SAC Ralhrang Nih CDF Ralkap 2 Telh In Minung 4 An Tlaih Hna I CDF-Paletwa Ralkap 1 Cu A Zaam Kho
=========
Chin ramkulh, Paletwa peng, Sami khuapi hrambunh No.2 Byuha sakhan in a zaam mi SAC ralhrang pawl nih CDF ralkap 2 le tualchung mi 2 (An dihlak minung 4) an tlaih hna i CDF-Paletwa ralkap 1 cu a zaam kho, tiah theih a si.
Sami pengchung ah Chin ralkap CNA, CDF-Paletwa le CDF-Matupi ṭangṭi phu hna in thazaang 200 tluk nih a zaam mi SAC ralhrang pawl cu an kahdoh hna i ralhnu sakhan hngaktu CDF ralkap 2 le tualchung mi 2 cu SAC ralhrang pawl nih an tlaih hna hnu January 20 ah tualchung mi 2 cu an thlah ṭhan hna i, CDF ralkap 2 tu cu hri in an ṭem hna i an kalpi hna.
2024, January 21 ah Matupi peng, Santet khua le Lungpan khua karlak ah Chin ralkap CNA, CDF-Paletwa, CDF-Matupi le CDF-Daai ṭangṭi phu hna nih an kahdoh ṭhan hna caah SAC ralhrang 10nak tlawm lo an thi i hliam pumi zong an tam ca ah Wapung khuapawng hmun pakhat ah January 23 zan ah CDF-Paletwa ralkap Salai Lun Thang cu a zaam kho, tiah theih a si.
“Kahdohnak ruang ah hliam pumi SAC ralhrang pawl an tam i an bat ngai caah zaan an ih kar ah an ṭemnak hri aa phoih khawh i, a zaam kho. Amah he an tlaih ṭimi minung 1 tu cu SAC ralhrang pawl kut ah a um ko rih” tiah a zaam kho mi chungkhar hna he naihniam pakhat nih Zalen ah a chim. A zaam kho mi CDF ralkap Salai Lun Thang cu Walanpi khuami hna nih an don i thlacamnak puai an tuahpiak hnu ah a chungkhar umnak hmun Paletwa peng, Ayemarkone khua ah an thlah.
Taingen Khua Ah Chinmi 1 Nih Bomb Aa Lamhsual Ca Ah A Ke Khatlei An Tanpiak! Chinramkulh, Tedim peng, Taingen khua ah Chinmi 1 nih January 26 ah Bomb aa lamhsual caah hliamhma faaktuk a tuar i, a ke khatlei an tanpiak, tiah theih a si.
Bomb lamhsualnak in hliamfaak a tuarmi Pu Lai Pi (Kum 40) cu Chin ralkap CNA le ṭangṭi phu hna nih an laak mi Taingen khua um SAC ralhrang sakhan a va zoh lio ah SAC ralhrang nih an hmanh mi bomb aa lamhsual hi a si, tiah tualchung mi hna nih an chim.
“Tualchung mi hna nih mah sakhan cu an rak zoh ngai hna i ralrinnak kan peek ngai hna. Sakhan kulhnak hauhruang leng ah SAC ralhrang nih an hmanh mi Bomb pawl a um kho rih mi a si caah hauhruang lonh in zoh lo ding ah kan chimh hna. Anih cu hauhruang a va lonh caah atu bantuk in Bomb aa lamhsual hi a si” tiah min langhter a duh lo mi pakhat nih a chim. CDF CDM Siyin nih Taingen khua um SAC ralhrang sakhan pawngkam hna cu Bomb thianhliamnak an tuah lio a si, tiah theih a si.
Monywa Peng, Nyaunghpyupin Palik Sakhan Luhhnawh In An Kah Caah Ralhrang 5 An Thi. Sagaing ramṭhen, Monywa peng, Nyaunghpyupin SAC ralhrang kuttang palik sakhan cu mipi ralkap nih luhhnawh in an kah caah ralhrang 5 an thi, tiah Monywa pengkomh battalion 4 Chindwin Attack Force sin in kan theih.
January 24, zing suimilam 4:00 tluk ah Monywa peng, Nyaunghpyupin SAC ralhrang kuttang palik sakhan cu mipi ralkap phufonh nih phu 3 ah ṭhen in an luhhnawh hna i an kah hna, sakhan an laak dih hlan deuh ah Tawpupyu khua in ralkap thazaang an chap caah hnu an tolh ṭhan, tiah theih a si.
Nyaunghpyupin sakhan kahdohnak ah SAC ralhrang 5 an thi, 7 nih hliam an tuar, mipi ralkap hliamtuar umlo in hnu an kir tiah an langhter. Kahdohnak ah aa telmi mipi ralkap phufonh hna cu Monywa pengkomh battalion 4 special forces (Monywa The Boys), Ṭetkhuai 1 Spring Dove PDF, Monywa battalion 4, ṭetkhuai 2/3/4 le 96 Soldiers – PDF ṭangṭi phufonh dang hna an si.