Tonzaang Khua Kahdohnak Ah CDF Pakhat Nunnak Liam; Khuami Pakhat A Thi I Minung 3 Hliam An Tuar
=========
2023 August 1 Chin ramkulh Tonzaang khua ah SAC ralhrang le Chin ralkap tangti phu kar kahdohnak ah CDF-Hualngoram ralkap Lalramchuana a nunnak a liam tiah kan theih. Hi kahdohnak ruang ah Tonzaang peng Mualpi khua mi Pa Mang Sian Cing (kum27) a thi i ngakchia kum 8 mi le kum 12 telh in minung 3 hliam an tuar tiah Tedim Times nih a langh ter.
Hi kahdohnak cu CNA, PDA, CDF-KKG, CDF- Hualngoram le CDF- Tonzang hna an i tel. Hi kahdohnak ah SAC ralhrang zong a thi mi le hliamtuar an um hna tiah tualchung Media cheukhat nih an langhter, Kahdohnak kong he pehtlaih in Lungmili Post nih CNA lei le kahdohnak ah aa tel mi Chin ralkap kan pehtlaih lio hna a si.
Tonzang Kahdohnak Ah Chin Ralkap Salai Lalramchuana Nih Ram Ca Ah Nunnak A Pek! Nizaan August 1, Chin ramkulh Tongzang khuachung Chin ralkap le SAC ralkap kahdohnak ah CDF- Hualngoram ralkap Salai Lalramchuana a nunnak a liam tiah theih a si.
“Tonzang khuachung ummi SAC ralkap kan va luhhnawh hna i kaphnih kar kahdohnak ah kanmah lei in pasalášha pakhat nih ram ca ah a nunnak a pek, SAC ralkap lei in a thimi le a hliammi an tam nain fiang in theih a si rih lo,” tiah Chin ralbawi pakhat nih The Chin Post ah a chim. Nizaan Tongzang khuachung kahdohnak ah CNA, CDF- Hualngoram, CDF-KKG , CDF- Tonzang le PDA hna an i bawm, tiah theih a si.
Kachin Mino 2 SAC Ralhrang Nih An Thah Hna I An Ruak An Khangh Hna! Shan ramkulh chaklei Muse le Kutkai khua karlak Dima khua um Kachin rammi mino 2 hna cu SAC ralhrang nih an thlaih hna i an thah hna. Cuhnu ah mei in an ruak an khanghmi hna cu July 31 ah kan hmuh hna, tiah Dima tualchungmi hna nih an chim.
Dima khua KBC khrihfabu in mino 2 hna cu a luancia July 25 lio ahkhan SAC ralhrang nih hramhram in an tlaih hna i zarhkhat a rauh hnu July 31 ah an ruak an khanghnak hna hmun cu atu bantuk in kan hmuh hi a si, tiah tualchungmi hna nih Kachin News ah an chim.
A dang tualchungmi pakhat zong nih “An ruak an khangh hna caah a vutcam lawng kan laak khawh hna. SAC ralhrang pawl nih 1 cu Ta’ang National Liberation Army(TNLA) uniform an hrukter i, a dang 1 cu SAC ralhrang kuttang simi Pyi-thu-sit angki an hrukter ve. SAC ralhrang nih hin hman an thlak hna lai i TNLA hriamtlai 1 kan thah tiin cunglei ah thawngthanhnak an tuah lai tiah kan zumh i an kuttang hriamtlai Pyi-thu-sit angki an hruktermi tu hi zeitin dek a ruang an kawl ve hnga” tiah a chim.