Kanaung Operation Ah SAC Ralbawi 4 Telh In 80 An Thi!
============
Mandalay PDF le TNLA hna bawm in an tuah mi Kanaung Operation ah SAC ralbawi 4 telh in SAC lei 80 an thi i hriam le kuanzen tampi zong an lak khawh tiah Mandalay PDF nih thawng an thanh. Mandalay PDF nih 2023 July thawk in “Kanaung Operation” min in TNLA he bawm in kahdohnak an tuah, July 15 in September 10 tiang ah kahdohnak voi 9, Drone Operation 8 an tuah khawh tiah theih a si.
Kahdohnak pawl chung ah SAC lei Captain 2, Platoon Leader 1, Second Battalion Commander, ralkap 76 tiah an zapi 80 an thi tiah an langhter. Mandalay PDF nih an thawk mi Kanaung Operation hi a dih rih lo i Brigade 99, Brigade 101 kuttang LIB 252, LIB 257, le MOC 1 kuttang IB 502 thazang 400 hrawng he kahdohnak a um peng rih tiah theih a si. Kahdohnak chung ah mipi hriamtlai 1 nih ram le miphun caah a nunnak a pek tiah Mandalay PDF nih an langhter.
Yangon-Mandalay Lampi 162 Mile SAC Seikphyutaung Kahdohnak Ah Ralhrang Lei 15 An Thi. Amyainglam ti mi Yangon –Mandalay lampi 162 mile SAC Seikphyutaung sakhaan cu PDF nih an kah hna i ralhrang lei 15 an thi tiah Bago Region PDF hruaitu pakhat sin in theih a si.
“3501 Operation a si. Ralhrang lei 15 an thi tiah thawng theih a si. Kanmah lei zong in hnatlakpinak kan tuah lio a si” tiah Bago Region PDF lei hruaitu nih People’s Spring sin ah a chim.
Ralkap 20 an umnak Seikphyutaung sakhaan cu PDF Taungoo pengkomh battalion 3501, Nitlak Yoma lei 16 le khua pawngkam PDF he fonh in September 9, zing sml 4:00am ah an kahnak hna kong cu Bago ram PDF lei nih cathanh an chuah.
SAC ralkap 15 a thi mi chung in an rianṭuanning-rank pawl cu hlathlai lio a si tiah an chim. Seikphyutaung sakhaan cu Bago ramṭhen, Taungoo peng lampi 162 mile ah a um mi a si. Mah sakhaan kahnak ah minute 30 hrawng a rau tiah theih a si.
PDF lei in a zuarhma tuk lo hliamtuar 2 an um, sakhaan lak khawh nak ding in timhtuah a si nain kuan/zen nih a deih ti hna lo caah hnu an kir ṭhannak zong Bago ram PDF lei nih an langhter.
Seikphyutaung sakhaan kahdohnak a tuah mi hna hi Naypitaw, Lewe peng PDF an si kho ko tiah SAC leiṭang mi hna nih an Telegram ah an ṭial.
SAC Ralhrang Nih Ramchung Ah Sualnak Ngeilo Mipi 4,070 Leng An Thah Hna. SAC ralhrang nih ramchung ah sualnak ngei lo mipi 4,070 leng an thah cang hna. Myanmar ram ah hramhram in uknak lak a si hnu kum 2 leng chung ah SAC ralkap nih sualnak ngei lo mipi 4,070 a thah cang hna i a tlaih a tong mi minung 247,451 tiang an um cang tiah Assistance Association for Political Prisoners (AAPP) nih a thanh.
Atu cazin hi 2021 February 1 in 2023 September 11 tiang AAPP nih a khawmhsuat mi a si i khawmhsuat khawh mi leng ah a thi mi an tampi rih lai tiah a langhter. Pau Dothlennak chung, tuni tiang ah minung 19,458 an tlaih cang hna i cu chung ah minung 7,310 cu thongthlak ding in biakhiah an si tiah DVB nih a langhter.
Dothlennak he pehtlai in an tlaih/hren hna i thah ding tiah bia an khiah mi 103 an um i hriawh in thah ding tiah biak an khiah mi 43 telh in minung 119 cu hriawh in thah ding tiah biakhiah an si caah thah ding tiah biakhiah a si mi an zapi te 146 an si cang. Atutiang ah biakamnak he a thlah ṭhan cang mi hna 5,293 an um cang tiah a langhter.
Myanmar Le Russia Zinan Cawknak Ah Ramhnih Tangka Hmang Kho Ding In Timhtuahnak An Ngei. Myanmar le Russia ramhnih karlak zinan cawknak ah Myanmar tangka kyat, Russia tangka Rubel hmang kho ding in ramhnih hnatlaknak cu a rauh hlan ah minthutnak tuah a si lai tiah SAC ramdang sipuazi pehtlainak Union Minister for Ministry of Transport and Communication Minister Dr Kan Zaw nih a chim.
Russia ram Vladivostok khua ah The 8th Eastern Economic Forum 2023 tonpumhnak ah aa tel mi Dr Kan Zaw nih forum lenglei a um lio ah Russia hrambunh Sputnik Media ah a chim tiah RFA Burmese nih a ṭial. Tu lio SAC nih Russia ram zinan a cawknak ah Tuluk Yuan tangka a hmannak kong zong Dr Kan Zaw nih a chim chip.
A luan cia 2022 Eastern Economic forum ah SAC bawizik Min Aung Hlaing nih Russia ram in zinan cawk a sinak kong Sputnik media ah a rak chim bal. Tu kum Eastern Economic forum hi Russia ram, Vladivostok khua ah September 10 in 13 tiang ni 4 chung an tuah lai. Mah forum ah SAC Ministry of Industry Minister Dr. Charlie Than zong nih Forum tuah lio ah ramhnih tangka hmannak ramhnih hnatlaknak minthut ding in timhtuahnak a um tiah a chim. Credit: The Chinland Post