SAC Kuttang Pyituhsit 15 Cu Hriamthil 16 He Unau Phu 3 Hna Sinah An I Fonh Ve
=========
Shan ramkulh chaklei Kokang pengkomh Special Zone(1) in SAC ralhrang kuttang pyituhsit chungtel 15 hna cu hriamthil zuun 16 he nitlaklei hriamtlai ṭangṭi phu unau 3 hna sinah an rak i fonh ve, tiah nihin November 1 ah Myanmar National Democratic Alliance Army(MNDAA) nih thawng an thanh.
“1027 Opration ni 5 chung ah SAC ralhrang battalion pakhat ning in an rak i fonh bantuk in pyituhsit ralhrang pawl zong a rak i fonh mi an um ve. Kanmah MNDAA lei zong nih SAC ralhrang chungtel hna cu hriamnam chiah in mizapi sin i fonh ding ah forhfialnak ca zong kan pek hna” tiah MNDAA in chimphuannak nawlngeitu Li Kyar Win nih a chim.
Kunlong peng, Kanyawng hmunram chung um SAC ralhrang Khah-lah-yiah 143 battalion thazaang 41 zong unau phu 3 hna sinah 2023, October 30 ah battalion pakhat ning in an rak i fonh caah tangka sing 15 cio kan pek hna i hmunhim ah kan kal ter hna, tiah a chim chap.
Nganzun Peng Kahdohnak Ah SAC Ralhrang 5 An Thi Ralhrang Nih Tualchung Mi 2 An Tlaih Hna I An Thah Hna. Mandalay ramṭhen, Nganzun peng SAC ralhrang le mizapi ralkap karlak kahdohnak ah ralhrang 5 an thi, tiah Myinchian peng No. 6 battalion chungin ṭuanvo ngeitu pakhat nih Yangon Khit Thit ah a chim.
October 23, zaan suimilam 11:30 tluk khan Thantappin khua hmai phungki sianginn ah a ummi SAC ralhrang cu dalan nih thawng an pek hna caah mizapi ralkap cikhat an i dinhnak hmun cu an va kalhnawh hna i kaphnih karlak kahdohnak a chuak caah ralhrang 5 an thi tiah theih asi.
Kahdohnak in mipi ralkap chungin hriantlai pakhat hliam a tuar kadohnak a dih hnu ah SAC ralhrang nih tualchungmi 2 meihol hngaktu 2 cu an tlaih hna i an thah hna tiah theih chih asi. Kahdohnak hi Myinchian peng battalion 6 ṭetkhuai 3 Specila Task Force Ngazun, Myinchian peng battalion 6 ṭetkhuai 2 , 1, Naung Ro Special Guerrilla Unit le P.K.F. phufonh hna ansi tiah an langhter chih.
Kyaukme Palik Sakhan Ah Buddhist Biaknak Lei Thantar An Taar I Palik Pawl An Zaam Dih. Shan ramkulh chaklei Kyauk-me palik sakhan ah buddhist biaknak he aa pehtlai mi thantar an taar i palik pawl nih thongtla pawl cu ralphaw ah an hman hna i an sakhan an zaamtak dih, tiah tualchung mi hna sin in kan theih.
Unau phu 3 hna nih Nawnghkio, Theinni khuapi le SAC ralhrang sakhan dangdang pawl an laak ca ah Kyaukme pengchung zong luhhnawh in an rak kahdoh lai ti an phang i palik pawl nih an sakhan ah buddhist biaknak lei thantar an taar hnu ah thongtla pawl cu ralphaw ah hmang in an umnak he aa neihnak SAC ralhrang pawl sinah an i fonh, tiah tualchung mi hna nih an chim.
“Kyaukme khuapi palik pawl cu an zapi in SAC ralhrang pawl sinah an i fonh dih. Thongtla pawl zong an i kalpi hna. Ralphaw ca ah (asiloah) raltuk ter ding ah hman an timh hna rua. Thongtla mi an chungkhar hna cu an lungre a thei ngaingai” tiah tualchung mi pakhat nih Khit Thit ah a chim.
Kyaukme khuapi um biaceihnak zung, penguk zung, Lah-wah-kah zung le a dang zung hna zong nih an Signboard pawl an phoih hna i SAC ralhrang kuttang cozah rianṭuan pawl cu khua dangdang ah an zaam dih, tiah a chimchap.
Myanmar-Tuluk Ramri Um Palik Sakhan An Laak Chap, Ralhrang Sakhan 80 Leng Le Khuapi 3 Ṭangṭi Phu Nih An Hmumhak Cang. Shan ramkulh chaklei Muse peng, Kyukoke (Panghseng) khuapi palik sakhan cu ṭangṭi phu hna nih nizan October 31, zan ah an laak khawh hnu in mei kanghnak a chuak i, a rawk dih tiah tualchung mi hna nih an chim.
Mah sakhan cu Myanmar-Tuluk ramri ah a ummi a si i zan suimilam 8:00 tluk ah ṭangṭi phu hna nih luhhnawh in an kahdoh caah an laak khawh, tiah theih a si. “Myanmar ram le Tuluk ram ramri Meng 105 lamṭhen ah ummi asi i, palik pawl zong an thi, hriamthil an laak le laak lo tu cu theih fiang a si rih lo. Palik sakhan cu a kaang” tiah tualchung mi pakhat nih Tachileik News Agency ah a chim.
Nihin November 1 zing ah SAC ralhrang nih mah Pang Hseng khuapi cu raltuknak vanlawng in bomb a thlak pinah hriamngan in an kah chih caah mipi cheukhat nih hliamhma an tuar i innlo zong an rawk ngai hna, tiah theih chih a si. Ṭangṭi phu hna nih 1027 Operation an thanh mi a ni 5nak tiang ah Shan ramkulh chaklei hmunram um SAC ralhrang sakhan 80 le khuapi 3 an laak khawh cang i an humhak khawh cang, tiah theih chih a si.
SAC Khah-lah-yiah(143) Battalion Cu An Dihlak In Unau Phu 3 Hna Sin Ah An I Fonh. Shan ramkulh chaklei Kunlong peng, Kamaing hmunram um Khah-lah-yiah(143) Battalion cu an dihlak in hriamnam an chiah i unau phu 3 hna sin ah an i fonh, tiah MNDAA nih phungning tein thawng an thanh.
Kap 2 hnatlaknak in ceihmainak an ngeih hnu October 30 ah Khah-lah-yiah 143 phu chungtel SAC ralhrang 41 nih atu bantuk in hriamnam an chiah i mizapi sin ah an i fonh hi a si. Mah chung ah Lieutenant Commander 1 le a dang Commander 2 hna zong an i tel, tiah an langhter. Cu hnu ah MNDAA nih hriamnam chiah in aa fonh mi SAC ralhrang 41 hna cu tlunkalnak ca ah tiin minung 1 ah Sing hleinga (150,000) a zapi fonh Sing zasarih leng an pek hna i an luatter hna, tiah an langhter chih.
Mah sakhan chung ah an laak mi hriamthil hna cu pehtlaihnak seh 3, Rifle meithal zuun 27, Seh meithal fami zuun 5, RPG zuun 2, Sniper zuun 1, Seh meithal nganmi zuun 2, Type-82 zuun 1, 60MM zuun 2, 5.56 kuan pha 11, 5.56 Shot Gun kuan 8,000 le hriamthil dang tampi zong an i tel hna, tiah MNDAA nih an langhter chih. Credit: Lungmili Post