Chinram In Kalay Ah A Kalmi Motor Pawl Cu Khaikam Ah Ni Li An Taap Cang
===========
Chin ramkulh, Falam peng Valung le Tedim khua lei in Kalay ah a kalmi thilphor motor le khualtlawng motor pawl cu Kalay Sianghleirun hmai SAC ralkap chek gate ah ralkap nih kal an onh hna lo caah nili an taap cang, tiah theih a si.
Meng 9 um LSD datsi dawr pawng ah motor 10 le meng 9 phak hlan ah motor 7 tluk cu Kalay khuachung ah an luh khawh lonak le Khaikam khua in an hngahnak kong motor khaltu pakhat nih Zalen ah a chim.
December 18, 19 le 20 ni thum chung motor lam kan onh tiin CDF-CDM Siyin nih thawng an thanh hnu ah Valung le Tedim ah a taapmi motor hna cu Kalaymyo ah an kal nain meng 8 um SAC ralkap pawl nih kal an onh ti hna lo, tiah theih a si.
Chin ramkulh, Falam peng, Valung in Waibula khua lei kap in aa hel i Kalaymyo lei ah a kalmi thilphor motor hna zong Kalaymyo thlang lei ah an taap hna.
Mung Khuapi Bazar A Kangh Ruangah Dawr Khan 200 Leng A Ciam.Bago ramṭhen, Kyaukgyi peng, Mung khuapi No. 1 sang um, Myat Malar bazaar cu nizan December 20 zanlei suimilam 1:00 hrawngah a kaang i dawr khan 200 leng a ciam, tiah tualchung mi hna sinin theih a si.
Mei hi dawr khan pakhat in a chuak i zeitin dah a chuah ning a si ti cu hngalh a si lo. Dawr khan a kangh hi suimilam pathum chung hrawng a rau i dawr khan 200 hrawng cu a dihlak in a ciam dih. A kaang mi dawr hna cu hnipuan dawr, eidin dawr, electric thilri dawr le thil phunphun zuarnak an si hna. Buaktlak in a kaang mi thilri dihlak hi kyats sing thong man a si, tiah theih a si.
December thla hramthawk ah Mung khuapi ah kahdohnak a zual i tualchung mi hna cu a himnak hmun ah ral an hrial ruangah bazar vialte zong khar a rak si. Cu hnu ah Mung khuapi cu a dai ṭhan i December 10 ah bazar pawl zong an hun ṭhan.
December 13 ah Mung khuapi chung ah SAC ralkap pawl an lut ṭhan i khuapi chung hmun tampi ah umhmun khuar in sentari an cawngh, tiah tualchung mi hna sinin theih a si.
Mandalay Ramṭhen Peng 6 Ah Dawr Khan 800 Leng Cu Ni 15 Chung Ah Ṭhial Dingin SAC Nih An Chimh Hna.Mandalay ramṭhen, Mandalay khuapi peng 6 ah tualchung mi dawr khan 800 leng cu ni 15 chung ah ṭhial dih dingin SAC nih an chimh hna.
Mandalay khuapi peng 6 ah a ummi sianginn (Basic Education School) ah a ummi dawr khan pawl cu a luancia 2007 lioah Sannandaw Company nih an rak sak i tualchung mi hna nih an rak cawk mi a si. Kum 16 a rauh hnu ah atu bantukin SAC nih ṭhial dih dingin an chimh hna, tiah theih a si.
A luancia 2023 July thla ah ralrinnak ca pek in i ṭhial dingin an rak ti cang hna hnu December 19 ah peng fimcawnnak uktu nih an auh hna i January 5 a donghnak chia in dawr khan vialte chuahtaak dingin an ti hnanak kong dawr khan ngeitu hna nih Khit Thit Media ah an chim.
Ni 15 chung ah an dihlak i ṭhial ding in an chimh hna i zaangfah nawlnak caṭial duh ahcun ni 10 chung ah sakremhnak zung ah ca va chiah i copy tu cu mah le peng fimcawnnak zung ah chia cio dingin peng fimcawnnak uktu nih a chimh hna.
SAC nih dawr khan 800 leng cu i ṭhial dingin an chimh hna lio ah tangka liam ding le hmunhma thar pek ṭhan ding kong an chim hna lo i zaangfah nawlnak ca tu cu December 19-28 karah ṭial le chia dingin an chimh hna.Credit :The Chin Post