Paletwa Um Ralkap Byu-ha Sakhaan 2 AA Nih A Kah Cuahmah!
=========
Chin ramkulh, Paletwa ah hrambunh mi ralkap Ta-run-ai byuha le Nung-bu byuha sakhaan 2 cu AA nih a kah cuahmah lio a si tiah unau hawikom phu nih thawng an thanh. Ralkap lei nih vanlawng, hriamngan hna bawm in a kham chih ve ko nain AA ralkap pawl nih ngol lo in an kah thluahmah tiah an langhter.
Operation 1027 min in AA nih Rakine ram ah a um mi ralkap sakhaan cu November 13 thawk in kahdohnak a tuah. November 13 kahdohnak ah Rathedaung, Maungdaw le Minbya peng hmun 5 ah kahdohnak a chuak i Rathedaung peng ah a um mi Dung-paih BGF sakhaan le Ching-kha-li BGF sakhaan hna an lak khawh. Minbya peng chung kahdohnak ah ralkap IB 344 in Major Thant Zin Htun (S.B.C) Captain Phyo Zeyar Hliang hna telh in 10 an tlaih khawh hna tiah AA nih a thanh.
Kahdohnak chung ah mithmuh in 10 leng an i hliam tiah an chim. Cun ralkap LIB 232 he a cang mi Maungdaw chaklei, Tinbaw khua pawng kahdohnak zong ah ralkap pakhat telh in ralkap hriam le kahdohnak thilri pawl an lak khawh i Platoon Leader Kyaw Thet Naing telh in 14 hrawng an thi.
November 13 kahdohnak ah AA lei 6 an nunnak a liam tiah an langhter. November 13 ah palek A pauk-wa sakhaan in palek 22 AA sin ah an i fonh tiah an langhter fawn. Cun hmundang in palek 6 zong hriam he an rak i fonh ve tiah an chim. November 13 lawng ah ralkap kuttang BGF, palek sakhaan 40 deng an kaltak i a pawngkam aa naihnak ralkap sakhaan, palek sakhaan pawl ah an i fonh tiah theihternak an tuah.
Chin Ramkulh, Paletwa Ah Kahdohnak A Fak, Ralkap Nih Vanlawng A Hman. Chin ramkulh, Paletwa khua, November 14 zinglei ah AA le ralkap phu hna karlak ah kahdohnak a fak i ralkap nih vanlei kahdohnak a tuah i hriamngan ruang ah nu 2 an thi tiah theih a si.
Paletwa peng, Tarun-ai khua ni tlaklei tlang cung ah a um mi ralkap cu tuzing (November 14) zing sml 2:00am ah AA nih an kah hna caah kaphnih karlak kahdohnak a fak tiah theih a si. Kahdohnak hi khuadei tiang a cang i zinglei sml 7:00am hrawng ah Jet Fighter in bom a thlak tiah theih a si. Rakhine ramchung Rathedaung, Minya le Maungdaw peng hna ah a um mi ralkap sakhaan cu an kah i ralkap lei a thi mi an tam, hriam tampi zong an lak khawh tiah theih a si.
Shan Ram Chaklei Ah MNDAA Nih Ralkap 128 Byu-ha le Adang Sakhaan 2 An Lak Chap. Shan ram chaklei, Kokang hmunhma ah a um mi ralkap 128 byu-ha le Shauk-kai khua lamášhen gate sakhaan le Pa-sin-kyaw khua um ralkap sakhaan hna cu an kah hna i ralkap sakhaan a zapi 141 an lak khawh cang tiah MNDAA nih thawng a thanh.
November 13 zinglei sml 3:30am hrawng ah Shi-shan hmunhma, Shauk-kai khua lamášhen ah a um mi ralkap gate pakhat cu MNDAA nih hriamngan in an kah i kekal ralkap pawl nih an kah hna caah cuka hmun um ralkap zapi an fim khawh hna i hriam tampi an lak khawh tiah theih a si.
November 9 ah Chinshwehaw in chaklei ah a kal i Kokang pengkomh, Ton-shan hmunhma ah a um mi ralkap sakhaan pawl cu MNDAA nih pakhat hnu pakhat an lak thluahmah hnu ah Ton-shan hmunhma ah ralkap uknak zung a umnak hmun lei ah kahdohnak an tuah i ralkap byu-ha umnak, Hehauk tlang sakhaan le Min-shwe-chan ni tlaklei ah a um mi tlang sakhaan cu ni 4 chung an kah hnu November 12 zaanlei sml 3:50pm ah ralkap 128 cu thazang tampi in zaanlei sml 4:20pm ah an lut kho i zaanlei sml 4:50pm ah an lak khawh.
Cubantuk in zaanlei sml 5:17pm ah Kokang peng, Hung-Shin hmunhma, Chungkan khua sakhaan cu MNDAA le dothlennak phu pawl nih an lak khawh. November 12 chun sml 1:00pm hrawng ah Laicung hmunhma ah a um mi ralkap sakhaan cu MNDAA le Monekoe, Kutkai hmunhma dothlennak phu pawl nih an lak, cun Lashio ah a um mi ralkap 507 battalion cu MNDAA nih hriamngan in voi 11 an kah i meng 12 tung ah um ralkap sakhaan zong voikhat an kah.
Kyaikmaraw Ah Battalion Commander Telh In 14 An Thi, Ralkap 23 Nih A Sung An Pek. Ralkap Brigade 22 kuttang ralkap pawl cu Mon ram, Kyaikmaraw peng, Chaung-na-khua ah an lut i dothlennak phu pawl he kahdohnak a chuak. Kahdohnak chung ah Battalion Commander Lt. Colonel telh in ralkap 14 an thi, 6 a nung in an tlaih hna i 23 nih hriam chiah in a sung an pek tiah NUG Ministry of Defense nih a thanh.
Kahdohnak chung ah Battalion Commander telh in 14 an thi, ralbawi 1 telh in 5 a nung in an tlaih hna, adang ralbawi 1 telh in 8 an tlau rih tiah Ministry of Defense nih a thanh. Cun Mon ram, Kyaikmaraw peng, Chaung-na-khua palek sakhaan le hlei cu dothlennak phu pawl nih an lak tiah dothlennak phu pawl nih an thanh. Cu palek sakhaan le hlei an lak lio ah ralkap chungtel tampi an zaam tiah theih a si.