Bangladesh ah SAC Ralkap 70 Deng an Zaam.Rakhine ramkulh, Maungdaw peng ah a um mi Myanmar-Bangladesh ramri i Taungpyo SAC ralkap sakhaan cu AA nih an kah caah nizan February 4 zinglei ah khan SAC ralkap 66 nih an sakhaan an chuahtak i Bangladesh ramchung ah an zaam.
Bangladesh thawngzamhnak Prothomola-English nih cun “A rak zaam mi SAC ralkap pawl hi ramri congtu ralkap an si i, hliamhma a pu mi zong an um. Ramri ah a um mi Bangladesh khuami hna nih eidin le tirawl an pek hna. An zapi ah minung 66 an si,” tiah a tial.
Taungpyo SAC ralkap sakhaan cu February 29 khan AA nih kah hram an thawk i nizan February 4 ah tlamtling tein an laak cang, tiah Rakhine thawngzamhnak Arakan Princess nih a tial.
Update : Lom Um Kho Tuk ! Kum 3 Chung ah Chinram Chung SAC Ralkap Sakhaan 24 an Laak.SAC ralkap nih Myanmar ram uknak an laak ni February 1, 2021 in February 1, 2024 tiang, kum 3 chung ah Chinram chung i SAC ralkap sakhaan 24 cu dohthlengtu ralkap hna nih an laak, tiah Institute of Chin Affairs (ICA) nih report a chauh.
Kum 3 chung ah Chin miphun ralkap bu hna le SAC ralkap karlak ah kahdohnak voi 900 leng a chuak i, SAC ralkap nih sakhaan 24 a sungh pin ah palik sakhaan 12 zong an chuahtaak, tiah ICA nih a langhter.
Hakha, Thantlang, Falam, Matupi, Tedim le Kanpelet ah a um mi SAC ralkap sakhaan 14 cu Chin miphun ralkap hna nih kum 3 chung ah an laak i, Paletwa peng ah a um mi SAC ralkap sakhaan pakua zong AA hriamtlai nih an laak ve.
Dohthlennak kum 3 hnu ah zatuak in Chinram chung hmunram 75% cu Chin miphun hriamtlai hna kut ah a um cang, tiah ICA Report nih a langhter.
Up Date : Azual Ko Ee ! Namhsan ah kah cia bomb thei an deh mi a puah caah ngakchia pathum an thi.Shan ramkulh, Ta’ang hmunram, Namhsan khua ah kah cia a si nain a puak rih lo mi hriam ngan bomb thei pakhat cu ngakchia nih lente an i celhnak i a puah caah ngakchia pathum an thi tiah theih a si.
Cucu nizan February 2, Namhsan khua, Zayangyi sang ah a cang mi a si. Namhsan khua kahdohnak lio ah puak lo in a taang mi SAC hriam ngan bomb cu ngakchia nih an hmuh i lente cehnak ah an hman lio ah a puak tiah PSLF/TNLA nih cun a thanh.
Bomb puah ruang ah kum 6, kum 10 le kum 11 ngakchia pathum cu hmun ril in an thi tiah theih a si.Namhsan khua kahdohnak lio ah SAC ralkap nih khuachung i hmunhma an laaknak pawngkam le khuami inn hmun kulh chung hmun tampi ah bomb an hmanh hna. SAC ralkap bomb hmanh mi le hriamnam ngan an kah mi pawl cu TNLA nih an thianh cuahmah hna tiah theih a si.Credit : The Hakha Post