SAC Nih Kum 30 Tluk Umhmun Khuarnak Ah An Hman Cang Mi Yusalin Sakhan Cu An Chuahtaak. Karen ramkulh, KNU Brigade 5th hmunram chungah ummi SAC ralhrang nih kum 30 tluk umhmun khuarnak ah an hmanmi Mawhpu (Yusalin) sakhan cu KNLA ṭangṭi phufonh nih drone in bomb an thlakhnawh pin ah sniper in an kah hna caah sakhan an chuahtaak tiah chuahtaak Force for Federal Democracy – FFD in ṭuanvo ngeitu pakhat nih Khit Thit Media ah a chim.
February 17, 2024| ah thok in ni 24 tiangah KNU Brigade 5th hmunram chung um SAC ralhrang nih kum 30 tluk umhmun khuarnak ah an hmanmi Mawhpu (Yusalin) sakhan cu KNLA ṭangṭi phufonh nih drone in bomb 40 leng an thlakhnawh tiah theih a si.
SAC ralhrang nih an chuahtaak mi sakhan chungah KNLA le FFD phufonh nih 60 MM 60, le hriamthil dang hna an laak tiah Force for Federal Democracy tiah an chim. Lungmili Post
Thawngpang dang: Chin Miphun Dihlak Ca Ah Chinland Council Ah Kan I Fonh Lai Tiah Mindat Region-1 Council Nih Theiher A Tuah Ṭhan. Peng dot lawng si lo in Chin miphun dihlak kongkau tawlrelnak ca ah Chinland Council ah i fon in rian kan ṭuan lai, tiah Mindat Region -1 Council nih February 23 ah cathanh a chuah.
Mindat hmunram dihlak mizapi duhnak ning in ramkhel lei biakhiahnak tuah khawh nakding le lungrual te in miphun sersiamnak rian ah i tel khawh nakding kan i ruahchan i, 2022 February 6 ah Mindat Region – 1 Council nih Mindat Peng Zapi Ukhruainak Bu lutlai sin ah ca kan kuat, tiah an ti.
Cu ca an kuat mi cu a hnu bik February 20 ah rak kan let ṭhan uh tiah kan ti nain nihin tiang zeihmanh lehnak a um lo, ti zong an cathanh ah an telh. Mindat Peng Zapi Ukhruainak Bu le CDF-Mindat nih Mindat Region-1 he biaruah nan duh ahcun zeitik poh ah innka kan hun peng ko tiah an ṭial.
Cun, Mindat peng chung gate pawl ah siseh, khuate ah siseh, Chinland Council he rianṭuan ṭi a duh mi pawl kham lo ding le tlerhkhawnh ti lo ding zong an langhter.
Ton biaruahnak a um hlan chung poh cu 2024 February 6 meeting biachahnak ning in Mindat Region-1 chung ukhruainak le runvennak cu Mindat Region-1 Council ṭhithruainak tang ah a um rih lai, ti zong an ṭial.
Mindat peng Circle-4 le Circle-11 nih Mindat Region-1 Council an dirh i Chinland Council ah kan i fonh tiah 2024 January 28 ah an rak thanh. The Hakha Post