Manton Peng, Khumone SAC Ralkap Sakhan Cu TNLA Nih An Laak Hnu Ah Hriamnam An Laakmi An Langhter
=======
Shan ramkulh chaklei, Manton peng, Khumone SAC ralkap sakhan cu TNLA nih an kah i an laak hnu ah hriamnam an laakmi social media ah an taar.
December 7, zanlei suimilam 4:30 hrawng ah Manto peng, Khumone ralkap sakhan cu Ta’ang ralkap TNLA nih an kah i an laak khawh. Cu sakhan kahdohnak ah cun 60mm hriamngan telh in hriamnam tam ngai le ralkap hmanmi thilri an laak khawhmi hna cu an pho.
1027 Operation thawk ni October 27 in nizan December 8 tiang ah Ta’ang ramkulh chung SAC ralkap sakhan 53 cu TNLA nih an laak cangnak le hriamnam tam ngai an laak khawhnak kong cu phungning tein an thanh.
Cu pin ah December 7, chun suimilam 11:35 ah Kyaukme peng, Mailone peng ṭhen Laegyi ralkap sakhan cu TNLA le Moekok Byuha PDF ṭangṭi phu nih an laak. Cu sakhan kahdohnak ah cun hriamngan telh in hriamnam phun 10 le ralkap hmanmi thilri zong an laak khawh.
Laegyi sakhan kahdohnak ah cun SAC ralkap nih vanlawng hmang in kahdohnak voi 12 an tuah nain TNLA le Moekok Byuha PDF ṭangṭi phu nih an laak khawh ṭhiam, tiah theih a si.
Pauk Peng Palik Sakhan Um Palik Pahnih Cu PDF Nih An Tlaih Hna.Magway ramṭhen, Pauk peng, Thargyitaung palik sakhan in meh caw ding in a chuakmi palik pahnih cu an hriamnam he kan tlaih hna, tiah Pauk peng PDF nih an thanh.
December 8 zinglei ah Pauk peng le Pakokku peng ramri Thargyitaung palik sakhan in palik pahnih cu meh caw ding in an chuak i an pahnib in PDF nih an tlaih hna, tiah theih a si. Palik pahnih cu G3 meithal zun 2, kuanbawm 4, meithal kuan 300, nam 2, kutkhih cincik 1 le phone lung 2 he an tlaih hna.
Tlaih a tongmi palik pahnih hi kum 30 leng minung an si i PDF nih an tlaih hna lioah zaam loin an um i fawi tein an tlaih khawh hna. Palik pahnih cu Pauk peng PDF nih upadi ningin an zohkhenh hna, tiah theih a si.Credit: The chin post