Mingin Peng Ah SAC Ralkap Tilawng Aa Let I SAC Ti Ralkap 5 Le Pyusawhti Chungkhar Telh In Minung 100 Leng An Thi!
==========
Sagaing ramṭhen, Mingin peng Chindwin tiva ah SAC ralkap tilawng pakhat aa let i Director 1, SAC ti ralkap 5, pyusawhti chungkhar, Non-CDM cawnpiaktu le siangngakchia telh in minung 100 leng an thi, tiah Students’ Revolution Force(SRF) in ṭuanvo ngeitu pakhat nih Khit Thit Media ah a chim.
September 19 zing suimilam 10:00 hrawngah Mingin peng, Panset khua in a chuak mi lungvar hring phortu SAC ralkap tilawng 12 lakah pakhat cu aa let i, SAC ralkap, pyusawhti le lungvar hring hna zong ti chung ah an pil dih, tiah theih a si.
Tilawng aa leh ruangah hin minung 100 leng hrawng an thih pinah Hriamngan zun 20 hrawng le lungvar hring Tons 100 hrawng ti chung ah an pil dih. Tilawng lehnak ah Taungphyu khua pyusawhti hruaitu Naing Win Zaw le nu pakhat lawng an luat i pyusawhti hruaitu pa cu a ban kiah buin sii-inn a phan, tiah theih a si. SAC ralkap tilawng run nih hin Chindwin tiva kam ah a ummi tualchung mi innlo cu an kah hna i, cu an kah lio ah cun tilawng pakhat cu aa let i ti chung ah a pil, tiah theih a si.
Chindwin Tiva Khualtlawng Phurtu Tilawng Cansualnak In Minung 100 Naak Tlawmlo An Tlau. September 19, zing suimilam 9:00 tluk ah Sagaing ramṭhen MyinKin peng Maukkataw khua le Pann Satt khua karlak Chindwin tiva ah khualtlawng phurtu tilawng oakhat cansualnak a ton caah khualtlawng minung 100 tluk an tlau tiah theih asi.
Tilawng pilnak hmun ah hin cuhlan zongah tii a ṭum caan paoh ah harsatnak anrak ton pengnak hmun asi i tilawng hi tii nih a lehter caah apil mi si tiah tilawng pilnak khua ah a ummi tualchungmi pakhat nih a chim. Khualtlawng mi tamdeuh cu Kanteenal lei in a ram deuhmi ansi hna. Khualtlawng hna hi Motor lam venhimnak (security) a tamtuk caah a tu bantuk in tlawnglawng an i thimnak hi asi tiah an langhter.
Tilawng cansualnak in khualtlawng a tlaumi hna hi sianginn cachimtu rianhal dingin akal mi, ramdang ah rianṭuan dingin kal aa timmi, ngakchia, thilri le cozah rianṭuantu tampi hna zong an i telchih an dihlak in minung 100 naak tlawmlo cu ansi lai tiah an langhter. Sagaing ramṭhen cozah hruaitu hna nih tilawng cansualnak hmun ah hin bawnchantu ding le a tlaumi kawltu dingah minung tampi an thlah hna tiah theih asi.
Pale Peng Ni 2 Chung Kahdohnak Ah SAC Ralhrang 3 An Thi Meithal 1 Le Tilawng 1 An Lak. Sagaing ramṭhen Pale peng ni 2 chung mipi hriamtlaiphu le SAC ralhrang karlak kahdohnak in ralhrang 3 an thi meithal 1 le cawleng 1 an lak tiah Royal Eagle PDF chungin ṭuanvo ngeitu pakhat nih a chim.
September 12, Pale peng rallamsial in a rak chuakmi SAC ralhrang thazaang 100 tluk cu Ingyinsu khua Pale mipi hriamtlaiphu le ṭangṭi phufonh nih rak bawh in ankah hna tiah theih asi. Cu bantuk ṭhiam in September 13, zing suimilam 8:30 tluk ah Pale InMaHti sakhan ah tirawl chan in arak kirmi SAC ralhrang le Pyusawhti cu InMaHti khua le Supokekone khua karlak ah Yinmarbin battalion 7 Royal Eagle PDF ankah hna caah ralhrang 2 an thi 1 a ke aa tan 2 hliamfak antuar tiah theih asi.
InMaHti khua lei ah arak kirmi ralhrang cu zanlei suimilam 5:10 tluk ah mipi hriamtlai ṭangi phufonh nih ankah han hna i Pyusawhti ralhrang 1 a thi meithal 1 le kiam 48, cawleng 1 anlak tiah an langhter chih.
Kyaikto SAC Ralhrang Umnak Hmun Mipi Hriamtlaiphu Nih An Kah 5 An Thi. Mon ramkulh Kyaikto khuapi ah a ummi SAC ralhrang cu mipi hriamtlaiphu nih ankah caah minung 5 an thi tiah TawGyikan mipi hriamtlaiphu chungin ṭuanvo ngeitu pakhat nih a chim.
September 19, zing suimilam 9:00 tluk ah Kyaikto khuapi Yangon-Mawlamyine motor lampi pawng check-gate ralhrang umnak cu mipi hriamtlaiphu nih an kah hna tiah theih asi. Kahdohnak hmun ah aa telmi mipi hriamtlaiphu fonh hna cu TawGyiKan battalion 2 le KNU/KNLA ṭangṭi phufonh ansi tiah an langhter.
Lashio Ah Bomb Puahkehbak A Chuak Minung 1 Nunnak Liam. September 19, zanlei suimilam 5:00 tluk ah Lashio khuapi chung motor lam cungah bomb puahkenhnak a chuak minung 1 nunnak liam hliamtuarmi zong anum tiah Lashio tualchungmi pakhat nih a chim.
SAC Ralhrang Pakhat Sniper Meithal He PDF Sin Ah Aa Fon. SAC ralhrang tat-mah (44) kut tang khah-mah-yah (9) in ralhrang Saw Thet Naing Tun cu Sniper meithal zunkhat he Kawkareik peng PDF Battalion 338 sin ah aa fonh. PDF sin ah a rak i fonh mi Saw Thet Naing Tun nih Sniper meithal zunkhat le kuan 50 a rak i chuahpi caah lawmman Thailand ram tangka Baht sing 1 (Myanmar kyats 5,000,000 renglo)an pek tiah theih a si.