SAC Ralkap Nih Hriamngan Kah Ruangah Loklung Khua Inn Thum A Rawk
=========
Chin ramkulh, Hakha khuapi um SAC ralkap nih hriamngan duh poh in an kah ruangah Loklung khua inn thum a rawk i, tualchung mi pakhat hliam a tuar, tiah theih a si. “Zahan August 13 zan suimilam 11:00 hrawngah SAC ralkap nih Hakha peng, Loklung khua cu hriamngan in an kah. Hriamngan kahnak in inn 3 a rawh pinah tualchung mi pakhat zong a lu ah hliamhma a pu,” tiah min langhter a duh lomi pakhat nih The Chin Post ah a chim.
A ruang um loin SAC ralkap nih hriamngan an kahmi hi cihmih an kan timh caah a si. Sualnak ngei lo tualchung mi umnak ah hriamngan an kahmi a tlawm ti lo. Naite zong ah Falam peng Ramthlo le Sunthla khua ah Fighter le hriamngan in an kah cang. Fihnung tukmi sualnak a tuahtu ralkap hna hi zeitik hmanh ah kan ngaithiam kho hna lai lo, tiah a chim chap.
“A luancia ni tlawmpal ah palik sakhan in palik pakhat le rungtlang um SAC ralkap pakhat cu CDM kan tuah lai tiin an chuak i Loklung khua ah an kal. Cu hnuah CDM tuah loin an kir ṭhan hnu, zahan August 13 zan suimilam 11:00 hrawngah SAC ralkap nih hriamngan in voithum tiang Loklung khua cu an kah,” tiah tualchung mi pakhat nih The Chin Post ah a chim ve.
SAC ralkap nih hriamngan an kah ruangah a rawkmi Loklung khua inn thum cu khuami hna nih an zuanhnawh hna i nihin August 14 ah an remhpiak ṭhan hna, tiah theih a si. SAC ralkap nih Loklung khua hriamngan kahnak kong he pehtlai in SAC ralkap nih thanhnak zeihmanh an tuah lo bantukin CDF-Hakha nih thanhnak an tuahmi a um rih lo, tiah theih a si.
Thantlang Kahdohnak Ah Chin Ralkap Nih SAC Ralkap Pahnih An Tlaih Hna. Tuzing August 14 zinglei suimilam 5:10 in Thantlang ah Chin ralkap le SAC ralkap kar kahdohnak a chuak. SAC lei nih Jet Fighter in an bawmh hna caah Chin ralkap lei nih an kirtaak hna. Kahdohnak ah SAC ralkap pahnih cu Chin ralkap nih an tlaih hna i, meithal zuun ruk zong an laak, tiah theih a si.
August 14 zinglei ah Thantlang peng Khuafo khua ah SAC ralhrang Jet Fighter nih Bomb a thlak than caah Baptist biakinn le inn cheukhat an rawk. Thantlang khuachung zongah kahdohnak fak ngai a chuak tiah theih a si i hikong he pehtlai in Lungmili Post nih nih Chin ralkap tuanvo ngeitu kan pehtlaih hna lio a si. Aluan cia March ni 30 zinglei ah Khuafo khua cu SAC ralhrang nih Bomb a rak thlak caah khua mi 8 an nunnak a liam i hliamhma tuarmi zong an um pin ah inn cheukhat hna zong an rak rawk.
Lai lungrawn Khuafo te aw, Khuachia rual nih an in hliam than hoi mu…Biakinn rumro an ralmi nih hin Pastor lung a kan kuai ter khun hme cu. Biakinn teah rak I dor chung ne uh law, tiawk zong a that lo. maw ka thin.
Chin ramkulh khuapi Hakha Khusilobo tlangpar in SAC ralkap nih hriamngan voi tam ngai an kah, tiah theih a si. Tuzing hriamngan an kahmi lakah a thawng a thang ngaimi Jet Fighter thawng bantukin a zuangmi zong a um, tiah min langhter a duh lomi pakhat nih The Chin Post ah a chim.
“Nihin August 14 deika in SAC ralkap nih hriamngan voi tam tuk an kah caah inn zuat saṭil hna zong nidang bantuk kel in an um lo. Hriamngan thawng voi tam tuk a than caah an lau ve. Inn zuat saṭil cu chim lo, cheukhat ngakchia tete zong hriamngan thawng an theih paoh ah an ṭap,” tiah tualchung mi pakhat nih The Chin Post ah a chim ve.
Khusilobo tlang um SAC ralkap nih hriamngan an kahmi hi khoika lei ah dah an kah ti cu fiang in hngalh a si lo. Falam peng, Ramthlo khua lei kap a ummi hna zong nih hriamngan zuan thawng le tlak thawng kan thei lo an ti i, Thantlang lei kap ah an kah, tiah zumh a si. August 12 ah SAC ralkap Jet Fighter nih Ramthlo khua cu bomb in a thlak ruangah khuami pa 2 le nu 5 hliamhma an tuar. Nufa hna cu an hliamhma an fah ngai caah sii-inn an phan, tiah theih a si. Credit: The Chin Post, Lungmili Media