SAC Caah Ramdang Tangka Kawl A Bawmtu Myanma Oil And Gas Enterprise Cu US Nih Sanction Dantatnak A Tuah
=========
SAC caah ramdang tangka a kawlhawl piak ngai mi Myanma Oil and Gas Enterprise MOGE cu US ram nih tangka lei Sanction dantat phihkharnak a tuah tiah phungning tein thawngthanhnak an tuah. MOGE dantatnak a tuahna hi SAC nih Myanmar ram mipi thahnawm ding ah hriamnam a cawknak lam phihkhar khanh a si. Cun SAC he pehtlaihnak a ngei mi minung 5 le company 3 zong sipuazi phihkhar dantatnak cu a ra lai mi December 15 ah thawk a si lai tiah US ram nih thawngthanhnak a tuah hi a si.
“MOGE cu Canada, Britain le US ram hna komh in dantatnak an tuah i Myanmar SAC ralkap nih mipi cung ah sualnak thahnawmnak tampi a tuah mi pehzulh in a tuah khawh ti lo nakhnga hmalaknak a si” tiah US ram tangka lei tlai tuanvo ngei tu Brain E. Nelson nih a chim. SAC ralkap nih a herh mi hriamnam cawknak le ralkap he pehtlaihnak a ngei mi Sky Royal Hero Company Limited, Sittaingaung Company chungtel Suntac Technologies Limited, Suntac International Trading ompany Limited tiah Company lian 3 dantat an si.
Cun, SAC lutlai lei in Joint Chief of Staff (Army, Navy, Air Force General Maung Maung Aye, Minister Ministry of Industry Minister Charlie Than, Ministry of Investment and Foreign Economic Relations – Minister Kan Zaw, Ministry of Justice Director Shwe Shwe Aung, Ministry of Home Affaire – Prison lei Director Zaw Min hna Sanction an pek hna tiah VOA Burmese nih chim.
Myanmar ram ah SAC ralhrang cu nuhrin covo nawl buarnak pehzulh in a tuah peng ruang ah ralhrang Council chungtel upa 2, Aung Kyaw Min, Porel Aungthein, ralkap lei Lieutenant General Kyaw Swa Lin – Commander of the Bureau of Special Operations, Union Ministers for Immigration and Population (လ၀က) Minister Myint Kyaing hna cu 2021 kum July 2 ah US Union Ministry of Finance of Finance lei nih Sanction an rak tuah cang, Union Health and Sports Minister Thet Khine Win zong 2022 kum, January 31 ah US Union Ministry of Finance lei nih Sanction an rak tuah, Union Ministry of Labour Minister Pwint San hna cu EU nih Sanction an rak tuah hna.
European Union lei nih SAC ralkap bawi 99, le an rianṭuannak phun 19 a zizut sanction an rak tuah bal cang. Hriamnam he aa pehtlai mi paoh zuar le raldoh training cawnṭinak zong dinh ter si cang tiah European Union nih thawngthanhnak a rak tuah cang mi hna an si.
US, UK Le Canada Nih SAC Tangka Hmuhnak Hrampi MOGE Cu Dantat Phihkharnak An Tuah. SAC nih kum 1 ah US dollar a billion leng an hmuhnak Myanma Oil and Gas Enterprise (MOGE) cu October 31, nihin ah dantat phihkharnak kan tuah cang tiah U.S. Treasury Department nih an thanh. Cu an thanh mi ah December 15 thawk in US ramchung tangka lei rianṭuannak vialte nih MOGE he pethlai in zeihmanh pehtlaihnak ngeih lo ding ti a si.
US nih MOGE dantat phihkharnak a tuah mi zulh in UK le Canada zong nih MOGE cu dantat phihkharnak an tuah colh ve. U.S. Secretary of State Antony Blinken nih cun “Atu bantukin MOGE dantatnak kan tuah mi nih SAC nih tangka an hmuhnak lam tampi a phih lai i hriamnam le vanlawng ti (fuel) cawknak ah harnak an tong lai” tiah a chim.
Tukum June thla ah US nih SAC kuttang bank pahnih Myanmar Foreign Trade Bank (MFTB) le Myanma Investment and Commercial Bank (MICB) dantatnak a tuah nih SAC cash ramdang tangka hmuhnak tampi a rak hnorsuan cang. Tutan i US, UK le Canada nih MOGE dantatnak an tuah mi hi cu hmual a ngei chinchin lai tiah zumh a si.
SAC Lei Tang Pyituhsit Pawl MNDAA Sin Ah A Sungpek In Hriamnam He An Rak Lut. SAC kuttang um Kokang khua um pyituhsit minung 15 cu a sungpek in MNDAA ah hriamnam meithal zuun 16 he an rak lut tiah theih a si. MNDAA lei biachimnak nawl ngei Ly Kyarwen nih, “mah operation 1027 kahdohnak ni 5 a rau hnu ah SAC lei battalion a ningpi a sungpek in a rak lut mi ralkap an um bantuk in Pyituhsit lei zong a sungpek in a lut mi zong an um. Kanmah MNDAA lei nih SAC ralkap le pyituhsit pawl a sungpek in an rak lut ding in cathanh chuah a si” tiah a chim.
October 30 ni, Khun Lung peng thlanglei um, Ka Maing hrambunh battalion 143 bu ralkap minung 41 nih unau hawikom phu 3 sin ah hriamnam he an rak luh, ralkap 41 ah Second-in- Command 1 telh in rawlbawi တပ်ခွဲမှူး (Company Commander 2) zong an i tel. MNDAA sin a rak lut mi mi SAC ralkap 41 cu minung pakhat ah umkalnak tangka kyat sing 15 cio in sing 700 leng an pek hna. Nihin SAC hi battalion pakhat ah ralkap minung 100 hrawng lawng an tang cang. Mah lak ah battalion a chuahtak mi, nifa tein a tli mi le a thi mi an um peng tiah kokang MNDAA nih cathanh a chuah.
Tuluk-Myanmar Ramri Ah Tuluk Ralkap Nih A Thazang A Langhter. Tuluk le Myanmar ramri aa pehnak in Tuluk ramri chung ah Tuluk ralkap nih Tank pawl in an thazang an langhter tiah Khit Thit nih a tial. October 31 ah Muse he aa pehnak Tuluk lei hrap ah Tank pawl, ralkap mawtaw pawl in thazang an langhter i himnak an la tiah theih a si.
“Tuluk ram chung ah Myanmar lei in SAC ralkap nih an kah mi hriamngan a tlak caah, Tank pawl, hriam tling tein ralkap pawl thazang an langhter. Himnak la in timhcia tein kan um ti kha an langhter mi a lo. Anmah ram lei ah hriamngan a tlak than cun kah ve ding dirhmun khi an lo” tiah Muse khuami nih Khit Thit ah a chim.
SAC Ralkap Battalion 1 A Ning Pi In MNDAA Sin Ah A Sung An Pek. Unau hawikom phu sin ah SAC ralkap LIB 143 chungtel an zapi nih hriam chiah in a sung an pek tiah The Kokang nih November 1 zinglei ah thawng a thanh. Kunlong peng, Kanmine hmunhma ah hram a bunh mi SAC ralkap LIB 143 in ralkap 41 cu unau hawikom phu sin ah a sung an pek hi a si. Hriam chiah in a sung a pe mi LIB 143 chungtel 41 chung ah Second Battalion Commander 1, Company Commander 2 an i tel tiah theih a si.
October 30 ah MNDAA sin ah LIB 143 nih hriam chiah in a sung pek hi a si i an hriam le kahdohnak thilri vialte cu sakhaan ah an kaltak tiah theih a si. Hriam chiah in a sung a pe mi ralkap 41 cu minung pakhat ah sing 15 in (sing 700) leng umkalnak caah an pek hna i himnak hmun ah an kuat hna tiah theih a si.