Laukkaing Peng SAC Sakhaan 3 MNDAA Nih Laak,Ralhraang Zakhat Tluk Nih Hriam An Chiah
============
Nizan December 24 ah Laukkaing peng chung um SAC SuanphunTha sakhaan,Kuanyintaung sakhaan le Htinpachaing sakhaan hna cu MNDAA nih an laak tiah theih a si. SAC ralhraang hna minung zakhat tluk nih hriam an chiah caah hriam a chia mi hna cu sii-ai lei thlopbul hna leng ah tha tein an zohkhenh hna.hriam a chia mi hna hi Kalaw hram bunh SAC division 55 kuttang ralkap hna an si tiah theih a si.
Mantung Khuapi Cu TNLA Nih TLamtling Tein An Laak Khawh. Ta’ang hmunram um Mantung khuapi cu PSLF/TNLA le ttangti phu hna nih tlamtling tein an laak khawh cang tiah theih a si. Mantung khua um SAC IB 130 sakhaan cu PSLF/TNLA le ttangti phu hna nih aluancia December 18 in tuk hram an thawk i nizan December 22 zanlei slm 6:00pm tluk ah tlamtling tein an laak khawh hi a si.
Nizan December 22 nikhat chung lawng ah SAC lei nih Mantung khuapi le kahdohnak a chuahnak hmun hna ah Jet fighter in voi 13,Y-12 vanlawng in voi 48 tiah bomb lung 258 a rak thlak tiah TNLA lei in an thanh.cutin ralhraang nih vanlawng in bomb a thlak caah Mankan khua zapi inn pakhat mei a kaang i phungki sianginn pakhat telh in zapi inn 10 nak tlawmlo a rawk tiah theih a si.
Kahdohnak chung ah SAC lei a thi mi an tam bantuk in TNLA lei zong nunnak a liam mi an um ve tiah theih a si i raltuknak hriam tampi zong TNLA nih an laak tiah theih a si. SAC a thi mi le hriamnam laak khawh zat cazin dikthlir in thanh mi a um rih lo. Operation 1027 aa thok hnu in TNLA nih Namhsam,Namhkham le a tu Mantung khuapi tiin khuapi pathum an laak khawh cang.
Malaysia lei Chinmi ralrin taktak a herh. Malaysia lei tlaihkhih thawngpang a chia ngaingai caah Chinmi ralrin taktak kan hau cang. Malaysia Immigration nih red line an chiah cang caah tlaihkhihnak a tam lai timi cu a fiang ko. Cu caah Malaysia um Chinmi ralrin taktak kan hau tinak a si.
Kan hnu Kotoraya Operasi luh zong ah khan ramdang mi minung 500 leng an tlaih hna. An tlaih mi hna ahhin Bangladesh, Myanmar le Nepal hna an si. Kan hnu Kotoraya operasi luhnak a ruang bik kha Kotoraya ah phungning loin Kawl dawr, Bangladesh dawr tibantuk a tamtuk ruang ah an mah local mi nih report tuah in an luhnak a si tiah an chim. Operasi luh ah khan phungning lo dawr, rithaisi, visa deu peknak, phungning lo siikhan tibantuk pawl zong an tlaih hna.
Tulio hrawng Malaysia operasi hi shopping mall le ramdang mi pawl dawr umnak deuh ah an lut ko hih. Cu caah Kawl dawr, Bangla dawr tibantuk ah sau tuk thut lo le um lo deuh kha hrial i zuam hna usih. Ramdang mi nih phungning loin ramchung ah duh poh in chawlehnak an tuah mi hi an mah rammi nih an doh taktak mi a si.
Malaysia Immigration zong nih ramdang mi phungning lo minung a humzualtu cu dantat an si lai ti zong ah thawng an thanh cang. Cu ruang ah Malaysia ah a ummi Chinmi hna ralrin a hau. A bik in UNHCR card a ngei lo nih ralrin khun a hau. A herh lo ah lengvah chuah lo. A bik in pawngkam ah zurit buaibai lo ding a si lai.