Mindat Khuapi Ah SAC Ralkap Nih Tualchung Mi Thilri Le Facang An Chuh Hna.Mindat khuapi um Khah Lah Yah 274 Battalion in SAC ralkap nih Mindat khuapi nitlaklei sang ah inn khat hnu inn khat in chekhlatnak an tuah i michawkvai sawhsawh zong an chek hna, tiah theih a si.
Mindat khuapi ummi hna cu Yaw lei ah facang cawk ah an kal i an cawkmi facang cheukhat cu SAC ralkap nih an chuh hna i GAD zung ah an i khon. Cu an laakpiak mi facang hna zong man an pe hna lo, tiah tualchung mi hna sinin theih a si.
Facang tun hnih a phormi hna cu SAC ralkap nih tun khat an laakpiak hna i tangka zong an pe hna lo. Minung pakhat ah facang ṭin khat lawng phorhnak nawl an pek hna, tiah min langhter a duh lomi pakhat nih a chim.
A hlan lio zong ah SAC ralkap nih Yaw ram lei i facang a va cawtu hna cu facang phorh le cawk kong ah ri an rak khiahpiak cang hna, tiah theih a si.
Tlaih A Tongmi Media Rianṭuan 50 Leng Cu A Rannak Chuah Ding In Independent Press Council Myanmar-IPCM Nih Nawlnak An Tuah.SAC ralkap nih hramhram in an tlaih i thong an thlak mi hna Media rianṭuan minung 50 leng cu an zate in a rannak chuah ding in Independent Press Council Myanmar-IPCM nih nizan January 10 ah SAC sin ah nawlnak an tuah.
A luancia January 4, Independence Day ah SAC nih Myanmar ramchung hmunkip thongtla minung 9,600 leng cu luatnak a pek hna i, cu chung ah Media rianṭuan pathum Kaung Set Lin (MPA), Tun Than Aung le Toe Aung (Mekong Media) zong an i tel ve.
SAC ralkap nih hramhram in nawlngeihnak an laak hnu ah Media rianṭuan mi 170 an tlaih mi hna chung in minung 118 cu an thlah ṭhan cang hna nain midang 52 cu chuah duh lo in thong an thlak rih hna, tiah IPCM nih an langhter.
Media rianṭuan mi hna cu rampi nih a ngeihmi phunglam le Media zulhphung he aa tlak ning in thawnglatu an si bantukin phungning tein rian a ṭuan mi an si i a zalong mi Media rianṭuannak dohkalh in hnahnawhnak a petu vialte le hramhram in tlaih i thong thlak a hmangmi vialte cu IPCM nih fakpi in kan doh ve hna, tiah an langhter.
Tlaih a tong mi Media rianṭuantu vialte chuah le phungning tein Media rianṭuannak a him khawh nakhnga papek in kalpi an timhnak kong cu IPCM nih an langhter i Independent Press Council Myanmar-IPCM cu ramchung ramleng Myanmar Media vialte i fonh in 2023 December 22 ni ah dirh a sinak zong an thanh mi ah cun an langhter chih.Credit : The Chin Post