SAC Nih Uknak An Laak Hnu Ah NLD Party Chungtel 2000 Hrawng An Tlaih Hna
===========
SAC ralkap nih uknak an laak kum hnih le cheu chung ah hlutdaw palai hna telh in NLD party chungtel 1910 tlaih an tong, tiang HRDT NLD nih cathanh an chuah. Cu chung ah minung 1269 cu hren an si rih tiah nihin, September 27 ah tuahmi NLD party dirhcam kum 35 tlin caan hmannak ah HRDT NLD nih an langhter.
Hren lio mi NLD party chungtel 1269 chung ah hlutdaw palai 73 an i tel. Tlaihkhih a tongmi party chungtel hna hi pa 1077 le nu 192 ah an si. “SAC nih mizapi ruahchannak vialte an hrawh bantuk in NLD party zong hrawk ding in timh ciammam tein an kan doh” tiin NLD party central committee chungtel Dr. Khin Saung nih a chim.
Ram pumpi ah NLD party zung hna cu voi 160 tiang an kah i an hrawh. Hlutdaw palai 182 telh in party chungtel 372 hna umnak inn le dumhau hmun 390, an ngeihmi rian 64 le motor 16 cu an chuhpiak hna. Cu pinah hlutdaw palai pathum telh in party chungtel 100 thah an tong, tiah HRDT NLD nih an thanh.
Chaung U Ah SAC Ralkap Nih Vanlawng In Kahdohnak An Tuah Ruangah Minung 9 Nunnak A Liam! Sagaing ramṭhen, Chaung U peng Minte, Minkhaung le Makyihkua khua hna cu SAC ralkap nih September 26 chunhnu ah raltuknak vanlawng in a kah i, PDF ralkap 3 le tualchung mi 6 nunnak a liam, hliamhma fak a pu mi zong an um, tiah tualchung mi nih an chim.
Tutan SAC ralkap nih vanlawng in kahdohnak a tuahnak khua hi Chaung U le Pakokku motor lampi kam um khua an si. SAC ralkap hna cu helicopter 4 in an zuang i, cu chung ah pakhat nih kahdohnak a tuah, a dang 3 nih SAC ralkap 70 renglo a ṭhumh hna, tiah tualchung mi nih an chim.
“SAC ralkap nih vanlawng in kahdohnak an tuah ruang ah, nihin September 27 zinglei tiang ah char rih lo mi ruak hi 15 in 20 tluk tiang hrawng an um rih, cu chung ah tualchung mi 6 hi kan fehter khawhmi a si,” tiah tualchungmi pakhat nih a chim. Helicopter 3 nih a ṭhumh mi ralkap hna nih nizaan September 26 zaan ah innkip an luhhnawh i thilri an thlokpiak hna, nihin September 27 tiang ah khuachung in an chuak rih lo, tiah a chimchap.
Mandalay Ramṭhen, Ngazun Peng Ah Kut Hriṭem Buin Thah Mi Ruak Hnih Hmuh A Si. Mandalay ramṭhen, Tada U pengkomh, Ngazun peng Pauksein khua, Myotha-Myinchain kalnak lampi ah, nihin zinglei ah kut ṭem buin thahmi ruak pahnih kan hmuh, tiah tualchung mi bawmchantu phu nih an chim.
“Nihin September 26, zinglei suimilam 8:30 ah ruak hi kan hmuh. Thah a tongmi hna hi Myinchain peng, Nabuai khuami changreu tuahtu pafa an si i an pahnih in an kut hnulei ah hriṭem buin an ruak hmuh a si,” tiah khuachung bawmhchanhnak rianṭuantu pakhat nih a chim.
Cu thilcang kong he pehtlai in Tada U pengkomh humhimnak latu phu hna he naihniam in ummi pakhat nih cun, “thah a tongmi hna hi Myinchain peng Nabuai khuami U Maung Hla(kum 57) le a fapa U Thein Wai Oo(kum 38) an si i, anmah hi changreu tuahmi mi sawhsawh an si. Aho si theih lomi 10 hrawng nih an kut hnulei hriṭem in an kah hna, hi thil a tuahtu hi hlathlainak tuahcuahmah lio a si” tiah a chim.
SAC Ralbawi Ngan Pathum Cu SAC Chungtel Sinak In An Chuah Cang Hna! SAC nih Lieutenant General Moe Myint Htun le Lieutenant General Soe Htut cu SAC chungtel sinnak in kan chuah hna i Soe Htut cu SAC zung Minister rank zong in kan chuah cang, tiah zahan September 25 zan ah SAC nih cathanh an chuah.
Sepbember 25 zan suimilam 8:00 ah SAC nih an thanh ning in, SAC Council chungtel ralbawi ngan pahnih cu kan chuah cang hna. Cu pinah Minister For Home Affairs Lieutenant General Soe Htut zong a rank in kan chuah i ral lei kong a rak tlaih mi rank ah kan ṭhumh ṭhan, tiah an langhter.
Cu pinah dollar man a kaitertu le eihmuar ruangah dantat a tongmi SAC Deputy Minister of Economy and Commerce Ngunt Aung zong a rank in an chuah. SAC Election Commission chungtel pa zong Council in an chuah i Minister of Economy and Commerce Aung Naing Oo cu SAC Minister zung pakhat ah rian an khinh i, Htun Ung cu Minister of Economy and Commerce ah an thim. Credit: The Chin Post