Pathian nih zeitik hmanh ah a biakam a leet bal lo. Israel 🇮🇱 cu a thimmi miphun an si. Zefaniah 2
=======
Israel Ral Hna Biaceihnak; 1. I pum tuah u, ningzah hngal lomi miphun, i pum tuah u, Lamhlatpi ah ṭhawl nan si i favai bangin nan loh hlan le 2. (Bawipa) thinhunnak a kangh in a kangmi cu nan cungah a phak hlanah le Bawipa thinhun ni nan cung i a tlun hlanah i pum tuah u.
3. Ram chungah toidor tein a phung kha a zul i khua a sami vialte hna, Bawipa cu kawl tuah u; Dinnak cu kawl u, toidornak lungthin cu kawl u; Bawipa thinhun ni ah cun dornak nan hmu kho lai lo dahkaw.
4. Zeicahtiah Gaza cu chuahtak a si lai, Ashkelon cu ṭiaotak a si lai; Chun ah Ashdod mi cu dawi an si lai i Ekron mi cu hloh an si lai. 5. Rili kam ram i khua a sami Kereth miphun hna, ngai tuah u, Bawipa bia cu nanmah ralchanh in chim a si cang; Filistin mi hna, nan ram cu ka tei lai i ka hrawh cikcek lai i a chungah ahohmanh um loin ka tuah lai;
6. Cun nang Kereth cu, tuukhal hna thlam le tuu riahnak hmun ah na cang dih lai; 7. Rilikam ram cu Judah ram mi a tangmi hna ta a si lai. Bawipa an Pathian nih a merhnawh hna lai i An vanṭhatnak kha a pek ṭhan hna lai caah An tuurun kha rilikam ah khan an tlonter hna lai i zanlei ah Ashkelon khua inn chungah khan an riak lai.
8. Moab mi nih an nehsawhnak hna le Ammon mi nih an zawmhtaihnak hna kha ka theih cang, Zeitindah ka mi kha an serhsat hna i zeitindah an ramri kha an en hna ti kha ka hngalh. 9. Cucaah ka nunnak chalh in hi bia hi ka chim: Moab cu Sodom bantuk a si lai i Ammon cu Gomorrah bantuk a si lai, Belh pon, a thumi ram pon, zungzal ram car a si lai, tiah Bawipa, Israel Pathian nih a ti. Ka mi hna lak i a nungmi nih khan an ramh hna lai i Ka miphun chungin a tangmi hna nih khan an ram cu an co lai.
10. Ralkapbu Bawipa mi kha an serhsat hna i an zawmhtaih hna caah, mah hihi an i porhlawtnak lehrulhnak cu a si lai. 11. Bawipa nih annih cu a ṭihnunnak vialte he a chuahhnawh hna lai; vawlei cung khuazing vialte cu santlailo ah a ser dih hna lai i miphun dang hna rilikam ram le tikulh vialte nih amah cu an biak lai, mi kip nih anmahle an inn cio in an biak lai.
12. Nannih Kush mi zong, Bawipa vainam in thah nan si lai. 13. Cucaah a kut cu chaklei ah samh seh law Assiria cu hrawk seh, Nineveh cu ṭhio seh law ram car bantukin carter seh. 14. Khika ah saṭil run le ramlak saram vialte kha an bawk lai. Chimbu ki ngei le langta nih a tung ngan pipi par ah cun bu an ser lai, Chimbu pawl cu thlalangawng in an awn lai i langta cu innleng ah an dir lai.
15. Hi khua hi, ka him ko, tiah amah le amah aa porhmi khua a si i, “Keimah hlei in a dang ahohmanh an um ti lo,” tiah aa timi a si. Atu tah zeidah a si cang kun? Pakpalawng hmun, ramlak saram tlonnak hmun, a pawng i a kalmi paoh nih an cekcekhnawhmi le an kuttum thinhnawhmi a si ko cang.
Israel le Kawlram idawtnak; Zei ruangah dah Kawlram khi Israel nih a dawt, a si khawh tawk in bawmh ai zuam hnga? A ruang a um. Judah miphun pawl cu vawlei an va phanhnak kipah hawi nakin an izuam, an hraang i an khiar, a thli thup in an rum tuk hna pinah fimnak lei zongah hawi hlei an hluat fawn hna. An umnak community kip ah mi khepkha, mi khiarcaak le mirum an va si dih ngawt ti si. Zabu 16 hrawng Mirang caṭialthiam William Shakespeare nihkhan “The Merchant of Venice” timi tuanbia a rak hlawi.
Jews pawl sining a rak langhter an ti. Sailok “Shylock” mi khiar rum pa le Antonio an timi, Shylock nih phaisa a rak coih i leiba a rak cham khawh ti lo ruang an tazacuainak kong tuanbia a si. Jews pawl kha Sailok phun rumro khin Zurup ah an rak bualcem kho ko rua. Mah caah Khrihfa a si bak ve komi Hitler nihcun a fih bak in a fih hna; thlachiat an ruat lo tuk a ti ko cuh. Nihin ni ahcun Germany zong nih Israel cu dawt khawh ai zuam. Hitler ruangah chanchung leiba cham ding an ingeih caah a si.
Israel ram cu a hme pirik tuk nain, vawlei hmun zakip rampi timi pawl nih an upat hna. South Korea zong nih an uar in an upat hna. India rampi hmanh nih a upatmi miphun le ram an si. Fiimnak, thiamnak le, rumnak khi anmah sin in a um ti in an ruah hna caah a si. Cu tluk vawlei mithmai a hmu i a sunglawimi Israel nih zei ruangah dah Kawlram a dawt?
1948 i ram ngei lomi Judah miphun pawl nih “Israel” an rak ithanh tikah, ram tampi nih cohlan an rak duh hna lo. Kawlram ah U Nu cozah lio si i, U Nu cozah nihkhan Israel ram thar dirhmi cu a rak dirpi hna. Vote a rak pek. Cu lawng si lo. Israel ram thar a va tlawng hmasa cemtu ram hruaitu cu U Nu a rak si (1955 ah). Hei tuak ve ko. A kulhtu Arab vialte (Jews le Arab khi unau an si; an DNA cun an ilo ngai lai) nih an huat i Zurup tehna zong ah huat a rak tlai ngaimi miphun te kha Kawlram hruaitu nih a rak tlawn hmasa cem hna.
Israel PM hmasa cem David Ben-Gurion timi nihkhan 1961 ah YGN U Nu cozah cu a rak tlawn ve hna. Mah bantuk thil a rak um caah Israel nihcun Kawlram cu a dawt. Cinthlaknak le adangdang lei kong ah a bawmh zungzal. Kawlca bak in chuahmi Israel nih an ram an rak isersiamnak kong vialte Kawlram chungah cun cozah riantlai upa deuh hna sinah cun free in a rak phawt. Mah cucu icawn ve hna seh tiah dawtnak in a rak kan phawtmi si dawh a si.
Israel nihcun Kawlram uknak kong ah raap lei zong a komh hna bantuk in a aak in a aak i volhpamhnak sawh in ram ai thleng lai tiah ai rak ruah sualtu Kawlram mifim cem democracy icon timi Suh Ci tepawl zong cu a dawt thotho hna. “Asia ah Israel nih dawt a duh hmasa bikmi ram cu Kawlram a si; China a si lo” ti in ramkhel bia phai a um phah. Israel miphun cu mimak an si. An thimmi cu thim si ko. Mi ram a lianh ruangah a ṭhin a big hna lo.
Thil poi pakhat belte: nan ti dingmi cu, Min Aung Hlaing kha 2015 lio ah Israel a rak tlawng hna. Ram hnih kar idawtnak fehter chinchin ding kong an va ceih. MAH kha, mah lio caan i Middle East ram pakhat ah hriamnam hmuhsaknak hmun a va kal pah i, Israel he idawtnak a von hrimhṭhan hna bia khi si dawh si.
Mah hnu khan Israel lei i raltuknak le thiamnak company cheukhat hna nih Kawlram chungah rian an von ṭuan chin vima nak kha a si, ti si. Israel ram timi caah cun Kawlram cu zei bantuk uknak i a vai i-uk zongah a rak dirpitu hna ram a si bang a dawt ko lai. An hriamnam thiamnak saang tak phun pawl belte khi cu zumh lomi cu peek rai si lo i mu…