SAC Vanlei Kahdohnak Ruang Ah Thla 4 Chung Ah Minung 72 An Thi!
===========
SAC ralkap vanlei kahdohnak ruang ah thla 4 chung ah mipi 72 an thi tiah Nyan Lin Thit Analytica phu nih thawng an thanh. Thla 4 chung ah SAC ralkap nih vanlei kahdohnak voi 272 a tuah ruang ah mipi 72 an thi i 163 an i hliam, biaknak lei inn 33, sianginn 17, siikhan 4 a rawk tiah theih a si.
Vanlei kahdohnak hi Karen ram ah voi 71, Sagaing ah voi 69, Chin ah voi 29, Karen ah voi 23, Kachin ah voi 22, Shan ram thlanglei ah voi 14, Shan ram chaklei ah voi 12, Bago ramṭhen ah voi 11, Magway ramṭhen ah voi 10, Mon ram ah voi 6, Taninthary ramṭhen ah voi 2, Mandalay ramṭhen ah voi 2 le Naypyitaw ah voi 1 a tuah.
2021 February in 2023 August tiang hramhram in uknak lak caan ni 942 chung ah vanlei kahdohnak hi ni 462 a tuah, kahdohnak hi voi 902 a tuah i mipi 687 an nunnak a liam, mipi 458 an i hliam. Cun SAC ralkap nih kumkhat hnu kumkhat vanlawng kahdohnak a tuah hi a karh chin.
2021 February in December tiang ah SAC ralkap nih vanlei kahdohnak voi 85 a tuah i mipi 63 an thi, 42 an i hliam. Biaknak lei inn 8, sianginn 7 le sizing/sikhaan 4 a rawk tiah theih a si.
2022 kumkhat chung ah SAC ralkap nih vanlei kahdohnak voi 339 a tuah i mipi 260 an thi, 85 an i hliam. Biaknak lei inn 20, sianginn 14 le sizung/siikhaan 7 a rawk.
2023 January in August thladongh tiang ni 245 chung ah SAC ralkap nih vanlei kahdohnak voi 478 a tuah i mipi 364 an thi, 331 an i hliam. Biaknak lei inn 58, sianginn 33, sizung/siikhaan 15 a rawk tiah theih a si.
Monywa Peng Ah SAC Ralkap Pawl An Kah Hna I 1 A Thi. Sagaing ramṭhen, Monywa peng, Tharsi khua pawng ah a um mi SAC ralkap pawl an kah hna i ralkap 1 a thi, meithal zuun 1 le kuanzen pawl an lak khawh tiah theih a si. October 23 zinglei sml 7:00am hrawng ah hriamngan ralkap 508 in Tharsi khua thonginn ah thazang chap ding in a kal mi SAC ralkap chung in hnulei ah a taang mi 3 cu PDF pawl nih an bawh i an kah hna caah 1 a thi, a tang mi 2 cu an zaam tiah theih a si.
A thi mi ralkap sin in MA-1 zuun 1, kuan 200 leng, Rifle bom 1, 60MM bom 1, kuanbawm 2, kuan khamnak 1, Equipment 1, phone 1 hna an lak khawh i a thi mi ralkap ruak zong an vui tiah theih a si. Kahdohnak chung ah Monywa pengkomh B27, C2, TLWDF phu le Moe Hein PDF hna bawm in kahdohnak an tuah tiah theih a si.
Kalaymyo Peng Ah Rithai Sii Kyat 3. 69 Billion Man An Tlaih. Kalaymyo peng, Nat Kyi Kone khua mi sin in October 18 ni ah kyat 3. 69 billion riihai sii an tlaih tiah theih a si. Mandalay in Kalaymyo lei panh in a rak kai mi motor an check nak ah kyat 3. 69 billion man sapiat bawm 3300 in Bing 33 kilio le rithai sii tlang sing 10. 2 a phor mi motor mawngtu le hnu zul tu telh in rithai sii he pehtlainak a ngei mi hna cu tlaih an si tiah mirror news nih a langhter.
Rithaisii tlaihmi pawl hi Shan ram in Sagaing ram panh in a phor tawn mi tlaih le upadi ning in a zizut an si hnu ah tlaih mi hna he aa pehtlai mi pawl cu zulhdawi hnu in tlaih ding tiah an langhter. SAC ralkap nih uknak a lak hnu ah Kalaymyo peng ah rithai sii a zuartu le a hmangtu an karh ngai. Kalaymyo peng GAD zungkip tlaitu penguk zungumnak Cargyi win pawng Buta celtual le khuachung mipi pangpar dum ah ralkap security an um ko buin rithai sii a tawng mi mino an um.
SAC ralkap zong nih zei an ti hna lo tiah khuachung mi sin in theih a si. Atu bantuk in Kalaymyo khuachung le khua te ah nikhat hnu nikhat rithai sii a tam chin caah inn pauh, thilfir, damiah bantuk mi thil chuh in a vak mi mino an tam ngai cang tiah Chin World sin in theih a si.
KIA Brigade 6 Hmunhma Bom An Thlak Ruang Ah KIA Chungtel 5 An Thi. Shan ram chaklei, Muse peng ah KIA Brigade 6 umnak cu October 20 ah SAC ralkap nih vanlawng in bom an thlak caah chungtel 5 an nunnak a liam tiah The Irrawaddy Burmese nih a langhter.
Muse pemg in meng 105 aa hlatnak, Tima khua ah hmunhma a khuar mi KIA Brigade 6 cu October 20 chun sml 2:00pm ah SAC ralkap nih Jet vanlawng pakhat in bom voi 2 a thlak. KIA chungtel 1 nih “KIA ralkap 5 an nunnak a liam. Vanlawng in bom a rak thlak. Jet Fighting in a rak thlak caah aa hliam mi an tam” tiah The Irrawaddy Burmese ah a chim. SAC leiṭhang Telegram Channel pawl nih cun KIA nih ralkap sakhaan an rak doh caah vanlawng in an lehrulh ve hna tiah an langhter.
October 19 ah Tuluk-Myanmar ramri, Muse pengkomh, Monpaw hmunhma ah a um mi SAC ralkap sakhaan pakhat cu KIA Brigade 6 kuttang Battalion 36 nih an lak hnu a thaizing ah atu bantuk in bom an thlak hna hi a si. Cu sakhaan lak kahdohnak ah SAC ralkap lei 20 leng an thi i hriam tampi an lak khawh tiah an rak langhter. Credit: The Chinland Post