Nyaunggyitpin Pyusawhti Ralhrang Sakhan Khaltu Ngeilo Vanlawng Hmete He Drone Hmangin Bomb An Thlak Hnawh
=========
Magway ramṭhen Pakokku peng Nyaunggyitpin khua Pyusawhti ralhrang sakhan cu mipi hriamtlaiphu nih khaltu ngeilo vanlawng hmete he drone hmangin an bomb an thlak hnawh tiah Myaing Pah Kah Phah in ṭuanvo ngeitu pakhat nih a chim.
September 20, zanlei suimilam 2:00 tluk ah Pakokku peng Nyaunggyitpin khua Pyusawhti ralhrang sakhan cu RC Plane drone vanlawng hmete hmangin bomb ngan le bomb hme 10 an thlak hnawh hna caah Pyusawhti ralhrang umnak hmunhma ah puahkehnak a chuak a thi mi le hliamtuarmi fianghlang in kan chim kho lo tiah an langhter chih.
Kahdohnak hmun ah a telmi mipi hriamtlai phufonh hna cu Myaing battalion 3 Tetkhuai 5 MRTF le Black Cobra ṭangṭi phufonh ansi hna. Kahdohnak hmun in mipi hriamtlai ṭangṭi phufonh hna cu hliamhma zeihmanh tuar loin an kir ṭhan tiah theih asi.
Inle Ah Fimcawng Liomi Pa Ngakchia 2 Electric Mei Tlaihnak In An Nunnak Liam. September 19, zanlei sangah Shan ramkulh Nyaungshwe peng Inle Sekhaung khua ah sakmi primary singinn ah fimcawng liomi pa ngakchia 2 cu Electric Mei tlaihnak in an nunnak a liam tiah tualchung fimcawng ngachia nu le pa nih an chim. Zanlei sianginn ṭin lio ah pa ngakchia pakhat cu ek-inn a kal dih hnu in a rak chuak i sianginn tikhur pakhat ah tii cawi dingin a kal tiah an chim.
Fim cawnnak sianginn tii-khur chungah hin electric mei hri a catmi a rak tlak caah ngakchia pa hi a tlaih colh a hawipa chanhchuah a timtu zong a tlaihchih caah an 2 tein an nunnak liam tiah an chimchap. Nunnak liammi pa ngakchia 2 hna ruak cu fimchimtu saya/sayamah hna nih Nangpang peng mipi Sii-inn pi ah an chiah hna tiah theih asi.
Dawei SAC Ralhrang Umnak Sii Inn Pawngah Ummi Ralbawi Inn Cu Hriamngan 40 MM Hmangin Ankah 3 An Thi. Tanintharyi ramṭhen Dawei khuapi SAC ralhrang sii-inn pawngah ummi ralbawi (captain) inn cu mipi hriamtlaiphu nih hriamngan MM 40 in an kah caah ralhrang 3 an thi tiah Dawei Information Center in ṭuanvo ngeitu pakhat nih a chim.
September 20, zing suimilam 5:15 tluk ah Dawei Khuapi inn khan 100 umnak sii-inn pawngah ummi SAC ralhrang inn cu mipi hriamtlaiphu nih hriamngan MM 40 an kah tiah theih asi. Mipi hriamtlaiphu hriamngan kahnak in ralbawi cheukhat hliam an tuar pinah minung 3 an thi tiah Dawei DGRF mipi hriamtlaiphu chungin ṭuanvo ngeitu pakhat nih a chim.
Kyaikto SAC Ralhrang Umnak Hmun Mipi Hriamtlaiphu Nih An Kah 5 An Thi. Mon ramkulh Kyaikto khuapi ah a ummi SAC ralhrang cu mipi hriamtlaiphu nih ankah caah minung 5 an thi tiah TawGyikan mipi hriamtlaiphu chungin ṭuanvo ngeitu pakhat nih a chim.
September 19, zing suimilam 9:00 tluk ah Kyaikto khuapi Yangon-Mawlamyine motor lampi pawng check-gate ralhrang umnak cu mipi hriamtlaiphu nih an kah hna tiah theih asi. Kahdohnak hmun ah aa telmi mipi hriamtlaiphu fonh hna cu TawGyiKan battalion 2 le KNU/KNLA ṭangṭi phufonh ansi tiah an langhter.
Pale Peng Ni 2 Chung Kahdohnak Ah SAC Ralhrang 3 An Thi Meithal 1 Le Tilawng 1 An Lak. Sagaing ramṭhen Pale peng ni 2 chung mipi hriamtlaiphu le SAC ralhrang karlak kahdohnak in ralhrang 3 an thi meithal 1 le cawleng 1 an lak tiah Royal Eagle PDF chungin ṭuanvo ngeitu pakhat nih a chim.
September 12, Pale peng rallamsial in a rak chuakmi SAC ralhrang thazaang 100 tluk cu Ingyinsu khua Pale mipi hriamtlaiphu le ṭangṭi phufonh nih rak bawh in ankah hna tiah theih asi. Cu bantuk ṭhiam in September 13, zing suimilam 8:30 tluk ah Pale InMaHti sakhan ah tirawl chan in arak kirmi SAC ralhrang le Pyusawhti cu InMaHti khua le Supokekone khua karlak ah Yinmarbin battalion 7 Royal Eagle PDF ankah hna caah ralhrang 2 an thi 1 a ke aa tan 2 hliamfak antuar tiah theih asi.
InMaHti khua lei ah arak kirmi ralhrang cu zanlei suimilam 5:10 tluk ah mipi hriamtlai ṭangi phufonh nih ankah han hna i Pyusawhti ralhrang 1 a thi meithal 1 le kiam 48, cawleng 1 anlak tiah an langhter chih.
Manipur Ramkulh Ah Ralzaam In A Ummi Myanmar Mipi Harsatnak An Tong. India ramchung Manipur Meitei le Zo cikawr miphun karlak buainak hi Myanmar ralzaam mi hna ruangah asi tiah India cozah nih an puh hna ruangah minung tampi an ṭhawl hna i ramri le tlang karlak ah harsa ngai in anum tiah theih asi.
Manipur peng Zo cikawr hna hi Myanmar Tamu peng Zo cikawr he aa khatmi ansi i, phunglam loin a rak lutmi ansi tiah Myanmar ramri leiah anzaam August 18, khan Sagaing ramṭhen Tamu le Kalaymyo karlak Zohmun (BohKan) khua SAC ralhrang nih ankah hna caah tualchungmi 500 tluk Manipur leiah zaanṭim ah anzaam tiah an langhter.
India ramchung Minipur ah luh aa timmi Myanmar tualchungmi hnn cu India ralkap nih an rak kham hna i an ṭhawl hna tiah tualchungmi pakhat nih a chim. SAC ralhrang cohzah nih uknak an lak hnu ah India ram Manipur ah hin Myanmar mi ralzaam inminung 5000 tluk anum cang i, hi lak ah minung 70 an tlaihmi hna hi pehtlaih chonhbiaknak zong a harsa rih tiah Salai Do Khar nih a chim. Credit: Lungmili Media