Namkham Peng SAC Ralkap Sakhan Pathum Cu TNLA Nih An Laak, SAC Ralkap Ruak 18 Le Zen-kuan Tam Lak An Char
=======
Shan ramkulh, Namkham peng um SAC ralkap sakhan pathum cu TNLA nih kan kah i kan laak khawh, tiah Palaung State Liberation Front, Ta’ang National Liberation Army(PSLF/TNLA) nih an thanh.
October 27 zinglei suimilam 4:00 hrawngah TNLA Brigade 1 military region, Namkham peng um Namkham-Namhpat motor lam meng 13 SAC ralkap sakhan, meng 12 sakhan le Manmai ralkap sakhan cu PSLF/TNLA nih an kah.
Cu ṭhiamṭhiam in TNLA Brigade 6 military region, Lashio peng Maikyiat SAC ralkap sakhan le Ṭeinṭan sakhan zong October 27 zing suimilam 5:20 hrawngah PSLF/TNLA nih an kah rih, tiah theih a si.
SAC ralkap nih Jet Fighter in voi 7, Mi- 35 raltuknak Helicopter in voi 5 le 120/105 hriamngan in voi 12 cu kahdohnak hmun lei ah an kah, tiah TNLA nih an langhter.
Cu kahdohnak ah cun SAC ralkap ruak 18, M16 zun 3, Ngakyinmi zun 1, MA 4 zun 2, MA3 zun 11, 60mm zun 2, pistol zun 1, kutcheh bomb lung 200, M9 lung 7, RPG lung 50, 60mm bomb lung 30, 60mm kuan lung 100, hmanhmi bomb lung 4, meithal kuan 10,000 leng le a dangdang thilri tampi zong TNLA nih an laak, tiah theih a si.
KNU Brigade 6 Hmunram Um SAC Ralkap 6 Le Palik Sergeant 1 Cu KNU Sin Ah An Zaam. Karen ramkulh, KNU Brigade 6 hmunram Khah Mah Yah 432 le Sah Ah Yah 918 in SAC ralkap 6 le palik sergeant 1 cu KNU sinah an zaam, tiah theih a si. KNU Brigade 6 ah a zaammi hi Sah Ah Yah 918 in sergeant Zeyar Aung, Khah Mah Yah 432 in ralkap Thant Zin Phyu, Kaung Thiha, Chit Po, San Phyu, Wana Kyaw le palik sergeant Htun Htun an si, tiah theih a si.
Sergeant Zeyar Aung nih cun, “Mizapi rungveng ding kan si lioah anmah tu harnak kan pek hna caah SAC ralkap chung um kan duh hrimhrim ti lo. Tuan deuh in zaam kan duh ko nain caan rem a um lo caah atu lawng kan zaam kho. A luancia thla ah Kwelone lei ah bawmtu ralkap an rak kal lioah caan rem a um i zan i hngilh karah kan 6 ningin kan rak zaam,” tiah a chim.
SAC ralkap chung ah lungrualnak a rawk tuk cang. A ruang cu a thimi an tam cang leng ah hliamhma pumi zong an tam. A zaammi hrim zong hi an tam cang, tiah KNU sinah a zaammi SAC ralkap nih an chim. Mizapi lei a ṭangmi SAC ralkap hna cu Pyituh Yinkhun le Pyituh Pandaing phu nih tangka an pek hna i umnak innlo zong an sersiampiak hna, tiah theih a si.
Lasho Le Kyaukme Ah Tualchung Mi 1000 Leng Ral An Zaam. Shanram chaklei ah SAC ralkap le ṭangṭi phu kar kahdohnak fak a chuah ruang ah tualchung mi 1000 leng cu Lasho le Kyaukme khua ah ral an zaam, tiah mi bawmchantu phu chungtel pakhat nih a chim. Lasho peng in Konethar le Narphy khua ah kahdohnak a fah ruang ah Lasho khuachung Mansu sianginn ah tualchung mi 800 leng ralzaam in an i dor.
Khuachung luh aa harh deuhmi zong kan bawmhchanh cuahmah lio hna a si, ral a hung zaam mi hna chung in caan saupi a zaw cangmi le nau ngeika nunau hna zong an i tel, tiah Lasho khuami nih an chim. Kyaukme peng chung kahdohnak ruang ah Kyington, Naungpit, Kwayangone khua in ralzaam 300 leng cu Kyaukme in meng 90 tluk a hlatnak Naungpein khua ah ral an zaam hna.
October 27 ah Shanram chaklei Lasho, Naungcho, Kyaukme, Kuatkhine, Namkhan, Muse, Kamlon, Monko le Koekant hnunram hna ah SAC ralkap le ṭangṭi phu kar fak ngaiin kadohnak a chuah caah tualchung mi cu khua chuahtak in a him deuhnak hmun ah ral an zaam hna, tiah theih a si.
Depayin Ah Rallam Sialmi SAC Ralkap Nih Tualchung Mi 5 An Lu An Tan Hna. Sagaing ramṭhen, Depayin peng chung i rallam a sialmi SAC ralkap nih tualchung mi 5 cu an lu an tan hna i an ruak an khangh, midang 9 cu ralphaw ah an hman hna, tiah tualchung hriamtlai phu in ṭuanvo ngei Ko Kyiphyu nih Khit Thit Media ah a chim.
October 27 ni ah Depayin peng chung i rallam a sialmi SAC ralkap nih Thimba le Shantaw khua lei ah tualchung mi 5 cu an lu an tan hna, an kutke an tan hnu ah an khangh hna. Kanlam khuami 9 cu ralphaw ah an hman hna i nihin tiang an thlah hna lo, tiah theih a si.
Depayin peng chung ah SAC ralkap cu October 18 in rallam sial an i thawk i October 27 tiang ah khua 30 in mipi a sang cu ral an zaam hna, tiah theih a si. Depayin peng chung ralzaam mi hna nih facang, chiti le mehhang an herh tuk caah mipi nih kutsamh in bawmhnak pe cio hna usih, tiah Depayin peng tualchung hriamtlai phu nih nawlnak an tuah.