Chinram Cheukhat Peng Le Kalaymyo Ah Ngakchia Le Kum Upa Tlangrai Zawtfah An Tam!
===========
Chin ramkulh peng cheukhat le Kalaymyo peng ah fur hramthawk July thla in hngakchia le kum upa tlangrai a tam. An zaw hma tuk ruang ah private siikhan, siizung a phan thar mi August thla dongh zarh tiang ah zoh cuahmah mi hna an cat kho lo tiin theih a si.
Kalaymyo peng ah fur a vun luh july thla hrawng thawk in hngakchia zawtfah a tam. Cozah siizung a um ti lo caah private siizung a phan mi an tam. Chinram lei zong, July thla dongh hrawng khan Falam khuapi sang a um mi sang chung mi hna zong fak ngai in tlangrai in an rak zaw i sii-inn ah a um mi zong an um hna. Mino cu an ṭhawng deuh ko nain ngakchia le upa cu an celh hrim hna lo.
Hakha khuapi zong ah July thla in tlangrai in a zaw mi an tam ngai cang. Mizaw pakhat nih a chim ning ah, tutan an zawt ning cu 2020 lio covid rai bantuk in an hrawm a faak an tha a um lo, an lung a mit i rawl an duh lo, tiah theih a si. A cheu a zual deuh mi cu sii-inn ah an riahter hna. A cheu cu an i tlum ti lo caah sii din ding an pek hna. Hi bantuk hngakchia tlangrai cu Rosa Virus ruang ah khuacaan zulh in a chuak tawn mi a si.
Zawtkhamhnak sii (kakuaisii) a um lo i thihnak tiang a chuah pi kho tiah theih a si. Fur thla tlangrai (Flu) cu influenza virus ruang ah a chuak mi a si i fur caan July le August thla chuang ah a tambik. kan cuap, kan hnar, le kan or pawl ah fahnak a chuahter. Pakhat le pakhat i chawnh khawh mi zawtnak a si. Mizaw nih a zawt ni 1-5 tiang mi a chawnh khawh bik. Virus nih cuap a hrawh khawh caah thihnak tiang a chuah tertu zawtnak a si ve.
Zawtnak Muisam; Khuh, Cumpit, Hnaptawh, Lufah, Orfah, Taksafah, Thadih, Zeitik ah dah Sizung kal a herh? Khuh tik ah ṭang zawn fah, khak a chuah i a hrin ahcun cuap thaw chuah har, Lungmih, Tak linh 101 F cung si i sidin ko zong ah daih khawh lo tik ah, Zeitindah inn ah kan i thlop lai? Ti tam pi in din piak ding, Tha tein dinhpiak ding, Lufah le takfah damnak Tylenol tibantuk din piak ding, Sibawi nih Antiviral sii pek ahcun tha tein din ding, Zeitindah kan i ralrin lai?
Rai Khamsii (Flu Vaccine) fur luh lai June thla hramthawk le khuasik caan October thla luh lai te in sii i chunh cia ding. A zaw mi zohkhenh tik ah hmaikhuh (facemask) i hruk ding. Kut thiang tein I ṭawl lengmang ding. A zaw mi he pe 6 hlat ah um ding. A zaw mi nih tongh mi thil le eidinnak thiang tein virus a that khomi (Antiviral wipes) in thianh le tha tein ṭawl ding.
Kalaymyo Khuachung Ah SAC Kuttang Sianginn Saya 3 Tlaih An Tong. Kalaymyo khuachung ah SAC kuttang sianginn saya 3 cu August 7 le 8 ah Kalaymyo pengkomh mipi ralkap nih an tlaih hna tiah theih a si. August 7, zing sml 11:30am ah Kalay pengkomh mipi ralkap Urban Operation hruaitu le ralkap hna nih Taungphila sang um siangsangruun (High school No. 9) hlan No. 13 sianguk U San Tun Maung – High School Head Master le U Vum Suam Khai -Assistant Teacher, saya 2 cu an tlaih hna i, August 26 ah Kalaymyo peng palek (South) sakhaan ah an kuat hna. An pahnih in 52|(A) in tazacuai an tong.
Tlaih a tong mi Vum Suam Khai hringtu anu hi SAC kuttang sangsangruun High School no. 6 ah SAT sayamah rianṭuan lio mi a si i, a farnu pakhat zong SAC kuttang Komaing sianginn ah JAT sayamah rianṭuan lio mi a si tiah Kalay Township People’s Police (KPP) nih cathanhnak an tuah.
Kalaymyo peng Kyaukkar khua Sianglairuun Middle School Headmaster Mang Mang Khin zong SAC ralkap leiṭang tu tiah Kalaymyo pengkomh mipi ralkap nih August 8, zanlei 6:30pm ah an rak tlaih. Kyaukkar khua ah Middle School Head master a ṭuan lio mi Mang Mang Khin cu Kalaymyo khuachung Urban Operation UG lutlai a changtu nih Kalaymyo khuachung Taungphila sang a amah inn a um lio caan an theih i, mipi ralkap 7 he an va tlaih hi a si. Kyuakkar khua cu Kalaymyo thlanglei um khuate pakhat a si.
Tlaih a tonh mi saya 3 hna cu NUG kuttang a um mi, Kalaymyo biaceihnak zung ah a konglam ceihkhan ding in an tawlrel lio a si tiah Kalay Township People’s Police (KPP) nih August 31, 2023 ah ca thanh an chuah hi a si. Credit: The Chinland Post