Tedim Peng Taingen Khua SAC Ralkap Sakhan In Ralkap Pakhat CDF Civic Defense Militia – Siyin Sin Ah Aa Fonh!
=========
Chin ramkulh, Tedim peng Taingen khua SAC ralkap sakhan in ralkap pakhat cu CDF CMD Siyin ah aa fonh, tiah CDF CDM Siyin nih nihin October 22 ah an thanh. CDF CDM Siyin sin ah aa fonhmi ralkap Sai Zaw Htet cu SAC ralkap khah-lah-yah 269 in pumpak no. tah/54552, Taingen sakhan ah a um liomi a si i CDF CDM Siyin ṭuanvo ngeitu hna nih a himnak hmun ah um ding in an tawlrelpiak, tiah theih a si.
Hi hnu pinlei zong ah mipi sin fonh duhnak thinlung a ngeimi hna cu a caan um liote ah rak i fon u, aho nan si paoh ah CDF CDM Siyin nih lunglawm tein kan in don ko hna. Hriamnam he mipi sin ah a rak i fonhmi hna cu laksawng ah tangka Kyats sing 50 nak tam kan in pek hna lai, tiah CDF CDM Siyin nih an thanhmi ah cun an langhter.
A luancia September thla chung ah nitlak chaklei SAC headquater no.930 in commander pakhat zong CDF CDM Siyin sin ah a rak i fonh bal cang. SAC ralkap chung in CDF CDM Siyin sin ah aa fonhmi 10 leng an si cang, tiah theih a si.
October 20, khan Chin ramkulh, Tidim peng Taingen khua SAC ralhrang sakhan in ralhrang pakhat CDF CDM Siyin ah a rak lut tiah CDF Civis Defense militia -CDM -Siyin nih an langhter. SAC ralhrang mipi hriamtlaiphu sin ah aa fon mi pa cu, mipi hriamtlaiphu CDF nih lunglawm te le an sin ah hna ngam te ṭhut dir khawh dingin an lawmh tiah theih asi.
A caan lio te ah mipi hriamtlaiphu sin a fonmi SAC ralhrang pa hi, CDF CDM Siyin nih lunglawm te in an cohlan pinah hriamthil zeimzawzat le tangkak a tlawm bik sing 50 kan pek lai tiah CDF Civic Defense Militia – CDM -Siyin mipi hriamtlaiphu nih an langhter.
Kalaymyo, Tahan Ah SAC Ralkap Pawl Cu Mipi Umnak Inn Le Dawr Hna Ah Lut In Tangka Sing 15 Leng An Chuh Hna. Kalaymyo, Tahan (G group) sang ah SAC ralkap pawl cu October 20 ah mipi umnak inn le dawr hna ah lut in dawr pakhat ah tangka sing 15 leng an chuh hna, tiah theih a si.
SAC ralkap pawl cu October 20 chunlaipi ah mipi umnak inn le dawr kip ah an lut. Tahan (G group) dawr pathum hna ah an lut an chuak, dawr hngaktu hna cu an khuk an bilter hna i phone 3 le tangka sing 15 in sing 20 kar hrawng an chuh hna, tiah tualchung mi pakhat nih a chim.
Tahan sang pakhat YCW sianginn pawngkam hrawng ah SAC ralkap nih meithal zun tam ngai an puah, ngakchia pakhat zong meithal in an hmuahchih, tiah theih a si. Kalaymyo, Tahan sang chung ah SAC ralkap pawl cu nifatin ti tluk in mipi umnak inn le dawr hna ah a ruang um lo in an lut tawn, tiah Zalen nih a ṭial.
Mokot Peng SAC Ralhrang Le Mipi Hriamtlaiphu Karlak Kahdohnak Ah ralhrang 2 An Thi. Mandalay ramṭhen, Mokot peng SAc ralhrang le mipi hriamtlaiphu TNLA karlak kahdohnak ah ralhrang lei in 2 an thi tiah PSLF/TNLA nih an langhter.
October 20, zing suimilam 11:00 in zaanlei suimilam 2:00 tluk tiang khan SAC ralhrang phu ṭhen 44th ၊ tanglei ralkap battalion 102 le 104 rallamsialmi hna cu Mokot peng Nyaungkone khua pawngah PSLF/TNLA he an i kap tiah theih asi.
Kahdohnak hmun ah SAC ralhrang nih Nyaungkone khua le Phyuyaung khua ah RPG – 7 60 MM hriamngan in voi 35 ankah, kahdohnak hmunhma ah SAC ralhrang 2 an thi 4 nih hliamfak an tuar tiah theih asi. Cupin ah Shan ramkulh Muse peng Tima khua pawngah le Lweimauktaung hna cu kahdohnak umlo in SAC ralhrang nih jet fighter 2 hmangin bomb an thlak tiah theih asi.
Yaw-Ngan Khua Ah Bomb Puahhnawhnak In Ralhrang Palik bawi Myo Myin Tu A Thi 3 Nih Hliam An tuar. Shan ramkulh, Yaw-Ngan peng ah bomb puahhnawhnak in ralhrang palik bawi Myo Myin Tu a thi midang 3 nih hliam an tuar tiah theih asi.
October 21, zing suimilam 8:00 tluk khan Taunggyi pengkomh Gyi Soe Than nih uk hruai mi SAC ralhrang palik motor 5 he arak chuak mi hna cu Yaw-Ngan peng Tapinpyaw khua pawng an phak zinglei suimilam 9:00 tluk ah mipi hriamtlaiphu PDF nih bomb an puahhnawh hna tiah theih asi.
Bomb puahhnawhnak in Taunggyi pengkomh palik bawi Myo Myin Tu le a kuttang mi Soe Myin Htue, A Ka Aung, le December Ko Ko hliam an tuar, culak ah ralhrang palik bawi Myo Myin Tu cu Yaw-Ngan khuapi sii-inn ah hliamfak in a thi tiah theih asi.