Paletwa Peng Um SAC Sakhan 2 Cu Rakhine Ralkap AA Nih An Laak Chap
=========
Chin ramkulh, Paletwa peng ah SAC ralhrang nih umhmun an khuarnak Hkan-khah sakhan cu Rakhine ralkap AA nih tlamtlingte in an laak khawh pinah hriamnam tam ngai zong an laak chih khawh, tiah nitlaklei unau thum hna nih nizan January 13 zan ah thawng an thanh.
Cu pinah Paletwa-Kyauktaw ramri ah ummi Meewa SAC sakhan zong January 13, zan suimilam 6:00 tluk ah an laak khawh chap i Paletwa peng chung um SAC ralhrang sakhan 20nak tlawm lo cu Rakhine ralkap AA nih an laak khawh cang, tiah an langhter.
SAC ralhrang nih umhmun an khuarnak Meewa sakhan cu 2024, January 1 in kahdoh hram kan thok cang i nizan January 13 ah tlamtlingte in kan laak khawh. Cu sakhan laaknak ah kan laak chihmi hriamnam pawl zong kan langhter te lai, tiah Rakhine ralkap AA nih thawng an thanh.
Meewa sakhan laak kahdohnak lio ah SAC ralhrang nih cunglei kahdohnak a tuahmi ruang ah tualchung mi 1 nunnak a liam i inn tam ngai zong a rawk, tiah nitlaklei unau thum nih cathanh an chuahmi ah an langhter chih.
Mindat Khuapi Ah Phungki Le Tualchung Mi, SAC Ralhrang Chungkhar Hna Nih Duhlonak An Langhter. Myanmar ram Buddhist a biatu hna nih an biakmi pura hrawktu hna cu faakpi in kan doh hna tiah, January 12 ah Mindat khuapi ah duhlonak an langhter. Duhlonak a langhtertu hna lak ah phungki le tualchung mi cheukhat an i tel i SAC ralhrang Khah-lah-yiah 274 Battalion pawngkam hna ah an i pum hna, tiah The Mindat Post nih a langhter.
Aluan ciami January 8 ah Myanmar National Democratic Alliance Army(MNDAA) ralthuam aa hrukmi mino pakhat nih sobul in pura a tuk lio video cu Social Network ah hmuh a si i SAC ralhrang nih nitlaklei unau thum hna phu hi biaknak lei thil ruhrang ṭuanmi an si tiin an puh hna hnu ah atu bantuk in duhlonak an langhter mi cu hmuh a si, tiah a langhter chih.
Hi kong he pehtlai in cu mino nihcun amah pumpak in a tuahmi a si i Kokang ralkap tlamtlin lo ruang ah a si, tiah MNDAA nih ngaihthiam halnak cathanh an chuah. SAC ralhrang nih nawlngeihnak a laak thok in kum 2 leng caan chung ah cunglei kahdohnak a tuahmi ruang ah biaknak lei inn 80 tluk deng a rawk cang, tiah NUG cozah nih 2024, January thlachung ah thawng an thanhmi in kan theih.
Kalaymyo Peng Pyusawhti 1 Cu CDF – KKG Sin Ah Aa Fonh. Sagaing ramṭhen, Kalaymyo peng, pyusawhti ralhrang 1 cu January 12 ah hriamnam hna he CDF-KKG sin ah aa fonh, tiah Chinland Defense Force, Kalay-Kabaw-Gangaw (CDF – KKG) nih nizan ah cathanh an chuah.
CDF-KKG sin ah aa fonh mi pyusawhti ralhrang nih meithal zuun 1 le kuanfang 170 zong aa ken chih caah tangka sing (20) laksawng kan pek i, a himnak hmun ah kan thlah, tiah Chinland Defense Force, Kalay-Kabaw-Gangaw (CDF – KKG) nih cathanh an chuahmi ah an langhter.
Tuluk Hmunlai Lungmeihol Laaknak Hmun Puahkehnak In Minung 10 An Thi, 6 Konglam Theih Lo In An Tlau. Tuluk hmunlai Pingdingshan khuapi lungmeihol laaknak hmun ah a chuakmi puahkehnak in minung 10 naak tlawmlo an thi, 6 an tlau, tiah ṭuanvo ngeitu hna nih an chim. Pingdingshan Tianan Coal Mining company nih a ngeih mi hmunram chung lungmeihol le gas puahkehnak a chuak sualmi a si tiah Bureau nih a langhter.
Vawlei tang i rianṭuan minung 425 an um lio ah puahkehnak hi cangmi a si. A tlaumi chanhchuah le thil a can ning cu ṭuanvo ngeitu hna nih hlathlainak an tuah lio a si tiah VOM Media nih a langhter. Henan ramkulh, lungmeihol tambiknak Pendixian hmunhma i cansualnak a chuah hnu in lungmeihol ser le kuatnak lei ah harsatnak tampi a um tiah theih a si.
Tu Tiang Theih Khawh Mi Thawng; Taingen Kahdohnak Ah Mipi Ralkap 2 Nunnak Liam. Chin ramkulh, Tedim peng, Taingen khua pawng SAC ralhrang camp cu January 12, ah thok in mipi ralkap phufonh nih an kah hna tiah theih a si.
January 13, zaan suimilam 8:00 tluk ah SAC ralhrang nih raltuknak vanlawng hmangin Taingen khua ah bomb voi hnih an thlak. Cu pin ah Kalaymyo, Taungphila tlang in hriamngan dongcat lo in an kah,” tiah an langhter.
Kalay in Taingen lei cu SAC ralhrang nih hriamngan dongcat loin an kah caah zaanlei sang khan CDF-Hakha in Salai Tluang Tin Ceu le CDF-KKG in Salai Pum Kai an nunnak a liam tiah kan theih.
Taingen kahdohnak ah aa telmi mipi ralkap phufonh hna cu CNA, CDF CDM Siyin, CDF-KKG, CDF -Thantlang, CDF-Hakha, PDA le CDF-Hualngoram hna an si tiah an langhter.