Ralrin Thiam Kan Herh Ngai Cang Hi!
==========
A liamcia thla 3 hnu in khan kan dothlennak ah mipi nih Live kan thlahmi le ca kan tialmi zohtu le reltu an zor ngaingai cang. Hihi thil hmete a lo nain a dothlennak ah a poimawh tukmi thil le kan dothlennak engine fuel a dih zuahmah mi he ka tah chunh.
A liamcia thla 2 or 3 hnu in khan dothlennak kong ca kan tialmi a reltu hi a lét khat bakin an zor deuh, cuhlan ahcun group ah a hot deuhmi kong kan tialmi hna cu minung 20,000 in 40,000 kar hi careltu an si zungzal. Asinain thla 2 or 3 hnu in cun dothlennak kong careltu hi 20,000 an tling huaha ti lo.
Live in supporting team tlangau pawl zong tuchun cu an viewer pawl ka checking hna, an rak zor tuk ve cio cang hna. Hihi thil hmete a lo nain a biapi tukmi tahnak pakhat cứ a si ve, a sullam cu cuhlan bantuk in mipi nih kan dothlennak kong hi an lungah an chia ti lo ti khawh asi.
Tu bantuk in huamsam tein mipi an lung a zor zuahmah asi ahcun kum vui khi cu kan awh khawh ti lai ka zum lo. Cutik ahcun tlangau pawl le upa pawl nih mipi kha phaisa thawh duh lo tiin sual a phunphun in nan phawt te hna lai i sullam zeihmanh a ngeiti te lai lo.
Laimi group ah a nganbik upabik pawl kan si bantuk in mipi cawlcanghnak le kalning zong a ngiathlai bik pawl cu kan si ve caah ka chimmi hi a dikmi asi mu. Hihi tu te hin a damnak (solution) kan kawl pah lo ahcun miphun ah a lung a fimtuk rih lomi Chinmi kan caah cun hlan lio i CNA caah phaisa thawh an rak i timh lomi nak let tampi in kan lungthin a zawr deuh te lai.
Mipi leiin careltu le Live in tlangau mi zohtu an zor tuk cangmi kongah keimah nih ka zumh ning ahcun a tanglei 7 ruang ahhin asi kho tiah ka ruah. 1. Kum 2 renglo thideng in phaisa mipi nih an thawhmi ah kan ralkap pawl nih teinak an hmuhmi nakin sunghnak, meithal kuan a dih timi a tam deuh tawn tikah mipi a thli tein an lung a zorter tuk.
2. Tlangaumi le catialmi ah tei dengmang bantuk in chim zungzal, cuzah kan ngeih ahcun kan thawngtuk cang lai ti bantuk thil ah a takin kan si tawn lomi. 3. A caan a vun sau i ram thumnak ummi pawl nih thathawh dingmi le i lunghmuih dingmi ngaingai kan hmuh lo tikah, harsat par ahcun an i hne kho tuk ti lo.
4. Live in tlangau pawl a thawng deuhmi nih meithal kuan le dothlennak main point taktak asimi one command and budget ah an i biatak tuk lo, thil kan ti kho ti phun deuh in anmah duhduh ning in tlang an au cio caah thil ai thenthek ngaingai. 5. Z generation chan le social media chan a si cangmi ah social hman kan thiam lo, meithal le zenkuan tluk in a biapi timi kan i fiang tuk lo, a khắp rumro in kan khắp.
6. Kan surlu deuh pawl hi anmah le zawnka ahcun miza lawngte an si dih ko nain, chanthar mino le mipi he i komh le kal duhning in mipi lung lak an thiam tuk lo. An tuahmi pawl hi a za tuk le a tha tuk ah an ruat i, hi nak let in cun tan lak chinchin rih a hau hnga.
7. Phaisa kongah Laimi cu ahohmanh kan i zum kho ti lo, mipi nih zumh mi si hi priority bak asi hmasa caah hi kong chim le a hmannak langhter lengmang hi kan damnak le kan chansaunak asi lai ti a ruah awk kan hngak tuk lo. Hi ti ning tein thil a kalpeng ko asi ahcun ka chimmi hi kum vui chung ahcun a tling te lai zoh te u. Biasiphai le soiselnak asi lo, attention ka vun tuah bia asi deuh. Credit: Chelsea Bawi
A Thar In Remhmi SAC Ukhruainak Council Ah Dr. Hmuh Thang Aa Tel. SAC nih ukhruainak council an remh tharmi ah Chin ramkulh USDP Chairman Dr. Hmuh Thang aa tel, tiah August 2 ah SAC nih an thanh. Dr. Hmuh Thang cu a 2023 February 18 ah SAC ukhruainak council chungtel ah a rak i tel cangmi a si.
SAC nih ukhruainak council an remh tharmi ah Min Aung Hlaing cu Chairman ah an thim i Vice Chairman ah SAC ralkap ralbawizik chang Soe Win a si. Secretary ah Deputy General Aung Lin Dwe le Assistant Secretary ah Deputy General Ye Win Oo hna an si, tiah theih a si.
SAC ukhruainak council chungtel ah General Mya Htun Oo, General Tin Aung San, Deputy General Moe Myint Htun, Deputy General Soe Htuat, Deputy General Yar Pyi, Wana Maung Lwin, Dr. Hmuh Thang, Shwe Kying le Yan Kyaw hna an si, tiah SAC nih cun an langhter. Dr. Hmuh Thang cu USDP in 1990, 2010, 2015 le 2020 kum thimnak ah a rak i zuam i, 1990 kum le 2015 kum ah Chin ramkulh Hluttaw palai in teinak a rak hmutu a si.
SAC Zung Lutlai Bawizik, Ministers Le Chungtel Cheukhat Cu An Rian In SAC Nih An Dinhter Hna. SAC nih biaceih bawizik(Chief Justice), tangka cazin lei chektu luzik(Auditor General), eihmuar dohnak ah Chairman (Anti-Corruption Commission), nuhrin covo lei tawlreltu (Human Rights Commission Chairman), Ministers 4 le SAC chungtel 3 cu an rian in kan dinhter hna i pakhat cu a rian kan ṭhial, tiah August 2 ah SAC nih an thanh.
SAC chungtel Maung Ko le Dr. Aung Kyaw Min cu chungtel sinak in an chuah hna i Dr. Kyaw Htun belte cu SAC Central ruahnak petu rian ah an ṭhial, tiah theih a si. Biaceih bawizik Htun Htun Oo, biaknak lei Minister Ko Ko(Religious Affairs), Electricity minister Thaung Han, tangka cazin chektu luzik Tin Oo, eihmuar dohnak Anti-Corruption Commission Chairman Htey Aung, Human Rights Commission Chairman Hla Myint, Minister of Energy Myo Myint Oo, Minister of Labor Dr. Pywint San hna cu an rian in SAC nih an dinhter hna, tiah theih a si.