mi hna nih an chim.
September 26 zing suimilam 10 renglo deuh ah Mindat khua luh lai Vuan Thu Maung pangpar dum kam ah hi thil a can hi a si. “Khua luh lai ah hin ralhrang gate a um, cuka cun nifa tin an um peng caah an kah lengmang hna i Bomb an tarh hi a si lai. Cu lam cu lo kal nak le khualtlawnnak lampi a si. A tubantuk in ralhrang tarh mi Bomb ruangah a thi mi le hliamtuar mi zong an tam ngai cang” tiah khua mi pakhat nih a chim.
“Tuni September 26 ni thiam ah Mindat khua chung khah-lah-yah (274) nih hriamngan in mipi umnak lei an kah len hna.”tiah a cunglei khuami pakhat nih a chim. SAC ralhrang nih an duhnak poah ah hriamngan an kah lengmang caah mipi nih umkal i ralring uh tiah CDF-Mindat nih September 25 ah ralrin peknak thawng an thanh.
Mah pin ah ralhrang hna cu mipi bantuk i um ter in a thli in thazaang an chap caah gate hngak tu mipi ralkap hna nih ralring tein checkhlatnak tuah ding kong zong CDF-Mindat nih an langh ter chih.
SAC Ralkap Nih Vanlawng In Kahdohnak An Tuah Ruangah Rammi 281 An Nunnak Liam Cang. SAC nih nawlngeihnak an laak hnu kum 2 leng chung ah vanlawng in kahdohnak voi 1,000 hrawng an tuah ruangah rammi 281 nunnak a liam, tiah UNOCHA nih an langhter.
2021 February 1 in 2022 March 31 tiang vanlawng in voi 301 kahdohnak an tuah i 2022 April in 2023 July tiang voi 687 kahdohnak an tuah, tiah an thanh. SAC ralkap nih nawlngeihnak an laak hnu kum khat chung ah vanlawng in kahdohnak an tuahmi le kum khat leng hnu in kahdohnak a tuahmi zohchun ah vanlawng kahdohnak a karh ngaingai. Vanlawng kahdohnak ruangah nunnak a liam hi Myanmar ram laifang ummi tam bik an si i minung 216 an si, tiah UNOCHA nih cun an langhter.
Vanlawng kahnak ruangah Myanmar ram nitlak chaklei ah minung 25, nichuah thlanglei ah 21 le nichuah chaklei ah 19 nunnak a liam. SAC ralkap nih vanlawng in kahdohnak an tuah tam biknak hmun hi Sagaing ramṭhen ah a si i voi 258 an kah, tiah an langhter.
SAC ralkap nih vanlawng in kahdohnak an tuah mi kong UNOCHA nih a langhter mi hi Switzerland ram Geneva khuapi ah September 11 in October 6 tiang tuahmi a voi 54 nak UN nuhrin covo Council meeting ah phuanzamh a si.
Vanlei Kahdohnak Ruang Ah Minung 281 An Nunnak A Liam Cang. SAC nih hramhram in uknak a lak hnu kum 2 leng caan chung ah SAC ralkap nih vanlei in kahdohnak voi 1,000 hrawng an tuah cang i cubantuk kahdohnak ruang ah a tlawm bik minung 281 an nunnak a liam cang tiah OCHR nih September report ah a langhter.
2021 February 1 in 2022 March 31 tiang voi 301, 2022 April in 2023 July tiang voi 687 tiah a zapi voi 988 vanlei kahdohnak a tuah. Cucaah SAC vanlei kahdohnak pawl hi hramhram in uknak lak a si hnu kumkhat chung vanlei kahdohnak he tahchunh ahcun a karh tuk kha hmuh khawh a si. Vanlei kahdohnak ruang ah Myanmar ram a lailei hmunhma ah minung 216 an thi i vanlei kahdohnak ah thihloh a tambik thilsining a si.
Cun vanlei kahdohnak ruang ah Myanmar ram nitlak chaklei ah minung 25, nichuah thlanglei ah minung 21 le nichuah chaklei ah minung 19 an nunnak a liam tiah report chung ah an langhter. Vanlei kahdohnak a tong bik hi Sagaing ramṭhen a si i voi 258 tiang kahdoh an tong. Atu langhter mi report hi Switzerland ram, Geneva khua, September 11 in October 6 tiang an tuah mi UN Human Rights Council i a voi 54 nak meeting ah OHCHR nih a langhter mi a si. Credit: The Chin Post, Lungmili Media