Ralkap Tla Ding Ah Nu Cu Auh Kan Tim Rih Hna Lo — Zaw Min Thun.Ralkap thar laknak phunglam ning in nu pawl cu ralkap tlakter ding an si ko nain atu ah cun nunau pawl cu auh kan tim rih hna lo, tiah SAC chimnak nawlngei Major General Zaw Min Thun nih nizan February 20 ni ah a chim.
“Kum 2019 cazin ning ah zapi ralkap tlakternak(pyituhsit) phunglam he ralkap a tla kho mi nuai 13 an si i, cu chung ah pa nuai 6 leng le nu nuai 6 deng an i tel. Pa nuai 6 chung ah sang 6 hrawng cu kan auh khawh hna lai. Cun, ralkap tla ding in kan auh hna zong ah a chang chang tein kan auh hna lai i papek in riankhinh mi zong an um te lai,” tiah Zaw Min Thun nih cun a chim.
Myanmar ram mino dihlak cu hramhram in ralkap tlak dih ding ti mi Pyituhsit phunglam kan hman cang lai, tiah a luancia February 10 ni ah SAC nih an rak thanh hnu in Myanmar ram hmunkip ah mino tam ngai an tlaih cang hna.
Hramhram in SAC ralkap luhter ding ti mi phunglam kong ah pa cu kum 18-35 kar an si lai i, nu cu kum 18-27 an si lai. Fimcawnnak a ngei mi le thiamnak a ngei mi pa hna cu kum 18-45 an si lai i, nu cu kum 18-35 tiang an si lai, tiah SAC nih ri an khiah.
Phunglam zul duh lo in SAC ralkap tlak a duh lo mi cu kum 5 thong thlak in rianhrang ṭuanter an si lai. Atu bantukin ralkap tlak ding ti mi phunglam fehternak le a tak in ṭuanchuah khawh nakding ca ah SAC nih (Formation of Central Body for Summoning People’s Military Servant) ti mi phu zong a luancia February 13 ni ah fehter in an dirh cang.
SAC nih hramhram in SAC ralkap tlak ding ti mi phung a nunter ṭhan hnu in mino cheukhat cu thinphang in ramleng ah zaam an i tim hna nain NUG nih cun hi bantuk phunglam cu mipi nih zulh hrimhrim lo ding, tiah February 13 ni ah an thanh ve.