SAC Ralkap An Thazaang A Der Tuk Cang Caah Ralkap Siibawi Zong Ralhmai An Kalter Cang Hna
==========
SAC nih ralhmai ah an thlahmi an ralkap hna cu tam tuk an thi cang i ralkap thazaang an i daih ti lo caah ralkap siibawi hna zong ralhmai an kalter cang hna, tiah ralkap siibawi chung a ummi hna nih an chim.
SAC nih nawlngeihnak an laak hlan ah cun ralkap siibawi master degree a hmu mi le thiamhlei siibawi hna cu zung ah an rak chiah hna. Asinain ralhmai a kalmi ralkap tam tuk an thih cang caah ralkap siibawi officer hna zong a changchang in ralhmai an kalter hna. Cu pinah ralkap siibawi sergeant hna zong ralhmai an kalter hna i Yangon le Naypyidaw khuapi hngaktu palik aiawh ah ralkap siibawi an hman hna, tiah Khit Thit Media nih a ṭial.
September thla dongh lei ah SAC nih ralhmai ah an thlahmi ralkap siibawi Captain Nay Lin Htet cu thla thum leng ralhmai ah an kalter cang i dinhter loin ralhmai kalnak in an kirter ti lo ruangah Karen ramkulh Hpapon peng ralram hmun pakhat ah amah tein aa that, tiah theih a si.
Sii ralkap chung mi hna nih, “Karen ramkulh, Hpapon peng ah amah tein hri in aa awkmi ralkap siibawi Captain Nay Lin Htet hi siibawi rian a ṭuannak kum 5 hrawng a si cang. Anih hi mi tluangtlam le dawtu hawikom tampi a ngeimi a si. Ralhmai a kal i cunglei bawi nih an thlah duh ti lo caah amah tein aa that,” tiah an chim.
SAC ralkap tam tuk an thih cang caah ralkap chung in a zaammi an tam, caan tlawmpal chung dinhnak ca ṭial in inn ah a tlung i a zaam behmi ralkap zong an tam tuk cang, tiah ralkap chung a ummi hna nih an chim.
Yin Mar Pin Peng The Kone Khua Ah Ngakchia 3 Telh In Tualchung Mi 6 Cu SAC Ralkap Nih An Thah Hna. Yin Mar Pin peng The Kone khua ah ngakchia 3 telh in tualchung mi 6 cu SAC ralkap nih an thah hna, an thahmi hna chung in mipi ralkap pakhat cu a lu an tan, tiah tualchung mi pakhat nih a chim.
SAC ralkap nih an thahmi hna ruak cu The Kone khualuh ah hmuh an si i, khuami facang, chiti le tirawl dangdang hna zong SAC ralkap nih an hlonhpiak dih hna, tiah theih a si. SAC ralkap nih an thahmi hna lak ah kum 17 tleirawl pakhat cu ralkap ṭih ruang ah a zaammi a si, PDF chungtel a si hrimhrim lo, ka nunnak chal in ka chim ngam, tiah hringtu a nu nih a lungfahnak kong a chim.
The Kone khuami sualnak ngei lo thah a tongmi hna cu; Ko Zaw Maung, Ko Zaw Thu, Ko Maung Lin (kum 30) le siangngakchia pathum Maung Khant Nay Khan, Maung Than Zin Oo, Maung Than Htite (kum 17) hna an si.
Thailand Ram Ah Myanmar Rammi 69 Cu Palik Nih An Tlaih Hna. Thailand ram Ayutthaya pengkomh ah phungning loin a lutmi Myanmar rammi 69 cu Thai nawlngeitu nih October 14 ah an tlaih hna, tiah Employment Department nih an thanh.
Thailand ram rianṭuannak hmun ah a ummi ramdang mi 1,000 leng an um i hmunthur zong fimkan lo tuk in an hlonh pinah cinthlakmi hna zong atu le atu an fir tiin Thailand khuate mi hna nih palik an chimh hna caah Thai palik nih Myanmar rammi 69 cu an tlaih hna.
Thai khuate mi nih palik thawng an pek hna caah Employment Department le Department of Public Health in zung rianṭuantu hna nih October 12 ah rianṭuantu hna umnak camp cu an luhhnawh i chekhlatnak an tuah hna, tiah Khit Thit Media nih a ṭial.
Phungning loin rian a ṭuanmi Myanmar rammi 69 le Cambodia rammi 278, an dihlak minung 347 cu passport loin Thailand ramchung an lut i rian an ṭuan caah kan tlaih hna, tiah Thai palik nih an chim. Tlaih a tongmi hna hi Immigration upadi in taza cuai an si lai i rian ngeitu zong phungning loin riantuantu hna cu rian a pek hna caah dantatnak pek khawh an si lai.
Employment Department nih cun Ayutthaya pengkomh chung ah phungning loin rian a ṭuanmi hna cu chekhlatnak an tuah hna pinah upadi ningin phungning tein rian a ṭuan khomi lawng rian pek ding ah an tawlrel cuahmah lio a si.