Muse Peng SAC Ralhrang Sahan 1 Cu TNLA, MNDAA Le AA Nih An Laak Ṭhan; SAC Sakhan Pawl Laak Dih Dingin Thawng An Thanh
=========
Shan ramkulh chaklei Muse peng um SAC ralhrang sakhan 1 cu chaklei hriamtlai ṭangṭi phu 3 fonh simi Myanmar National Democratic Alliance Army(MNDAA), Ta’ang National Liberation Army(TNLA) le Arakan Army(AA) hna nih an laak chap, tiah kan theih.
October 27, zing in Shan ramkulh chaklei um SAC ralhrang sakhan pawl cu nitlak lei hriamtlai ṭangṭi phu 3 fonh hna nih sakhan laak dih ding in kahdohnak hram an thok i chun suimilam 3:40 tluk ah Muse peng Panghsang khua um ralhrang sakhan 1 zong kan laak khawh chih caah mei in kan khangh piak hna, tiah an langhter chih. Hi kahdohnak hna ah TNLA, MNDAA le AA ralkap hna pinah Kachin ralkap KIA zong an i tel hna i Kachin holh zong theih chih a si tiin kahdohnak thawngla tu hna nih an chimmi hecun People’s Spring nih a langhter.
Chaklei hriamtlai phu 3 fonh hna nih hin 2023, October 27 ningani ah Operation 1027 an thanh i mah ni lila ah Chin Shwe Haw khuapi cu an laak khawh pinah SAC ralhrang sakhan 10 hrawng an lakchih khawh, tiah thawngthanhnak an tuah.
Mah pinah October 27, zinglei suimilam 5:00 tluk in kahdohnak an thawk i Kyaukme, Kutkai, Muse, Lashio, Namkham, Nawnghkio le Chin Shwe Haw i SAC ralhrang sakhan a biapi deuh hna cu an laak khawh hi a si. Chin Shwe Haw hlei, Hopan, Kunlong le Mong Koe hna zong an laak chih i SAC ralhrang le palik thimi an tam ngai, tiah an langhter chih.
SAC ralhrang nih tanglei in ralbawmtu a thlah hna pinah cunglei in kahdohnak zong a tuah chih. Chin Shwe Haw khuapi ah MNDAA nih an thantar (flag) an taar cang i SAC ralhrang sakhan dang hna zong laak dingin kan kahdoh rih lai, tiah chaklei hriamtlai ṭangṭi phu 3 fonh hna nih thawng an thanh mi in kan theih.
Chinshwehaw Um Hpawngseik Sakhan, Khaihriat Dum SAC Sakhan Pi Le Khuapi Luhnak Gate Pawl Dihlak Mipi Ralkap Hna Nih An Laak. Shan ramkulh chaklei Chinshwehaw um Khaihriat dum SAC ralhrang sakhan pi, Hpawngseik sakhan le khuapi luhchuahnak gate dihlak hna cu mipi ralkap hna nih an laak khawh dih cang, tiah Chinshwehaw khuapi tualchung mi hna nih an chim.
“Khuapi chung ahcun Kokang ralkap nih hmunhma an laak dih. Tuzing tiang ahcun kahdohnak a um pah nain atu cu a dai cang. Khuapi chung mipi cheukhat hna cu Wa ramkulh lei ah an zaam hna i kalnak nawl zong an pek ko hna nain aa hrengmi mipi cheukhat zong an um rih. Chinshwehaw hleidonh a rawk caah tlunkalnak caah harsatnak tam ngai a um” tiah tualchung mi pakhat nih a chim.
Mah bantuk ṭhiam in Shan ramkulh chaklei, Special region 1 le Laukkaing peng um SAC ralhrang pawl cu an hram in bongh ding ah kan doh cang hna lai tiah Myanmar National Democratic Alliance Army (MNDAA) nih thawng an thanh.
Shan ramkulh chaklei special region 1 chung ah a ummi SAC ralhrang pawl cu an hram in bongh ding, Laukkaing peng ah online in mi a hlengtu hna zong fimhlawm ding, online in mi a hlengmi Company pawl a bawmtu ralhrang pawl zong kham ding ah Lashio-Chinshewhaw, Lashio-Muse pyidaungsu lampi cu nihin October 27 zing suimilam 6:00 in kan kham cang.
Mi zeipaoh kan khammi lam cung in nan kal a si ahcun kan in kah hna lai , tiah phungning tein an thawng thanh. October 26 in 27 zinglei tiang kahdohnak ah MNDAA nih SAC ralhrang an tlaihmi an um leng ah hriamthil le zenkuan tamngai zong an laak khawh chih, tiah an langhter chih. Credit: Lungmili Post