Paletwa le Rakhine Ah Ralzaam 25,000 Leng An Karh!
============
Chin ramkulh Paletwa peng le Rakhine ram hna ah ralkap le AA karlak ah kahdohnak a chuak i innlo a zaam tak mi 25,000 leng an karh tiah UNOCHA nih November 17 ah an thanh. UN nih November 16 tiang a thanh mi cazin ning ah Chin ramkulh Paletwa le Rakhine ram hna ah ralzaam 90,000 tiang an karh cang tiah UNOCHA nih a thanh.
Cu chung ah a thar aa chap mi 26,000 leng hi kumkhat leng a daih hnu in a rak chuak ṭhan mi kahdohnak ruang ah a zaam mi an si hna. Atu cazin hi ahlan ah a rak um cia mi Rohingya ralzaam sing 1 le cheu telh lo in aa chap mi an si tiah UN OCHA nih cathanh ah a langhter.
AA zong nih Rakhine ram, Paukdaw khua a lak hnu in ralkap nih chut kho ṭhan ve ding in vanlei le tilei he kahdohnak a tuah tiah UN OCHA nih a thanh. A luancia ni 2 chung ah Paukdaw, Maungdaw le Chin ramkulh Paletwa peng hna ah kahdohnak a chuak i Kyaukdaw, Minbya, Mrauk U, Myebon, Sittwe le Ponna peng hna ah kahdohnak um lo in AA nih a tlaihnak hmunhma pawl ah ralkap nih hriamngan a kah tiah UN OCHA nih a chim.
Atulio ah ralkap nih Yangon-Sittwe lam telh in Rakhine ram caah a biapi mi vawlei lei lam le ti lam hna cu a phih i mipi umkalnak le bawmhnak zong ri a khiah tiah UN OCHA nih cathanh ah a langhter.
Kyaikmaraw, Chaung-na-khua Ah A Kai Mi Ralkap Pawl Kahdohnak Ah Hriam Tampi An Lak. Mon ram, Kyaikmaraw peng, Chaung-na-khua ah a rak kai mi ralkap pawl cu dothlennak phu pawl nih an kah hna i ralkap ruak pakhat le hriam tampi an lak khawh tiah dothlennak phu pawl nih an thanh.
November 17 zaan sml 11:00pm ah Chaung-na-khua ah a rak lut mi ralkap pawl cu dothlennak phu pawl nih an kah hna, ralkap lei a thi mi an tam caah hnu an kir ṭhan, cu ni ah dothlennak phu pawl nih hmunhma zohfelnak an va tuah i ruak 1 le hriam tampi an lak tiah theih a si. KNU, PDF phu pawl nih Kyaikmaraw peng, Chuang-na-khua hlei an lak hnu ah ralkap nih vanlawng in bom a thlak, pehzulh in kahdohnak an tuah tiah theih a si.
Shwegyin Peng, IB 351 Sakhaan Cu Minutes 10 Chung Ah KNU Nih An Lak. Bago ramṭhen, Shwegyin peng, IB 351 sakhaan cu minutes 10 chung ah KNU nih an kah i an lak khawh tiah thawng an thanh. November 17 zinglei sml 5:30am hrawng ah KNU hmunhma, Shwegyin peng ah KNLA le dothlennak phu pawl nih ralkap IB 351 sakhaan cu minutes 10 chung ah an kah i an lak tiah theih a si.
Kahdohnak chung in ralkap a thi mi le hliam a tuar mi zat a fiang in theih a si lo tiah an thanh fawn. Sakhaan lak kahdohnak chung in 60MM hriamngan 1, 60MM kuan 53, RPG-7 kuan 26, MA bom 13, MA 1,126, Grenade 20, M-14 bom 9, RPG-7 lung 17, 60MM size 1, chawnhbiaknak (MA3. MA 2008) 1, Inverter 1, MA kuanbawm 4, German (CM. 3024-z) 1, kuan khamnak luchin 9, solar 2, phone 1 le adang kahdohnak thilri pawl an lak khawh tiah theih a si.
Namhkham Peng, Panse Pyithusit Sakhaan TNLA Nih An Lak. Shan ram chaklei, Namhkham peng, Panse pyithusit sakhaan cu TNLA nih November 19 ah an lak tiah an thanh. TNLA Brigade 1 hmunhma ah a um mi cu pyithusit sakhaan ah ralkap pawl zong an i tel tiah TNLA lei nih an chim.
Panse pyithusit hruaitu U Kyaw Myint hi ralkap council hruaitu Gen. Min Aung Hliang nih September thlachung ah pyithusit hruaitu pawl he tonnak a ngeih lio ah aa tel ve mi a si. Cu tonnak ah ralkap council hruaitu Gen. Min Aung Hliang nih pyithusit pawl hi ralkap he fonh in hmunhma humhimnak rian kan tuah thluahmah lai tiah a chim.
A luancia November 4 zong ah TNLA Brigade 6 hmunhma, Lashio peng, Jayan pyithusit sakhaan zong an lak cang i pyithusit chungtel 38 cu an hriam he an tlaih hna tiah TNLA nih an thanh. November 18 ah Namhkam peng ah a um mi ralkap thitkone sakhaan pakhat zong TNLA nih an rak lak. Ralkap council chimphuannak nawl a ngeitu Zaw Min Htun nih cun Namhkham peng ah a um mi ralkap sakhaan an kah hna i an sung tiah November 18 ah Media pawl sin ah a chim.
A Zaam Mi Ralkap 29 Cu Myanmar Lei Ah India Nih A Kuat Cang. Myanmar ram in India lei ah a zaam mi ralkap chungtel 29 cu nithum a rauh hnu ah India cozah nih Myanmar ram ah a kuat ṭhan hna.
Chin ramkulh, Falam peng, ralkap Tibual sakhaan cu CNDF nih an lak tiah an thanh hnu in November 16 ah Mizoram ah a zaam mi ralkap chungtel 29 cu India cozah nih November 19 ah Myanmar ram ralkap phu sin ah a kuat ṭhan hna hi a si tiah RFA zong nih a fehter ve.
India vanlei ralkap nih an ngeih mi Helicopter 2 in Mizoram, Champhai pengkomh in Moe-Ye khua ah a kuat hna hnu in ralkap bawingan pawl sin ah a ap ṭhan hna tiah The Statesman thawngzamh nih November 19 ah a langhter. Biometric cazin ṭha tein an check hna hnu ah ralkap chungtel 29 cu Mo-ye in khatlei hrap, Myanmar ram lei Tamu ah an ap hna tiah rianngeitu nih an chim.
Major 1 le Captain 1 telh in ralkap chungtel 29 cu Mizoram, Champhai pengkomh ah November 16 ah an zaam tiah peng palek bawi zong nih RFA ah a chim. Cu kong pawl he pehtlai in RFA nih a fehter mi thawngpang The Chinland Post nih kan rak thlah chin mi a si.