SAC Bawino Rual Ralram Kal An Ngamh Ti Lo Caah Training Tu Kai Ding In An Bawi Le Sin Ah Tangka Zikhnawh An Pek Hna!
===========
SAC ralkap chung in bawino rual ralram kal an ṭih tuk cang caah ralkap training deuh kai khawh nakhnga cunglei an bawi sin ah tangka zikhnawh an pek cio hna tiah theih a si. Myanmar ram hmunkip ral an tho cang i, mipi ralkap an ṭhawn deuh nak hmun ahcun SAC lei a thi mi an tam ngai caah battalion chung um bawino pawl (Bokhat, Bohnih, Bothum) tiang ralbawi rual cu ralram kal ngam ti lo in training tibantuk kai kho dingin cunglei bawi sin ah tangka zikhnawhnak an pek hna hi a si.
“ Hlan ahcun battalion chung a um mi nih training kai ding an ti ahcun an kal duh tawn lo. Training chung ah ṭhutdir, eidin a har, a lenglei (outside) tangka hmuhnak a um lo, Battalion chung um an rak i nuam deuh. Atu cu ralram an kal ngam ti lo caah cunglei bawi sin ah tangka zikhnawhnak an pek hna tiah Naypitaw Command tang a um mi ralkap hna nih Ayeyawaddy Times ah an chim.
Atulio Yangon ramṭhen le Ayeyawaddy ramṭhen ti lo cu hmunkip ah kahdohnak a um i mipi ralkap lei kahnak ah Commander L.t Colonel, Major, Captain a thi mi le tlaih a tong mi ralbawi an tam cang. Ralram hmun kalnak ah Sagaing le Magwe ramṭhen kal a ṭih mi hna nih tangka sing 80-100 tiang le, tlangcung hriamtlai an umnak lei kahdohnak ah a kal ngam lo mi nih tangka sing 200 leng cu an cunglei bawi sin ah tangka zikhnawhnak an pek hna, mah tangka zong hi training kai zong ah a kum in si lo in a thla ca lawng ah a nguh tiah theih a si.
SAC LIB 32 In Ralkap Pakhat Hriam He KNU Sin Ah CDM A Tuah. Kyainseikgyi khua hrambunh SAC LIB 32 in SAC ralkap pakhat cu hriam he KNU,KNLA B17, C02 sin ah CDM a tuah tiah thawng theih a si. SAC nih mipi a hrem mi hna le hramhram in a uknak hna kha a zoh khawh ti lo caah SAC ralkap kuttang in a chuak i mipi he fonh in SAC ralkap doh ṭhan ding in KNU sin ah aa fonh hi a si.
Cu kum 22 ralkap pa nih MA-1 zuun 1, kuanbawm 5, 5.56 kuan 75 le Equipment 1 aa rak chuahpi khawh caah sing 50 laksawng an pek tiah theih a si.
Wetlet Peng Khua 40 In Tualchung Mi Sing Khat Hrawng Ral Hrial In An Zaam. Sagaing ramṭhen, Wetlet pengchung ah SAC ralkap nih tlanglawng lam humhimnak ruang ah tiin August thla dongh zarh khan hmun 6 ah i ṭhen in hmunhma thianhhlimhnak an tuah i, khua 40 in tualchung mi sing khat hrawng cu a himnak hmun ah ral an hrial hna, tiah tualchung mi bawmchantu hna nih an chim. Tutan i ralhrial mi hna hi tlanglawng lamthluan ah a ummi khua an si, tiah theih a si.
Tlanglawng lam nichuahlei um khua hna cu an zaam dih hna i, SAC ralkap nih khuachung an thlok tuk pinah kahdohnak zong a chuak. Tlanglawng lam in tlaklei zong ah kahdohnak a chuak i, tualchung mi tlaihkhih a tong mi zong an um. Cuka lei i rallam a sialtu SAC ralkap nih an hmuhmi hna tam deuh cu an thah hna. September 6 ah Minkonelay khua zong an khangh i, September 7 ah inn 400 tluk hrawng a umnak Yonepinkone khua le Pawintat khua zong an khangh. Inn zeizat a kangh ti cu fiang in theih a si rih lo, tiah tualchungmi nih an chim.
Nihin September 8 zong ah SAC ralkap pawl cu Paukgan tlanglawng dinhnak hmun pawnghrawng um khua hna ah rallam an sial ṭhan, tiah theih a si. SAC ralkap nih rallam an sialnak hi ni 14 tluk hrawng a si cang, tiah an chim. Tualchung mi hna cu SAC ralkap khuachung in an chuah hnu ah a kir ṭhanmi zong an um nain, tam deuh cu a himnak hmun ah an i dorchung rih hna, tiah theih a si.
UNOCHA nih a langhter mi cazin ning ah SAC nih uknak an laak hnu ah mah umnak hmun kaltak in a zaam mi hi minung sing 16 leng an si, tiah an langhter.
Kalaymyo Ah Ruahti A Tam Ruangah Ti A Lian! Sagaing ramṭhen, Kalaymyo ah nizaan September 7, zaanlei in ruahpi cat loin a sur ruangah ti a lian i vawlei niamnak ah a ummi hna cu ti nih a liamhnawh hna caah a himnak hmun ah an i ṭhial, tiah theih a si. Kalaymyo, Upauk tiva cu a ṭhang i a liam pinah Kalaymyo sangchung innchung tiang ti nih a luhhnawh hna caah vawlei a san deuhnak hmun ah an i ṭhial hna, tiah tualchung mi pakhat nih a chim.
Atu bantuk in tiva ti an lianh caah Kalaymyo khuachung sianginn cheukhat cu an kharpiak hna. Taungzalatt sangchung Upauk tiva cu a ṭhan tuk caah hlei donhmi zong a kiak, tiah tualchung mi nih an chim. “Simyaung lam ni chuahlei um hleidonh a kiak i, hleidonh tamdeuh cu ti nih a phun hna, innzuat saṭil zeimawzat zong ti nih a phum hna” tiah Kalaymyo, Taungzalat sang um mi pakhat nih a chim.
Kalaymyo Khua Chung Ti A Lian; 2023 September 8 zing in kalaymyo khuachung ah ti a lian i, khuachung tiva a luang mi Upoh chaung, Tuiro va, thlamualluai tiva pawngkam um inn tang tiang ti a lut cang i, tiva pawngkam a um mi hna cu hmundang ah an tli/zaam cang tiah theih a si.
Kalaymyo nichuak, chak lei, thlang lei khua ti a lianh hnawh cang hna. Tu tiang Kalaymyo khuachung tiva U Poh chaung ti lianh ruang ah Lamsung in Tahan lamchung tiang ti a phan cang. Kalay–Gangaw lei kap khuate tam lak te zong ti lianh an tong.
Tu tiang ahcun Nguang Pin Ta, Aung Min Ka lar, Aung Me Mang, Aung Tit Sa, Min Galar Oh Yin, Chian Myet Aung Si Sang pawl ti a phan cang. Kalaymyo khuachung ti lianh cu Neta phungki inn chak i Myomah bazaar, Kalay lamsung, tintin win dawr hmai tiang ti a phan cang. “Mitta- tiva, Zi Chaung ti a ṭhang tuk i Sadaw, Cekan, Minhla kap vial te, Kalaymyo nichuak lei Pyintakhua, Taungngo, Nat Myaung khua le Kalaymyo pengchung khuate tam deuh ah ti lianh ruang ah hmundang ah an zaam tiah theih a si. Credit: The Chinland Post