Nikki Haley hi US President ding ah a muisam, a pumrua le a biachim ahhin aa rem tuk cia i, a mark a vun kai thluahmah fawn. Ruahlopi in Trump teitu a si kho.
Republican Candidate caah primary an izuam ning cu, January in June karlak ahhin US ram State 50, District of Columbia ( DC) le Territories 5 ah ahodah Delegate tambik a hmuh timi an izuam i, teinak a hmumi caah July thla ahhin Convention an tuah lai. Tukum hi Milwaukee, Wisconsin ah an tuah lai.
Delegates dihlak hi 2,429 an um i, mah chung ahhin delegates 1,215 a hmumi nih nomination a cote lai. Tuhi State pahnih ah an izuam cang i, Trump nih teinak a co, nain Proportional system a si caah % an hmuh ning in delegate an i phaw i, Trump nih 32 delegate a ngei cang i, Nikki nih 18 a ngei ve cang.
Hmaizarh hi , Nikki Haley inn, ( Hometown) South Carolina ah thimnak an tuah lai. Poll ahcun Trump nih a tei tuk rih. Asinain, zarh khat chung ahhin thil tampi aa thleng kho. South Carolina ahhin Nikki nih teinak a hmuh sual ahcun, a caah lam kaupi aa awng lai tinak a si.Crd:Zasang Cinzah
Thawngpang dang: A Phulomi Thisen Tampi A Luan Lonak Ding Le Mara Ram A Him Khawhnak Hnga caah Mara upa pawl nih khua fak deuh ruah in, biaruahnak an ngeih hrim hrim a herh in a lang.
CDF Mara an si ah MDF an si ah Mara miphun le Mara dawtnak he rian a ttuanm an si. An vision le an hmui timh belte an idang deuh i, politics an khelning zong an idang caah a si. Asinain, an phu 2 in Mara miphun caah a tthami kha an target a si veve ko.
Mara miphun le Mara caah nunnak ka pek tiah an thisen an thap veve nain, an thisen hi Mara ram a hrawktu a si dingmi ruah ah ngai a chia. Cucaah, khua kau deuh in an ruah i, phu-hnih karlak ah ichawnhbiaknak an ngeih hrim hrim a herh ko.
CDF-Mara nih CNF aa bochan i, MDF nih an himnak caah AA a fuh ve tikah, Politics ning cun, mawhchiat awk an ttha lo. MDF nih AA an fuh hi, choice dang an ngei lo caah a si kho.
Hnulei tuanbia kha zoh tthan usihlaw, Geenral Aung San nih Mirang tthawlnak caah Japan a rak isawm. Japan nih an vun uk tikah, Mirang nakin an sual deuh caah, Japan thawlnak caah Mirang aa sawm ttthan.
Nihin ah MDF nih “greater Maraland” an dirh khawhnak hnga caah le anmah hriamtlai bu an himnak caah AA aa sawm tikah, Maraland hi AA uknak tang a phak sual ahcun, tulio ralhrang uknak, nakin a chia deuhmi uknak tangah an tla kho timi muisam cuanter tikah, Mara ram le Mara miphun caah ruah ding a tam ko.
Kawlram politics zong a vun ithleng cuahmah. Min Aung Hlaing zong a sung ding, a vun fiang chin lengmang ko caah, MDF nih Min AUng Hlaing zong nih Mara Autonomous a kan pek khawh ve ko tiah option pakhat ah an rak ngeihmi zong, tthulh awk ttha a si cang caah, CDF- Mara le MDF karlak ah idannak tete zong, review tuah kho hna sehlaw, new vision le new planing he hmun khat ah kal tti kho hna sehlaw, Mara Miphun le Mara ram caah a tthabik result a chuak lai tiah ka zumh ko.
Supporter CDF Mara dirhkamh in MDF doh tbk, MDF dirhkamh in CDF Mara soisel tbk nih lungrualnak a chuahpi kho lai lo. Buainak le thisen lehlam a chuahter lai. Cucaah, CDF Mara le MDF karlak buainak ahhin, lengleimi nih remhnak le daihnak si loin, buainak le rawhnak chinchin chuahtertu kan si lonak ding, iralrin ngai ngai a herh ve in a lang.