Ralhrang an hrang chin lai!
==========
Kawl ralkap cu rul bang azir tuk mi an si tikah tutan ral an vun sungh thluahmah cang caah ram hi zei tluk in dah abuai lai, zei mei dah kan kau lai ti lawng an ruat cang. Leng lang inn duah lawng khi an hmang lo, minung thinlung hrim hi ei viar i anmah nih ram uk khawh lo ahcun ram zong khuai dih, khangh dih aduh mi an si.
Tutan hna China duhlonak an langhter ko mi hi minung le minung kar ah mei an kau hnik cang nak asi. Racial Clash timi miphun min in buainak chuahter nak in țih anung deuh mi aum ti lo. Mah hi an Final Bullet (နောက်ဆုံးကျည်ဆန်) asi te lai tiah ahram thok in ka rak chim lengmang i ka țial peng mi kha asi cang. Atu an thok hnik cang caah ralring tak tak ve hna usih.
Mah pin ah Biaknak in an vun char chih rih lai i Buddhish le Khrifa, Muslim ti in mei an kau thluahmah rih lai. Ral tuk in an kan tei ti lai lo caah um awk le uk awk țha lo ding khin hna an hnok cang lai. Mipi lam zawh vial meithal in kah asi, anmah an uico pawl lam zawh vial thazaang an pek hna. Hi bantuk lam zawh ke buai hi an sungh deuh ahcun kham cawk an si te lai lo. Cucaah hi bantuk lio ah cachia țial, au ve ti bantuk kan hrial ahau tak tak lai.
A lu cik mi rul cu anun lio nak in alu vun tan i apum a cawl mi khi țih anung deuh mi alo nain athihnak asi ve ti kha kan theih ahau. A ke kan kiak cang hna! Khah, lamlai ah maw i ngol cicet hna hlah u sih, hehchet law mawh vun ti rih ko hna usih!
Operation 1027 & Ralrin Ding; Kan ram cu atulio Operation 1027 nih thlipi bang chaklei in avun kan den thluamah i cu thlihran hoih in cun Operation 1107 timi le Operation 1111 ti zong in an mah le zawn phanh ni in ralhrang lei hoih in mipi ralkap zong kan hrang cuahmah ve. Pathian nih kan um pi ko seh. Khuachia (evil) ai hrolh mi ralhrang hna uknak dong hram ko cang seh!
Cun, ka chim lengmang mi ka vun nolh țhan ta. Raltuk cuahmah lio ah hin cun lam tanțim in teinak thantar he kan au tuk rih lo ah ațha lai, teinak cu vulei le ramchung mipi tu nih ahmun kan phanh tikah hngawng oih he don si te ko seh. Tutan CNF/CDF le CNDF zong nih thlipi hrannak lei hoih in an vun kan nampi thluahmah ve tikah lung zong ahmui, thin zong atur pah fawn. Kan mitthli cu, kan thisen in aluang pah cuah mah ve. Kan ngol lai lo, hmai kan nawr chinchin lai.
Cun hi ral lamthluan kan kal lio ah a za deuh rih lo tiah ka ruah mi cu, thanthar (flag) tar mi pin ah ahlei deuh in mah tein cațial hna edit tuah in Public ah tar rulh cio phun hi cu vun i suum deuh rih ko hna u sih law ti ka duh ko. Ground ah ral atu cuahmah mi kan hruaitu hna nih an tar ning, an țialning tein zul cio rih ko hna u sih. Atulio cu nuamhnak (entertainment) le lentecelhnak (sport) tuah asi lo i nunnak thaap in raltuknak hmun (War) chung kan um cang caah tuar zia zong thiam, lawmh zia zong thiam ngai kan hau rih ko hna.
Ai theithiam mi hawikom sin ah pumpak edit chom mi kha pumpak message in i kuat ahcun phundang asi. Political party kong zong ah i soisel tuk ding asi rih fawn lo. Sa pel lio ah hlasak i zuam pah phung asi lo. Hlasak zuamnak hmun kan phanh tikah duh tawk in kan sa cio lai, kan i zuam te ko hna lai.
Europe ram le vulei cung zalonnak dirpimi hruaitu vialte nih Adolf Hitler doh ding ah party an zoh lo, policy zong an zoh lo, Adolf Hitler chung ah ai hrolh mi khuachia (Evil) chuah hmasa kha biapi ah an ruah caah Communist asimi Russia le Democracy asimi US/Europe hmanh Hitler doh ding ah hmunkhat ah an țangți dih ko khah.
*Duh duk ar ek* an ti bang, si seh ti kan duh tuk lung in aherh lo tiang kan tar sual nak hnga lo mipi i suum hram rih ko hna usih. Cun lung aw țawm lo tein alam um mi poh in țang chinchin ko hna usih. Inn akang lai ti ruang ah thilri fim caan asi ti lo, a kaang cang mi inn chungin arannak cem le alam um mi kip in thilri chuah pi ding caan kha pakhat cio kan cung ah a phan cang.
Kawl ralhrang pennak (Evil Empire) dohnak ah ai telmi vialte upatnak kan pek hna.
Kawl ralhrang cu raltuk athiam ngai mi, mipi cung ah zawn ruahnak angei lomi, uknak i hruh pi in an lungthin molh dih cang mi le rul bang azir tuk fawn mi an si caah zeitin dah an vun kan leh te lai ti tu hi ralring tak tak kan hau. Anmah nih an khuai dih mi kan ram hmanh atu ralhmun pakhat hnu pakhat an vun sungh thluahmah hnu cun kan ram a kuai lai ti kan phang tiah zah hngal loin an au cang. An kan hlennak zum hrimhrim hna hlah u sih.
Maw Bawipa, kum 60 leng mah ramchung mipi hmanh unau in hmu loin sal ah akan hmangtu, ukmi mipi caah țuan loin uktu si lawng aduh i mithah lainawn zeihmanh arel lomi hna le biaknak ahrawk dih tu, hi Kawl ralhrang uknak in kan luat ter ko cang. Kan pawngkam ram ah mifir bang athlithup in ralzaam dirhmun in va um le ram ngei lo bang kan vaihnak hmun in kan chanh chuah hram ko cang! Credit: Victor Khen Sang