Mizoram Ah Myanmar Rammi Pahnih Cu Rupees Sing 10 Leng Man Rithaisii He Tlaih An Si
==========
India-Myanmar ramri Mizoram ramkulh, Champhai pengkomh ah Myanmar rammi pahnih sin in Rupees sing 10 leng man rithaisii cu December 12 ah an tlaih.
Mizoram ramkulh rithaisii dohnak zung le Assam Rifle hna nih a hlankan in thawng an theih chung caah Champhai pengkomh Zote khua ah Myanmar rammi Ginsiansiam(kum 25) le Thanlamchina(kum 35) cu an va luhhnawh hna i rithaisii he an tlaih hna.
Tlaih a tongmi hna hi Chin ramkulh, Tonzang peng Darkhai hmunram ummi an si i rithaisii an phorhmi hi 14.5 kilogram a ritmi Rupees 1,073,000 man a si. An tlaihmi rithaisii cu Mizoram rithaisii dohnak zung nih an fim i tlaih a tongmi hna cu a herh ningin dan tat ding ah palik nih taza an cuai hna.
SAC nih nawlngeihnak an laak hnu in Chin miphun minung 30,000 leng cu Mizoram ah an zaam i a zaammi chung in phungning loin rithaisii; bing, Heroin No.4 le a dangdang ritsii cu Mizoram ah a zuar mi tam thawng theih a si.Credit: The Chin Post