Paletwa Kahdohnak Chung In An Lak Khawh Mi Hriam Pawl AA Nih A Langhter
=======
Chin ramkulh, Paletwa hmunhma hrambunh ralkap sakhaan a si mi LIB 289, MOC 19 hna cu AA nih tlamtling tein an lak hnu ah ralkap sakhaan pawl chung in an lak mi hriam le khuanzen pawl cu AA nih a langhter. Paletwa hmunhma ah a tang mi ralkap Hna-ma-da byuha cu January 14 chun sml 3:00pm hrawng ah tlamtling tein a lak khawh hnu ah Paletwa hmunhma cu ralkap a thiannak hmunhma a si cang tiah AA nih a thanh.
AA nih Paletwa kahdohnak ah a laak mi SAC ralkap hriamnam kuanzen pawl a langhter. Paletwa hrambunh SAC Infantry Division hmaisuang hmunpi a si mi IB-289 le OCH-19 hna cu AA nih an laak hna i, cuka ah an laak mi SAC ralkap hriamnam kuanzen pawl cu nihin, January 18 ah hmuhsaknak an tuah.
Paletwa Hmunram Ah SAC Ralhrang Sin In AA Nih An Laak Mi Hriamnam Le Ralthuam Hna. Chin ramkulh, Paletwa hmunram hrambunh SAC ralhrang ralhmai sakhanpi simi Khah-lah-yiah 289, Sah-kah-khah 19 hna cu Rakhine ralkap AA nih tlamtlingte in an laak khawh pinah hriamnam le ralthuam tam ngai an laak chih mi pawl cu AA nih an langhter.
Kalaymyo Pholamin Changreu Dawr Pakhat Ah SAC Ralkap Nih Minung 15 An Tlaih Hna. Sagaing ramṭhen, Kalaymyo Panglong sang Pholamin changreu dawr cu a luancia January 15 ni ah SAC ralkap pawl nih luhhnawh in dawr ngeitu telh in rianṭuantu hna le changreu a caw liomi, an zate minung 15 an tlaih hna i chungkhar lei nih nihin tiang an pehtlai kho hna lo, tiah Kalaymyo tualchung mi nih an chim.
Pholamin changreu dawr ngeitu Daw Htay Sein telh in minung 15 an tlaih mi hna cu Kalaymyo Dah-Kah-Sah ah thong an thlak hna i, nihin January 18 tiang ah chungkhar nih an pehtlai kho hna lo. Kalaymyo SAC ralkap nih khuachung ah tualchung mi atu le tu an check hna i hramhram in tangka zong an hal hna, tiah tualchung mi nih an chim.
Ramkhel thongtla zohkhenhtu phu AAPP nih nizan January 17 ni an langhter ning ah SAC ralkap nih hramhram in nawlngeihnak an laak hnu in Myanmar ram hmunkip ah tlaih a tong mi 25,830 an si i, cu chung ah minung 19,930 cu an thlah rih hna lo.
SAC Ralkap Hriamngan Le Vanlawng Kahdohnak Ruang Ah Kyauktaw le Sittwe Ah Tualchung Mi 10 An Thi. Rakhine ramkulh, Kyauktaw peng le Sittwe peng ah SAC ralkap nih hriamngan le vanlawng in kahdohnak an tuah ruang ah tualchung mi 10 an thi i minung tam ngai hliam an pu, tiah chaklei hriamtlai phu unau thum nih an thanh.
Nizan January 17, chunhnu suimilam 1:56 ah Kyauktaw peng Pyichaung hmunram Lintzin khua thar ah SAC ralkap nih hriamngan an kah i, khuapi chung in ral a zaam mi hna an i dornak inn, phungki sianginn le sianginn hna ah hriamngan kuan cu a tla i tualchung mi 10 nak tlawm lo an thi. Cu pin ah nizan January 17, ṭhiamṭhiam zinglei suimilam 6:30 hrawng ah Kyauktaw peng Tayettapin khua ah SAC ralkap hriamngan kahnak in U Saw Hla Tun (kum 52) a nunnak a liam, tiah tualchung mi nih an chim.
January 16, zanlei suimilam 6:45 ah Sittwe peng Wabo khuami pahnih cu SAC ralkap hriamngan ruang ah hliam fak ngai an pu. Cu pin ah nizan January 17, zanlei suimilam 5:00 hrawng ah Kyauktaw peng, Pyichaung hmunram Waigyithaungh khua le a kiangkap ah SAC ralkap nih Helicopter in bomb an thlak i tualchung mi 5 an thih pinah hliam a pu mi an tam, tiah theih a si.