Nungak Ms. Lily Thai Kum 23 Cu A Mah Duh Thimnak In A Nunnak Lak Piak A Si Lai
=========
June 22, 2023; tuni ah nungak Ms. Lily Thai kum 23 cu a nunnak lak piak a si lai. Sii-bawi nih IV ah an lutter lai i, second 10 chung in a nunnak a liam cang lai. Ms. Lily Thai hi Australia peng Adelaide ah khua sa in ummi si tiah an langhter.
Ms. Lily Thai hi aa zawtnak tamtuk cang ruangah amah pumpak duhthimnak tein a nunnak lak piak a si lai tiah theih asi. A bia cah ta mi; Ka ruak cung ah papar phun phun nan ka peknak in phaisa tampi rak chia uh. Phaisa hin mi harsa rethei tampi rak bawm hna uh kei cu Vanram ah nuam tein ka din cang lai zeihmenh pek ka hau ti lo tiah biacahnak ca tlap a chiah ta.
2023, June 21, zinglei suimilam 8:30 tluk ah Magway ramṭhen, Htilin peng, Tharakhar (သရခါ) khua in thlanglei hmun um tiva pawng ah Yaw Revolution Army le ṭangṭi phufonh nih SAC ralhrang thazaang 100 leng cu bomb in an puahhnawh hna caah SAC ralhrang 5 an thi pinah hliampumi 10 an si, tiah YRA in ṭuanvo ngeitu pakhat nih a chim.
“Htilin khuapi in a chuakmi Sah-khah/Pah-khah fonh thazaang 100 leng ralhrang pawl an ratnak ding lam ah bomb kan hmanh. Kan bomb hmanhmi hi kan ral an thazaang a der ning rup in ṭha tein kan hmanh/do” tiah a chunglei upa nih a chim.
June 21, 2023; zanlei suimilam 5:00 tluk ah Magway ramṭhen Saw peng Ywar Thar Ywar khua cu SAC ralhrang nih Kyukhtu hriamngan an kah caah tualchung mi pahnih telh in 7 hliam an tuar tiah theih asi. Ruang um lo le kahdohnak um lo SAC ralhrang hriamnga kahnak in hliam fak tuar mi 4 hna cu si-inn pi ah rianrang in tlikpi colh an si tiah an langhter.
Magway ramṭhen Gangaw pengkomh Saw peng Laung She khua tualchung mi 400 tluk cu din-ei awk ah chambau ngai in an um tiah an chimchip. Magway ramthen Pakukko peng, Poukdaw khua ah June 20 zan an ihkar ah chungkhar nu lawngte minung 5 hna cu thah an tong tiah kan theih.
Thah a tong mi hna hi chungkhat sahlawh lawngte nu minung 5 an si i meithal le nam hman in a thih hi a si.
“Zan an ih kar zantim 12 ah mizei titheih lo mi minung 5/6 hrawng nih an thah hna tiah kan theih. Thah a tongmi chungin an tapa pakhat zong a luan cio zarh lio ah an rak thah bal ve. SAC ralhrang nih checkhlatnak zong an rak tuah.”tiah Pakkuko khuami pakhat nih a chim.
Thah a tongmi hna hi Sein Sein Aye (kum 42),Han Sein Nywe (kum 39), Yar Moe Aung (kum 14), Khin Mar Lyn (kum 28) le Aye Thi Da (kum 25) hna an si. An ruak cu June 21 ah an vui hna tiah kan theih.