Laung Lon Peng, Kahdohnak Ah SAC Ralhrang 15 Naak Tlawmlo An Thi, Mipi Ralkap 1 Nunnak Liam!
=========
Tanintharyi ramṭhen, Laung Lon peng chung kahdohnak ah SAC ralhrang 15 renglo an thi, mipi ralkap 1 nunnak liam tiah Laung Lon peng PDF chungin ṭuanvo ngeitu pakhat nih Yangon Khit Thit ah a chim. November 9, zing suimilaam 9:00 tluk khan Laung Lon peng, Pyingyi khua, Phungki sianginn ah rallamsialin a rami SAC ralhrang thazaang 60 tluk cu Kayingyi khua, Phungki sianginn luhnak pawng an phak ah mipi ralkap luhhnawh in an kah hna, ralhrang 15 renglo an thi tiah theih a si.
Kahdohnak in mipi ralkap hnu an kir hnu ah, an hnu in rak dawitu hna SAC ralhrang cu mipi ralkap bomb hmenhmi nih a puahhnawh hna caah hliamtuar an tam, mipi ralkap minung 1 nunnak liam bomb 79 le Pistol 1 a tlau tiah an langhter. Kahdohnak ah aa telmi mipi ralkap phufonh hna cu, Ba Htoo column (LLPDF/DGRF-ṭetkhuai 4/ YPPDF) le Laung Lon peng PDF-LLPD ṭangṭi phufonh hna ansi, tiah an langhter.
Laukkai Ralhrial Tualchung Mipi Cu, SAC Ralhrang Nih An Kah Hna. Shan ramkulh, Chaklei Laukkai khuapi chuahnak pawng in SAC ralhrang nih ralhrial tualchung mipi cu hriamngan le hriamhme he an kah hna caah anzaam minung 5 nunnak liam, hliamhmapu mi zong anum tiah ralhrial mipi nih Yangon Khit Thit ah an chim.
November 11, chun suimilaam 12;00 tluk khan Laukkai peng SAC ralhrang rallamsialmi nih, tualchung mipi ralhrial hna umnak hmunhma cu hriamngan le hriamhme he an kah hna caah mipi hna cu hmunhimnak kawl in anzaam hna tiah theih a si.
“Kahdohnak le hriamngan hriamhme thawng nih a kan kulh dih, kan zaamnak hmun paoh hi tinh buin an kah ruah tiah kan zumh, ralhrial mipi lak in 5 an nunnak liam cang hliamtuar zong anum” tiah ralhrial tualchungmi pakhat nih a chim.
Mindat Khuapi Pawng Khuate Hna Cu SAC Ralhrang Nih Duhpaoh In Hriamngan An Kah. 2023, November 11 ah Chin ramkulh, Mindat khuapi pawng, Khuate hna le Mindat-Matupi lampi lei cu SAC ralhrang nih 274 battalion SAC nu pawl cu 120 MM hriamngan kah training an pek hna i voi 10 renglo duhpaoh in an kah, tiah theih a si.
“Mindat khua pawngkam khuate pawl cu duhpaoh in an kah hna. Zeiruang ah an kah hna timi cu theih a si lo. Cu hlan zong ah atu bantuk in an kah leng mang. Thinlung lei damlonak a ngeimi hna le mizaw pawl caah cun a ṭha lo ngaingai. Zan ah hriamngan puak thawng kan theih ahcun kan i hngilh kho ti lo” tiah Mindat khuapi tualchung mi pakhat nih a chim.
SAC ralhrang nih atu bantuk in duhpaoh in an kahmi hriamngan ruang ah nunnak liammi, hliamhma tuarmi le innlo rawk mi kong ah thawngfiang kan theikho rih lo. Duhpaoh in hriamngan an kah lengmang ruang ah innlo rawkmi zong a tam cang i, mipi nunnak liammi zong an tlawm ti lo, tiah a chim chap.
Mindat peng ah SAC ralhrang nih November thla chung ah cunglei le hriamngan pawl duhpaoh in an kah mi ruang ah mipi inn 18, biaknak lei he aa pehtlaimi inn 6 le sianginn 2 a rawk, tiah theih a si.
Kalaywa PDF Hna Cu SAC Ralhrang Nih A Thlite In An Kah Hna Ca Ah Nunnak Liammi An Tam. Sagaing ramṭhen, Kalaywa peng chung um taulchung PDF hna cu November 9, zanlei sang ah SAC ralhrang nih a thlite in an kah hna ruang ah nunnak liammi an tam, tiah theih a si.
“Kahdohnak ruang ah an nunnak a liam timi thawng cu a dik ko. SAC ralhrang nihcun PDF 28 an thi tiin thawng an thanh. Kahdohnak ah aa telmi mipi ralkap (PDF) hna he pehtlaihnak kan tuah kho rih lo caah thawngfiang kan thei kho rih lo” tiah Kalay peng PDF in ṭuanvo ngeitu pakhat nih The Rihli Voice ah a chim.
SAC ralhrang thawngzamhnak Fifty Two Telegram nih Kalaywa peng, Sinaingma khua pawng kahdohnak ah a thimi PDF pawl ruak 28 le hriamthil phun 25 an laak nakkong cu an langhter. “Aluan ciami ni 3 hrawng khan Kalaywa in meng 20 tluk hrawng aa hlatnak Aungchanthar khua lei ah ralbawmtu an thlah mi hna SAC ralhrang cu PDF ṭangṭi phu hna nih kahdoh ding in an bawh hna timi thawng an theih caah atu bantuk in hi thil a cannak hi a si” tiah Kalaywa peng PDF in ṭuanvo ngeitu pakhat nih a chim.