Sagaing Ramthen Ah Operation 1027 Tuah A Si Tiah Chaklei Unau Hawikom Phu Nih Cathanh An Chuah
==========
October 27 in aa thawk mi Operation 1027 cu Sagaing ramṭhen, Htigyaing peng Mawkuine tlangthluam ah AA ralkap le PDF komh nih SAC ralkap pawl an kah hna I kahdohnak chung ah kaphnih ralkap a thi mi an um tiah theih a si.
Htigyaing chaklei in meng khat le cheu a hlatnak Tiitaw khuapawng ah kahdohnak a um bantuk in peng in nitlak lei meng 4 um Aih khua pawng ah AA le PDF pawl nih SAC ralkap an kah hna. Sagaing ramthen Kawlin peng ramri Mawkuine tlangthlua ni 4 chung kahdohnak ah SAC vanlawng MI 35 nih bom a rak thlak. Mawkuine tlang kahdohnak cu AA ralkap deuh nih an kah hna, tualchung mipi ralkap zong an i tel. Chaklei unau hawikom phu aa tel mi ah TNLA, Kokang MNDAA le AA pawl hna an si.
Operation 1027 thawk hnu ni 5 tiang ah Sagaing ramthen lei ah AA ralkap hruainak in tualchung mipi ralkap le SAC ralkap karlak ah nifatin kahdohnak a um. Sagaing ramthen ah KIA le tualchung mipi ralkap an rak kahnak hmun ah nihin cu AA ralkap bu an um cang tiah mi zapi sin ah thawngthanhnak an tuah tiah Myanmar now nih a langhter.
Myanmar-Tuluk Ramri Um Palik Sakhan An Laak Chap, Ralhrang Sakhan 80 Leng Le Khuapi 3 Ṭangṭi Phu Nih An Hmumhak Cang. Shan ramkulh chaklei Muse peng, Kyukoke (Panghseng) khuapi palik sakhan cu ṭangṭi phu hna nih nizan October 31, zan ah an laak khawh hnu in mei kanghnak a chuak i, a rawk dih tiah tualchung mi hna nih an chim. Mah sakhan cu Myanmar-Tuluk ramri ah a ummi a si i zan suimilam 8:00 tluk ah ṭangṭi phu hna nih luhhnawh in an kahdoh caah an laak khawh, tiah theih a si.
“Myanmar ram le Tuluk ram ramri Meng 105 lamṭhen ah ummi asi i, palik pawl zong an thi, hriamthil an laak le laak lo tu cu theih fiang a si rih lo. Palik sakhan cu a kaang” tiah tualchung mi pakhat nih Tachileik News Agency ah a chim.
Nihin November 1 zing ah SAC ralhrang nih mah Pang Hseng khuapi cu raltuknak vanlawng in bomb a thlak pinah hriamngan in an kah chih caah mipi cheukhat nih hliamhma an tuar i innlo zong an rawk ngai hna, tiah theih chih a si. Ṭangṭi phu hna nih 1027 Operation an thanh mi a ni 5nak tiang ah Shan ramkulh chaklei hmunram um SAC ralhrang sakhan 80 le khuapi 3 an laak khawh cang i an humhak khawh cang, tiah theih chih a si.
SAC Khah-lah-yiah(143) Battalion Cu An Dihlak In Unau Phu 3 Hna Sin Ah An I Fonh. Shan ramkulh chaklei Kunlong peng, Kamaing hmunram um Khah-lah-yiah(143) Battalion cu an dihlak in hriamnam an chiah i unau phu 3 hna sin ah an i fonh, tiah MNDAA nih phungning tein thawng an thanh.
Kap 2 hnatlaknak in ceihmainak an ngeih hnu October 30 ah Khah-lah-yiah 143 phu chungtel SAC ralhrang 41 nih atu bantuk in hriamnam an chiah i mizapi sin ah an i fonh hi a si. Mah chung ah Lieutenant Commander 1 le a dang Commander 2 hna zong an i tel, tiah an langhter. Cu hnu ah MNDAA nih hriamnam chiah in aa fonh mi SAC ralhrang 41 hna cu tlunkalnak ca ah tiin minung 1 ah Sing hleinga (150,000) a zapi fonh Sing zasarih leng an pek hna i an luatter hna, tiah an langhter chih.
Mah sakhan chung ah an laak mi hriamthil hna cu pehtlaihnak seh 3, Rifle meithal zuun 27, Seh meithal fami zuun 5, RPG zuun 2, Sniper zuun 1, Seh meithal nganmi zuun 2, Type-82 zuun 1, 60MM zuun 2, 5.56 kuan pha 11, 5.56 Shot Gun kuan 8,000 le hriamthil dang tampi zong an i tel hna, tiah MNDAA nih an langhter chih.
Mandalay PDF Nih SAC Raltuknak Tank Pakhat An Hrawh I Meithal Le Hriamngan Dang Zong An Laak. Shan ramkulh, Naungcho peng Ummati- Ummakha lamṭhen pawng ah SAC ralkap raltuknak tank cu tualchung hriamtlai phu kahnak in a rawk i methal zun 6 le hriamngan zeimawzat an laak khawh, tiah Mandalay PDF in ṭuanvo ngei Aungsamon nih a chim.
November 1, zanlei suimilam 4:27 ah Pyn Oo Lwin in Naungcho khua lei hoih in raltuknak tank 2 le motor 28 he a kalmi SAC ralkap 150 hrawng cu Mandalay PDF nih Naungcho peng Ummati-Ummakha lamṭhen pawng ah an kah hna i raltuknak tank pakhat a rawk i SAC ralkap pawl cu hnu an tolh. Tualchung hriamtlai phu nih SAC ralkap hmanmi MA1 zun 1, MA2 zun 3, MA3 zun 2 le a dang hriamngan pawl an laak khawh, tiah theih a si.
“Raltuknak tank cu kan kah i meikhu a zelh in aa zel i hnu an tolh, kaphnih kar kahdohnak a fah caah SAC ralkap thi zat a fiang rih lo, meithal zun 6 cu kan laak khawh,” tiah ṭuanvo ngei Aungsamon nih cun a chim. Naungcho peng ah kaphnih kar kahdohnak a um lo nain SAC ralkap nih zing suimilam 11 hrawng ah voi khat, chunhnu hrawng ah voi 1 tiin Jet Fighter in kahdohnak a tuah. Kaphnih kar an i kahdoh lio zong ah vanlawng in sehmeithal he voi 14 nak tlawm lo kah an bawmh hna, tiah theih a si.
Tuzan suimilam 7 tiang ah kaphnih kar kahdohnak fak a chuak i SAC pawl zong hmai an fong kho lo, tiah Mandalay PDF nih thawng an thanh. PDF Mandalay cu NUG Defense Ministry tang ah a ummi phu an si i 2023 October 26 ni thawk in Taungtaman Operation an kalpi, tiah theih a si.
Yedashe Peng Ah Kahdohnak Voi 11 A Chuak SAC Ralhrang Ralbawi Commander 2 Telchih In 80 Naak Tlawmlo An Thi. Bago ramṭhen, Yedashe peng ah SAC ralhrang le mipi ralkap karlak ah kahdohnak voi 11 a chuak ralbawi 2 telhchih in SAC ralhrang lei 80 naak tlawmlo an thi tiah NUG Ministry of Defence nih an langhter.
October thlachung khan Yedashe peng ah mipi ralkap PDF Pawani rallam in ṭangṭi phufonh (joint force) le SAC ralhrang karlak ah kahdohnak voi 11 a chuak ralbawi 2 telhchih in SAC ralhrang 80 naak tlawmlo an thi 34 naak tlawmlo nih hliam an tuar tiah theih asi.
Pawani rallam in ṭangṭi phufonh (joint force) mipi ralkap chungin kahdohnak hmun ah minung 2 an nunnak a liam 4 nih hliam an tuar RPG le 60 MM mipi ralkap nih anlak, SAC ralhrang hriamngan kahnak in tualchungmi pakhat nunnak liam khuasaknak inn 2 a rawk mipi 550 tluk hmunhimnak ah anzaam tiah theih asi.