Rih Operation Hmanthlak Cheukhat
==========
CNA hruainak in CDF-Hualngoram, PDA, CDF-Zaniatram, CDF-Thantlang hna nih November 13 le 14 ah Falam peng Rihkhawdar khua ah a um mi ralkap Tio sakhaan le Rih sakhaan hna an lak khawh i India le Myanmar ram chawleh chawluhchuahnak ah a biapi mi Rihkhawdar khua ah Chin thandar an thlai i khua ning in an uk khawh.
Rih Operation cu CNA Commander In Chief Brigadier General Ngun Hlei Thang amah pumpak nih a hruai hna i hriamngan/hme tampi le kuanzen tampi an lak khawh tiah theih a si. Rih Operation ah Chinland Information Center nih hmanthlak cheukhat a thlak mi a si.
CNF Chimphuannak Nawl A Ngeitu Salai Htet Ni le KHit Thit Biaruahnak. Myanmar ram hmun kip ah dothlennak phu pawl nih khuapi an lak thluahmah bantuk in Chin ramkulh zong ah Chin dothlennak phu pawl nih a voikhatnak bik ah Rihkhawdar khua an lak ve.
Cu an lak mi Rihkhawdawr khua ah mipi uknak an dirh lai ti mi kong le ramri chawlehnak le chawluhnak khua a si bantuk in India ram lei phu pawl he pehtlaihnak zeidah a lawh ti mi kong telh in kahdohnak dirhmun kong Khit Thit nih Salai Thet Ni bia a hal mi a si. Khuapi lak kahdohnak pawl thawk a si cang lai maw ti i biahalnak pawl zong aa tel.
Rihkhawdar Sakhaan Lak Kahdohnak Ah Major Telh In 7 Nih A Sung An Pek, Hriam Phuntling Tamlak Te An Lak Khawh. Chin ramkulh, India-Myanmar ramri, Rihkhawdar khua lak kahdohnak ah ralkap lei Major telh in 7 nih a sung an pek, hriam le kuanzen tamlak te an lak khawh tiah CNA lei nih an chim.
November 13 ah Chin ramkulh, India-Myanmar ramri ah a um mi Rihkhawdar khua hrambunh Ṭio ralkap sakhaan le Rihkhawdar ralkap sakhaan hna cu an kah i an lak khawh caah Rihkhawdar khua a ning in an lak khawh, November 14 zinglei ah India-Myanmar ramri gate ah an tar mi kawl thandar thlak in CNF thandar zong an thlai tiah theih a si. Kahdohnak chung ah Major telh in ralkap 7 nih a sung an pek tiah theih a si.
Kahdohnak chung ah CNA hruai mi dothlennak phu lei in 6 an nunnak a liam i 10 hrawng an i hliam tiah theih a si. Kahdohnak ruang ah ralkap 40 leng cu India ram lei ah an zaam i India cozah nih a zohkhenh hna tiah theih a si. Rihkhawdar khua hi India-Myanmar chawlehnak le chaw phorhnak ah a biapi tuk mi India-Myanmar lam cung ah a um mi khuate pakhat a si.
Paletwa Um Ralkap Byu-ha Sakhaan 2 AA Nih A Kah Cuahmah. Chin ramkulh, Paletwa ah hrambunh mi ralkap Ta-run-ai byuha le Nung-bu byuha sakhaan 2 cu AA nih a kah cuahmah lio a si tiah unau hawikom phu nih thawng an thanh. Ralkap lei nih vanlawng, hriamngan hna bawm in a kham chih ve ko nain AA ralkap pawl nih ngol lo in an kah thluahmah tiah an langhter.
Operation 1027 min in AA nih Rakine ram ah a um mi ralkap sakhaan cu November 13 thawk in kahdohnak a tuah. November 13 kahdohnak ah Rathedaung, Maungdaw le Minbya peng hmun 5 ah kahdohnak a chuak i Rathedaung peng ah a um mi Dung-paih BGF sakhaan le Ching-kha-li BGF sakhaan hna an lak khawh.
Minbya peng chung kahdohnak ah ralkap IB 344 in Major Thant Zin Htun (S.B.C) Captain Phyo Zeyar Hliang hna telh in 10 an tlaih khawh hna tiah AA nih a thanh. Kahdohnak chung ah mithmuh in 10 leng an i hliam tiah an chim. Cun ralkap LIB 232 he a cang mi Maungdaw chaklei, Tinbaw khua pawng kahdohnak zong ah ralkap pakhat telh in ralkap hriam le kahdohnak thilri pawl an lak khawh i Platoon Leader Kyaw Thet Naing telh in 14 hrawng an thi.
November 13 kahdohnak ah AA lei 6 an nunnak a liam tiah an langhter. November 13 ah palek A pauk-wa sakhaan in palek 22 AA sin ah an i fonh tiah an langhter fawn. Cun hmundang in palek 6 zong hriam he an rak i fonh ve tiah an chim. November 13 lawng ah ralkap kuttang BGF, palek sakhaan 40 deng an kaltak i a pawngkam aa naihnak ralkap sakhaan, palek sakhaan pawl ah an i fonh tiah theihternak an tuah.