SAC Nih Kahdaih Hnatlaknak An Buar Tiah TNLA Nih An Thanh.Tuluk lam hmuhsaknak in SAC le chaklei hriamtlai ṭangṭi phu thum cu January 11 ah caan karlak chung kahdaih hnatlaknak an rak ngei nain SAC lei nih TNLA hmunram ah vanlawng in bomb an thlak i hriamngan kah a ngol hlei lo caah kahdaih hnatlaknak a buar, tiah TNLA Nih nizan January 15 an thanh.
January 15 ah kaphnih in kahdohnak a um lo nain SAC ralkap nih tualchung mi umnak Kyaukme peng, SAC ralkap 502 Battalion sakhan in Papauk khua ah hriamngan voi 4 an kah, tiah TNLA nih an langhter.
Cu pinah Thanbo khua pawng zong ah January 15 ah hriamngan voi 5 an kah rih. Naungcho peng Ommathi lamṭhen ah umhmun a khuarmi SAC ralkap zong nih Thonse khua ah hriamngan voi 3 an kah ve, tiah an thanh.
Kutkai peng khuate pathum pawng zong ah Mi 35 nih kahdohnak voi khat a tuah i SAC le hriamtlai ṭangṭi phu kahdaih hnatlaknak an ngeih hnu in January 15 tiang ah TNLA umnak Kyaukme, Mogok le Lashio peng ah SAC ralkap nih hriamngan in kahdohnak an tuah, tiah TNLA lei nih an langhter.
Thawngpang Tha TakTak Rak rel Chih! Taingen SAC Sakhan Pathum Cu Chin Ralkap Nih An Lak Cang.Chinram, Tedim peng Taingen khua i SAC ralkap sakhan pathum cu January 16, zinglei ah Chin ralkap ṭangrual hna nih an lak cang tiah theih a si.SAC Jet Fighter nih bomb a thlak pin ah Kalay in miakpi 120 MM in an kah tuk hna caah Chin ralkap nunnak a liam mi zong an um. Hliamtuar zong an um tiah theih a si.
Taingen kahdohnak ah CNA, Chin Rifle (CR), CDF-KKG, CDF-Thantlang, CDF-Hakha, PDA, CDF-Hualngoram, CDF-Zanniatram le TCDF hna an i tel.Taingen SAC ralkap hi Chin ralkap hna nih 2023 chung ah an rak kah pah cang, asinain pehtlai in an kap kho lo. An i kah chel, an i dinh chel tiin a rak si.
“Taingen hi kan lak khawh cang caah Chinram ah a kai ding mi SAC ralhrang hna cu kan kham khawh deuh cang hna lai. Kanmah lei a thi mi an um. SAC lei a thi mi le hriamnam kan lak mi zong an um ko. Tlamtling deuh in kan thanh te ko lai” tiah kahdohnak ah aa tel mi Chin ralkap pakhat nih The Chin Post ah a chim.January 12, 2024 khan kah an thawk ṭhan i ni 4 a rauh hnu ah an lak khawh hi a si.Credit : The Chin Post