Sami Khuachung Ah Tlaih A Tongmi Tualchung Mi 4 Cu Ni Khat Hnu Ah An Thlah Ṭhan Hna
==========
A luancia November 4, zinglei ah CNA le SAC ralkap kaphnih kar kahdohnak a chuah hnu ah Paletwa peng Hiwa khuami 4 hna cu SAC ralkap nih an umnak inn ah an tlaih hna i ni khat hnu ah an thlah ṭhan hna, tiah theih a si. Tlaih a tongmi Hiwa khuami 4 cu; U Aung Nan, U Man Kha, U Tet Lin Aung le U Sein Hla hna an si i November 9 lioah Sami sakhan ah an rak kalpi hna, tiah tualchung mi pakhat a chim.
November 4 lioah Sami khua Bawa sang chung ah sakhan in a rak lawimi SAC ralkap pawl cu CNA nih a kah hna i 4 an thi, cu hnu ah kaphnih kar fak ngaiin kahdohnak a chuak i CNA nih meithal pakhat an laak khawh. Tlaih a tongmi tualchung mi 4 cu SAC ralkap nih CNA sin ah meithal laak an fial hna, tiah an chim. Kaphnih kar fak ngaiin kahdohnak a rak chuah ruang ah Bawa sang mi nausem pom lio nu pakhat zong meithal nih a rak hliam i Sittwe siizung ah an rak kalpi, tiah theih a si.
Kawlin Ah Ramkhel Tongtla 60 Leng An Chanhchuah Khawh Hna Tiah NUG Nih An Thanh. Kawlin khuapi cu tualchung hriamtlai ṭangṭi phu nih November 6 ah an rak laak i Myoma palik thonginn ah ramkhel thongtla 63 zong an chanhchuah khawh hna, tiah NUG nih nizan November 10 ah an thanh.
Kawlin khua Myoma palik thonginn ah thongtla 98 an um i 63 cu ramkhel thongtla an si. Ramkhel thongtla 63 cu Kawlin pengkomh hruaitu, pengkomh mipi ukhruainak phu le ramṭhen mipi hriamtlai phu in ṭuanvo ngei hna nih November 10 ah tonnak an ngeih hna i minung pakhat ah Ks 50,000 cio bawmhnak an pek hna, tiah an thanh. An chanhchuahmi thongtla 98 chung ah ramkhel thongtla a si lomi cu chekhlatnak an tuah hna hnu ah phunglam he aa tlakning in ṭuanvo an laak hna lainak kong cu NUG nih an chim.
Kawlin khuachung ah kaphnih kar kahdohnak a um ti lo nain khua chuahtak in a zaammi cheukhat cu atu tiang khuachung ah an rak kir kho rih lo, khuapi laak kahdoh lioah tualchung mi 50,000 tluk deng nih khua an rak chuahtak, tiah tualchung mi pakhat nih RFA ah a chim.
NUG tang ummi KIA telh in PDF ṭangṭi phu hna nih Kawlin khuapi cu November 3-6 tiang, ni 4 chung an kah, SAC ralkap nih vanlawng hmang in kahdohnak an tuah ruang ah tualchung mi 10 an rak thi.
Kawlin khuapi cu NUG nih an uk cangnak kong he pehtlai in SAC nih thanhnak an tuah lo caah Sagaing ramṭhen SAC chimphuannak nawlngei Minister of Ethnic Affairs U Sai Naingnaing Kyaw cu RFA nih an pehtlaih nain lehnak a tuah hna lo.
Laukkaing Khuachung Ah Aa Hrengmi Vietnam Ram Mi 100 Leng Nih Bawmhhal Lamzawhnak An Tuah. Shan ramkulh chaklei, Laukkaing khuachung kahdohnak ruang ah aa hrengmi Vietnam ram mi 100 leng nih bawmhhalnak ah lam an zawh, tiah tualchung mi pakhat nih Khit Thit Media sin ah a chim.
Nizan November 10, chun ah Vietnam ram mi 100 leng cu Laukkaing khuachung kahdohnak ruang ah i hreng in umnak le ei awk an ngeih ti lo caah rak “kan bawmchan u” timi cataar i ken in lamzawhnak an tuah, tiah theih a si.
“Vietnam miphun pawl hi rianṭuan ding in a rami an si nain rian ngeitu an pule nih an zaamtak dih hna i, Laukkaing ah i hreng in umnak le ei awk ngei lo in an um ruang ah cataar an ṭialpiakmi hna cu i put in Laukkaing khuachung ah bawmh an hal,” tiah tualchung mi pakhat nih a chim.
Chaklei hriamtlai phu unau thum nih Laukkaing khua kan laak lai tiah an thanh hnu in Laukkaing khua pawngkam ah kahdohnak a fak chin lengmang i Laukkaing khua chuahtak in a zaam mi Myanmar ram mi 1,000 leng zong Pasinkyaw khua pawng ah an i hreng, tiah theih a si.