Shweku, Kyaukgyi Khua SAC Ralkap le Palek Sakhaan Kahdohnak Ah SAC Ralkap 5 An Thi!
==========
Kachin ram, Shweku peng, Kyaukgyi khua ah hmunhma a khuar mi SAC ralkap Brigade 88 kuttang LIB 77 sakhaan le palek sakhaan cu a thli tein an kah hna i SAC ralkap 5 an thi, 6 an i hliam tiah K-PDF nih thawng an thanh. September 1 zinglei sml 3:00am ah an va kah hna i sml 3 leng kahdohnak a rauh hnu ah SAC nih vanlawng in kahdoh a rak bawmh hna caah sakhaan la kho lo in an kir ṭhan tiah theih a si.
Kahdohnak ruang SAC ralkap LIB 77 chung ah a um mi pawl nih sakhaan an zaamtak i khamnak ṭha tein an cawh cang nak palek sakhaan ah an i fonh tiah an langhter. Kahdohnak chung ah SAC ralkap 1 a nung in an tlaih khawh i MA-1 zuunkhat telh in hriam le kuan tampi an lak khawh tiah theih a si.
Shweku, Kyaukgyi Khua SAC Ralkap le Palek Sakhaan Kahdohnak Ah SAC Ralkap 5 An Thi. Kachin ram, Shweku peng, Kyaukgyi khua ah hmunhma a khuar mi SAC ralkap Brigade 88 kuttang LIB 77 sakhaan le palek sakhaan cu a thli tein an kah hna i SAC ralkap 5 an thi, 6 an i hliam tiah K-PDF nih thawng an thanh.
KNDF Byu-Ha 2 Raltuk Cawnnak Cu Tlamtling Tein An Lim. KNDF Byu-ha (2) nih raltuk cawnnak le biakamnak cu August 29 ah KNDF B02 ah an tuah khawh tiah thawng an thanh. KNDF B02, B12, B14, B17 hna an i telnak Byu-ha batch (2) raltuk cawnnak le biakamnak cu August 17 ah an tuah tiah theih a si. Cu raltuk cawnnak a dih ni biakamnak ah KNDF Battalion Commander pawl, KA rianngeitu pawl le upa pawl an i tel kho tiah theih a si.
Khin U Peng Ah SAC Ralkap An Kah Hna, 4 An Thi. Sagaing ramṭhen, Khin U peng, Khin U khua le Kanthayar khua karlak ah thazang 100 hrawng SAC ralkap pawl an kah hna i 4 an thi tiah MRDA phu nih thawng an thanh.
August 30 zaanlei sml 5:00pm hrawng ah Monywa khua SAC ralkap battalion in Khin U lei ah ke in a kal mi SAC ralkap pawl cu Khin U khua le Kanthayar khua karlak ah an kah hna i mins 40 tluk kahdohnak a rauh hnu ah SAC ralkap 4 an thi, 9 an i hliam tiah theih a si. Kahdohnak chung ah MRDA Satan phu hruainak in RTGF, Khin U peng mipi himnak phu hna an i bawm tiah theih a si.
Okpho Khuate Ah SAC Ralkap Captain Tin Myo Aung An Kah. Bago ramṭhen, Okpho peng, Ayemyathayar khuathar ah riankhinh a si mi SAC ralkap Captain Tin Myo Aung cu an kah i a hmun ah a thi, a meithal zuun 1 le adang thilri pawl zong an lak khawh tiah Baho Region PDF sin in thawng theih a si.
August 31 zinglei sml 10:40am hrawng ah mipi thuam in cycle aa rak cit mi Captain Tin Myo Aung cu meithal in an kah i a hmun ah a thi, MA-3 zuun 1, phone 1, phiasa bawm 1, a hmatphungṭin hna an lak tiah theih a si. Captain Tin Myo Aung kahnak hi Thayarwady pengkomh PDF phu nih an tuah mi a si tiah theih a si.
Myaing Peng Nagani Mipi Ralkap Bawi Bo Yat Khah A Mah Tein Aa That. Magwe ramthen, Myaing peng, mipi ralkap Nagani bu hruaitu Bo Yat Khah cu amah tein Pistol meithal in a lu ah aa kap i a thi tiah tiah theih a si.
Bo Yat Khah hi hriamnam man tangka leiba pek ding a ngeih ruang ah lungretheihnak in a khat I atu bantuk in amah le a mah aa kah hi a si ko tiah a ralkap cheukhat nih a chim tiah People’s Spring media nih a chim.
“Thawngpang theih cu lung a fak ko, Myaing peng ah PDF hruaitu pakhat cu hriamnam leiba tangka pek ding a harh ruang ah amah tein a lu ah pistol meithal in a kah. Cheukhat cu motor ṭhaṭha cit le inn ṭha mi chung ah nuam tein a um mi dohthlennak mirum pawl an um pah lio ah mah bantuk thawngpang theih cu lung a fak ko. Hmailei chan nunnak hei nung ṭhan sehlaw Myanmar ram ah minung si ṭhan ti lo ding ka duh ko” tiah Kyathitnat ralkap Myaing bu in Ko Meses nih a facebook ah a ṭial.
KNU Brigade 6 Hmunhma i Ohkayithta Sakhaan Kahdohnak Ah SAC Ralkap 5 An Thi. Karen ram, Myawaddy peng, Ohkayithta peng, KNU Brigade 6 hmunhma ah a um mi SAC ralkap Ohkayithta sakhaan an kah hna i SAC ralkap 5 an thi tiah Cobra Column 2 VENOM nih an thanh.
August 31 zinglei sml 6:00am hrawng ah Brigade 6 hmunhma ah a um mi SAC ralkap Ohkayithta sakhaan cu VENOM phu nih 60MM le Sniper bawm in an kah hna i SAC ralkap 2 an thi tiah theih a si.
SAC ralkap lei zong nih 40MM in an kah ṭhan ve hna nain VENOM phu lei an him tiah theih a si. August 31 zaan sml 7:30pm hrawng ah KNDO phufonh he RPG in an kah ṭhan hna i SAC ralkap 3 an thi, hliam a tuar mi ralkap pawl kha mizaw phor mawṭaw in an kalpi hna tiah theih a si. Credit: The Chinland Post