Rawn Lei Kahdohnak An Thawk Tik Ah.Myanmar ram hmunlai kip rawn lei kahdohnak fak in a hun um tik ahcun SAC ralhrang uknak a dongh lei a panh lai, kahdohnak zong a rauh hlan ah an thawk ding hi zatuak tampi aa fiang ngai ko.
Sagaing ramṭhen tanglei, Magwe ramṭhen, Mandalay ramṭhen, Naypitaw, Bago ram nichuak, Nithlak, Ayeyarwaddy ramṭhen, Yangon ramṭhen le hmun rawn umnak ah mipi ralkap nih Byuha Offensive kahdohnak an tuah ning vun zoh tuah u sih.
Peng-Myo tampi, hmunkip um SAC ralkap sakhan, palek sakhan, pyituhsit sakhan, ralkap motor a umkal mi, ralkap hna ralram kalnak lam kip ah mipi ralkap PDF le tualchung ralkap hna le tlangcung hriamtlai phu hna nih hmunkip bawh in an kah hna. A cunglei kan langhter mi Myanmar ram hmunlai hrawng um mi zoh tik ah mipi ralkap nih ralkap sakhan an lak khawh pah cang.
Cheukhat ram (tahchuhnak- Ayeyarwaddy ramṭhen, Bago ram nitlak lei) kahdohnak an tuah kho rih lo. Yangon ah hin Urban Ground-UG nih operation an tuah pah lengmang. Khuachung palek sakhan, ralkap sakhan, dalan kahnak pawl an tuah tawn. A tu hmunrawn lei kahdohnak fakngai in an hun tuah ahcun SAC lei politics le raldohnak ah sungh zatlaknak an ton ding hi a fiang ngai ko.
Rawn kahnak 2023 kum chung vun zoh than tik ah, 2023 kum hramthawk February le March thla in Myanmar ram hmunlei um mi vanlawng umnak sakhan, ralkap hriamnam sernak sehzung tampi ah mipi ralkap lei nih kahnak operation tampi an tuah khawh.
Cu hnu ah ralhmu Byuhu – Strategies umnak Bago yoma hmun ah a voikhatnak bik karhlannak ah Yoma le Yangon –Mandalay highway lei pawng um Sittaung tiva- region ah kahdohnak an rak tuah. Mah kahdoh an tuah lio ah ralhrang lei nih KIA Headquarters Laiza khua lei ah operation an rak tuah mi cu mipi ralkap nih an rak kham khawh. Ralhrang hmai an kal kho lo. An mah tu a thi mi, a zaam mi an tam, an sung tiah ti khawh a si.
Mah hnu thil sining zohthan tik ah:
Sagaing ram tanglei, Magwe ramthen, Bago nitlak hmun ah mipi ralkap nih cheukhat sakhan an lak.
Karen le Karenni-Kayah, Tanintaryi ram lei ah kahdohnaknak a bik in chawlehnak ah hman mi lam, khuapi tiang kahnak a chuah.
Yangon khuachung zong ah UG operation kahnak hmun tampi ah an tuah. Naypitaw le Mandalay khuapi pawngkam tiang kahnak a hun um.
Mikip nih theih bik mi 1027 operation, 2023 kum October 27 in thawk mi nih Shan ram chak lei le Rakhine ram dihlak ngawt cu mipi ralkap nih an lak khawh. Tuluk-Myanmar chawlehnak lampi um khuapi cu mipi ralkap nih an lak.
Rakhine ram lei zoh tik ah India ramri Paletwa peng vialte cu lak a si hnu ah Rakhine chaklei peng kip ah kahdohnak le sakhan laknak a um.
Upper Sagaing ram ah pengkulh-District khua Kawlin khuapi cu mipi ralkap nih an lak hnu in Ayeyarwaddy tiva kam um hmuntha ngai mi Tigyaing ထီးချိုင့်မြို့ ah 2023 kum chung raldohnak ah mipi ralkap lei nih an teinak hmanthlak nih a langhter mi cu mah hmun hrawng ah ralhrang nawlngeihnak a zor thluahmah mi le tlangcung ramri paoh ah ralhrang thazang a ngei ti lo mi hi a si.
Tlang cung lei ah mipi ralkap nih teinak an hmuh thluahmah hnu ah a herh mi cu rawn lei Offensive kahnak hi a si. Pakhatnak ah tlang he ramri umnak hmun um SAC sakhan kahnak cu nikhat hnu nikhat mipi ralkap lei nih teinak an hmuh thluahmah.
SAC lei Region Command, LIB command, vawlawng sakhan, hriamnam sernak sehzung, bawmchannak hman mi motor umnak pawl hi an hun kah lai. Mah hmun rawn kahnak nih tlangcung ah ral teinak hmun pawl mipi uknak serkhawhnak ding ah bawmchantu a si lai. Tlangcung a kai ding mi ralhrang cu rawn um mipi ralkap nih an kham/an kah hna lai caah ralhrang pawl an i timh ning in thil a si kho lai lo.
Atulio SAC dirhmun zoh tik ah raldohnak a sungh peng caah tualchung mipi thahnawnnak, vanlawng in bom thlaknak an tuah peng. Cucaah mah bantuk mipi cung ah sualtuahnak a pehzulh khawh nakhnga lo mipi lei hunhimnak ral a tlawm nakhnga timhtuah caan a si.
Ram lei kahnak ah hriamngan le kuan-zen a herhbau peng lai caah kuan-zen tampi a herh mi sakhan laknak, khuapi laknak operation duh salam in tuah rih lo a tha. Teinak kan hmuh bak lai tiah zumh mi peng-Myo kahnak ah a herh mi kuan-zen-bom-drone tha tein tuak hnu ah khuapi kahnak an hun tuah te lai.
Rawn Offensive kahnak ah a herh bik mi cu mipi ralkap lei hmanhmawh tuk lo ding, ralhrang pawl an umnak hmun kip ah hnahnawhnak pek peng ralhrang an thazang a zor, an tha a di tiang hi tuah a herh. Rawn kahnak kong he pehtlai in Tuluk ram hruaitu hlun Mao Zedong nih cun a hak mi hrial a nem mi doh tiah a rak ti. Minung thazaang ṭhawng in ralram a kal mi ralhrang, motor rung, le khuapi kahnak ah ready hnu ah kahdohnak thawk hi a herh bik mi a si.
Nihin rawnlei kahnak a um hnu theitlai phun 3 a um kho. Pakhatnak ah hmunrawn ram lei ah mipi ralkap nawlngaihnak a dir kho lai, ralhrang umnak vialte an ram a bi lai, pahnihnak ah tlangcung lak cia mi hmunkip ah an duh herh mi bawmhnak a tuah kho lai, Pathumnak ah ralhrang lei ralkap pawl mipi ralkap lei an rak i fonh thluahmah rih lai.
Hmunrawn lei kahdohnak fak chin in an thawk tik ah cun, Naypitaw, Mandalay, Yangon tibantuk khuapi pawngkam ah mipi ralkap a run nih khuapi kulh in an kah khawh lai. Group lei a tak kahnak ah vawlei cung ramkip hmuhnak le a bik in Tuluk ram lei mipi ralkap cung an hmuhning, SAC nih rampi uknak kong ah Tuluk ruahning aa hun thlen thluahmah hrim lai.
Zeiruang ti ahcun rampi daihnak le ramchung hmumkip ah mipi ralkap bu hunhimnak thazang a thawng chinchin mi zohtik ah mithmuh le elawk ṭha lo in hmuh a si. Vawlei cung ramkip lei in NUG le mipi ralkap an cohlan nakhnga, pehtlainak a ngei lai.
Chawlehnak hmun ah a biapi ngai mi thlaicinnak hmun, communication lam kip vialte ah mipi ralkap nih hunhimnak a lak khawh dih lai i SAC lei tangka hmuhnak lam a pit lai i a rauh hlan ah an tluk ruangmang hnu ah mipi ralkap thazang thawnnak hmun a kau chin te ding a si.
Nihin mipi ralkap thazang zoh tik ah hmun rawn lei kahdohnak fak chinchin an vun tuah te tik ahcun SAC ralhrang bu pennak a rawk dih lainaj ni le caan a rau ti lai lo.Credit : The Chinland Post