Ralhrang Pawl Zual An Ko Kho Tilo!
===========
Raltuk tikah zual ko khawh lo hi a har bik lio can a si. Ralhrang pawl ralram ah a um mi nih hliam kan tuar, riahcaw a dih, kan tha a dih, tiah cunglei zual an ko hna. Inn hngak pawl hi tar/ nu le hngakchia lawng an tang cang caah an bawmh kho ti hna lo. Cucaah ralram ah a um mi ralkap pawl an lung a dong i, an zam thluahmah. Culawng siloin khi tluk sakhan tha an ser mi zong khi meithal tlompal va puah hnawh hmanah an ven huam tilo i, an zam tak thluahmah.
Cuhlan ah kan thazaang dihlak chuah in an sakhan kan kah i kan lak khawh lo mi kha a tu ahcun fawi tein an lak khawh cang. Fawi tein sakhan an lak khawh mi khi, an acunglei zual an ko khawh lo i an lung a dongh caah a si.
Lungdongh nih a hrin mi cu; sungnak hi a si. American ralkap nih Aghannistan an chuah tak tikah Afghannistan ralkap pawl an lung a dong i ral an kap ngam tilo. Cucaah Taliban hriamtlai nih meithal tam hmanh puah loin Afghannistan hi fawi tein an lak khawhnak hi a si. Afghannistan Cozah nih a ralkap pawl hi kap hna u, tiin order a pek len hna nain an lung a dongh caah an kap ngam ti hna lo. Raktuk tikah a cunglei nih tuah u, ‘timi tuah duh lo hi sunghnak hrampi cu a si.
Atulio ralhrang pawl thazaang an neih chunmi cu; Western Command, Rakhine ram ah a chiah mi hna lawng hi a si. Rakhine ram ah a chiah mi hna ‘tatmah’ 3′ hi a lak hna i hmundang a hman hna caah Rakhine ram um Western Command zong hi an thazaang a zor ngai. Rakhine ram ahhin meithal a puak than men lai, ‘tihi chimh khawh a si lo. AA biachim tu Khine Tuh Khah nih BBC ah a chim mi cu ralhrang pawl nih Rakhine mipi nih tih hna seh ‘tiah meithal an puak lengmang.
An tuahser nak zohchunh in lehrulhnak kan tuah teh lai ‘a ti. Raltuknak lei a dothlet mi cheukhat an chimhnak ah AA hi a hawi kawm a si mi hna, MNDAA le TNLA hna nih an ram an uk khawh bantuk in a ram hi uk khawh zau aa zuam teh lai ti hi an zumh ning a si. Khelkhat in kan chim ahcun MNDAA le TNLA nak thazaang a thawng deuh mi AA nih hin a ram chung in ralhrang pawl hi a dawi hrim hna lai ‘ti hi zumh cio a si.
Dr, Thun Myint nih DVB ah a chimh mi cu; naitan Russia tilawng Kawlram a phak mi kha AA tlernak caah a si, ‘tiah a chimh. MAH nihhin a tihtuk mi cu;Rakhine ram ah meithal a puak sual lai ‘ti hi a si. Cucaah naitan Naypyidaw meeting ah MNDAA le TNLA hi lehrulh ding bia a chim i, AA hi a chimh lonak kha a si. AA hi caan lak in timhlamhnak tha tein a neih mi an si.
Rakhine ram ah meithal a puak ahcun kan rili lei in ralhrang nih an lampi ah an hman khawh, ti hi an theih caah Kachin ram le Sagaing ram le Chin ram lei hi kan meithal le zenkuan laknak lampi ah kan hman lai, ti hi an kal pi mi si dawh in a lang. Cucaah AA nih Sagaing ram ah Sakhan an chiah i Sagaing PDF pawl he ral an tuk ti mi hi a si.ti hi zumh a um ngai. Khelkhat in kan chim ah AA nih Sagaing ram in ral an va tuk mi khi an lampi onh nak ding ah lam an va sial mi a si khawh men, ti hi zumh a um ngai.
Zei a si hman ah atu lio hi ralhrang pawl hmaikal nih a cunglei zual an ko khawh tilo. Zual ko khawh ding an neih chun mi cu; Rakhine ram um ralkap lawng hi an si, Nain AA le ralhrang pawl hi thaizing maw? kip tu dah? timi dirhmun an si caah Rakhine ram um ralhrang pawl hi zual ko va bawmh ding ah hman awk an tha tilo. Zual an ko khawh tilo mi nihhin teinak lam kan naih cang’ ti hi tet te cu a si. Credit: Van Neih Thang