2023 Chung Ah Ralkap 5,000 Leng An Thi Tiah KNU Nih A Thanh. KNU nih a tlaihnak, Kawthoolei hmunhma ah kahdohnak voi 4,600 leng a cang i ralkap lei 5,000 leng an thi tiah KNU nih thawng an thanh.
Kumkhat chung a cang mi thil sining an thanh hi a si i ralkap lei kahdohnak ruang ah mipi 195 an thi, 661 an i hliam i 197 an tlaih hna tiah an ṭial.
Kawthoolei hmunhma ah a rak lut mi ralkap pawl cu KNLA, KNDO hruainak in dothlennak phu pawl nih sakhaan lak kahdohnak, hmaitonh kahdohnak, Ambush, kahdohnak hme, kahdohnak ngan le Drone kahdohnak tiah a zapi 4,623 nak tlawm lo an cang tiah an thanh.
Kahdohnak chung ah ralkap lei ralbawi pawl telh in ralkap 5,005 an thi i 3,345 an i hliam.Cun KNLA, KNDO le dothlennak phu lei 154 an nunnak a liam ve i 597 an i hliam tiah an thanh. Hramhram in uknak lak a si hnu thawk in tuni tiang Kawthoolei hmunhma ah innlo a zaamtak mi mung 751,669 an um tiah an thanh.
2023 chung ah ralkap lei nih hmunhma an tlaih khawh nakhnga nuhrin covo buarnak phun 18 nak tlawm lo a buar tiah an thanh fawn.Ralkap lei nih mipi cung ah vanlawng kahdohnak voi 791, hriamngan kahdohnak voi2,075, hriamhme kahdohnak voi 4, a ruang um lo in meithal kahnak voi 26, mipi umkalnak ah bomrap voi 40 a tunh tiah an thanh.
Cun mipi kha voi 2 paw-ṭa a suai hna, mipi kha tlaih le thahnak voi 55, hremnak voi 14, khamnak caah kalpi mi voi 3, mipi ngeih mi thilri hrawhnak voi 56, mipi innlo hrawnhnak voi 4, mipi inn thlok dih in thil firnak voi 3, mipi thilri hramhram in laknak voi 27, hramhram in rian fialnak voi 8, hramhram in ṭhialternak voi 1, tangka halnak voi 5, tlaih hnu ah tangka halnak voi 5 le tlerhkhawnnak voi 6 a tuah tiah an ṭial.
Ralkap nih biakinn 18, phungki sianginn 25, polo 1, sianginn 16, siikhan 2, sizung 5, mipi inn 91, dum 11 le inn 1,869 nak tlawm lo a hrawh tiah an langhter.Credit : The Chinland Post