Kum 2 Chung Ah Chin Ramkulh Um SAC Ralhrang Sakhan 9 An Lak Khawh
=========
SAC ralhrang nih uknak lak hnu in kum 2 chung Chin ramkulh ah ralhrang umhmun khuarnak sakhan 9 lak a si cang tiah Ministry of Defence-NUG nih September 7 ah a langh ter. Mipi ralkap nih SAC ralhrang kum 2 chung a dohnak le a cawlcangh nak cu NUG nih langh ter in thanhca an chuah hi a si.
Hi kum 2 chung kahdohnak ah Chin ramkulh chungah SAC ralhrang sakhan lak lio kahdohnak he telh in voi 550 kaphnih kahdohnak a chuak. Myanmar rampi huap in SAC ralhrang sakhan 135 lak a si cang. Hakha-Falam kar Chuncung khua ah CNA le Chin ralkap ṭangṭi phu nih ralhrang raltuknak EE-9 Cascavel motor Tank 2 an hrawh mi kong zong NUG nih a langhter chih.
Chin ramkulh ah ralhrang sakhan 9 an lak mi kong cu NUG nih fiang in a langhter lo nain, Thantlang sakhan, Lungler sakhan, Mindat peng Makuinu sakhan, Matupi peng ralram ralhrang sakhan pakhat, Falam peng Vaar sakhan le Tonzaang khua Darkhaing sakhan hna cu Chin ralkap nih an lak hna. Mah pin ah SAC ralhrang nih Chin ramkulh ah inn 1,630 renglo an khangh i Sagaing le Magway ramthen chungah inn an khangh mi a tam bik tiah Dalta for Myanmar nih August thla lio ah a langh ter.
Chin Ramkulh Chung Ah SAC Ralkap Sakhaan Voi 9 An Lak. Hramhram in uknak lak a si hnu, Chin ramkulh chung ah SAC ralkap sakhaan voi 9 an lak khawh tiah NUG Ministry of Defense nih cathanh chung ah a langhter. A luancia kum 2 chung, Chin ramkulh hmunkip ah SAC ralkap sakhaan lak kahdohnak telh in kahdohnak voi 550 leng a cang tiah theih a si. Cun Myanmar ram pumpi huap in SAC ralkap sakhaan lak kahdohnak voi 135 a cang tiah cathanh ah an ṭial.
Chin ramkulh chung, SAC ralkap sakhaan lak kahdohnak pawl hi a fiang in NUG nih a langhter lo nain Surkhua sakhaan khanghnak, Vuangtu sakhaan khanghnak, Thantlang khuachung sakhaan laknak, Lungler sakhaan laknak, Mindat Makui-ingnu khua sakhaan laknak, Matupi peng ka-kin sakhaan lak kahdohnak, Falam peng Tibual sakhaan le Vaar sakhaan laknak hna telh in Tonzang Darkhai sakhaan lak kahdohnak hna Chin ramkulh chung ah a cang.
NUG cathanh chung ah Hakha-Falam karlak Chuncung khua ah CNA le CDF hna bawm in SAC ralkap EE-9 Cascavel Tank 2 an hrawh khawh nak zong kha an telh. Hriamtlaih dothlennak aa thawk in kum 2 chung ah SAC ralkap lei a thi mi an tam bantuk in Chin hriamtlai phu le khuami hna zong a nunnak a liam mi an tam ve. Cun SAC ralkap nih Chin ramkulh chung an khangh mi mipi inn hi 1,630 leng a um cang tiah Data for Myanmar nih August thla hramthawk lei ah a thanh.
Myawaddy Palik Sakhan Drone Bomb Thlakhnawhnak In Hliamtuar Mi Palik 4 An Thi Chap. Karen ramkulh Myawaddy khua chung pengkomh palik sakhan Drone Bomb thlak hnawhnak in hliam a tuar mi chungin SAC ralhrang kuttang Palik 4 an thih chap tiah theih a si.
September 3 zan suimilam 7 tluk ah Myawaddy khua pengkomh Palik sakhan Bomb thlak hnawh mi cu hlathlai le zohfel ding ah a kal mi hna cu Drone in Bomb an thlak hnawh than hna caah caan karlak SAC ralhrang Commander le palik bawi telh in 5 an rak thi. September 5 ah hliamfak a tuar mi palik 4 an thih than caah a thi mi dihlak 9 an si cang.
“Hliamfak a tuar mi palik bawi pakhat zong aa thlop lio a si, Myawaddy in Maesot siizung ah an lanhter mi hna chungin palik 4 an thih hi a si. A tu lio ah palik 7 cu Maesot siizung ah an i thlop lio a si.” tiah siizung he neihniam pakhat nih a chim.
Drone Bomb thlak hnu September 4 thok in SAC ralhrang nih Let-khet-taung sakhan lei cu hriamngan le raltuk vanlawng in nifa tin a kah lengmang nain mipi hriamtlai pawl cu kan him tiah Cobra Column tuanvo ngeitu pakhat nih a chim.
SAC Ralhrang hmunhma khuarnak lawng i sel in kahdohnak kan tuah caah ralhrang he neihniam ah a um mi ralhrang chungkhar, zung riantuan mi hna nih nan um nak hmun in i thialkam dih u tiah Federal Wings Drone team nih ralrin peknak an langh ter.
Sagaing Ramṭhen Nikhat Chungah Minung 8 An Tlaih Hna Hnu I An Kahthah Mi Hna Ruak Hmuh Asi. September 6, zinglei sangah Sagaing ramṭhen Mongwa peng Kyweye khua le Kyemon khua pawngah minung 8 an tlaih hna hnu ah an kahthah hna tiah tualchung chiatṭhat zohkhenh tu nih an chim.
September 6, zing suimilam 7:00 tluk ah Kyemon khua ah minung 6 an tlaih hna hnu ah an kahthah hna. Chunhnu suimilam 2:00 tluk ah Kyweye khua ah tleirawl pakhat tlai ṭhan in an kahthah. Cu bantuk ṭhiam in Tamu peng Khua pakhat ah zanlei suimilam 3:00 tluk khan tleirawl 1 tlai in an kahthah ṭhan nikhat chungah minung 8 an thi tiah tualchung mi nih an chim.
Thah tongmi minung 8 hna hi an dihlak in hriamtlai mi ansi hna an thihnak hmun ah ah hin hriamthil a um dih tiah an langhter. Hi kong he pehtlaiin, mi thattu hriamtlai phu hi zei bantuk hriamtlai phu dah ansi hnga timi cu Sagaing ramṭhen cozah rianṭuan tu hna nih hlathlainak an tuah liopi asi tiah an langhter chih.
Mizoram Sekhum Ramchung Ah Minung Lu Ruhro Le Pheiruh An Hmuh. September 6, zanlei suimilam 4:00 tluk khan Mizoram Sekhum ramchung tiva pakhat ah minung ruhro ah zumh/ruah an hmuh caah Lunglei palik nih la in thilumtuning an hlathlai tiah theih asi.
Sekhum khuami sin in Zalen News nih thawngpang a theih ning cun, September 6, zanlei suimilam 4:00 tluk khan cangai (Crab) khawrh dingah kalmi Sekhum tualchungmi hna nih an ramchung Ramlai tiva he an i ramrinak tiva pakhat ah minung (Lu Ruhro) le (Pheiruh) ah ruah/zumh micu an hmuh tiah a langhter.
Hi kong he pehtlaiin, Lunglei palik cheukhat hna cu a hmun ah kal in (Ruhro) hna cu an lak check-hlatnak an tuah tiah theih asi. Sekhum khuami nih (Ruhro) konglam he pehtlaiin zumhmi le lunghrinhmi an ngeilo. Sihmanhsehlaw kum hmasa khan atu (Ruhro) an hmuhnak chak motor lam ah hin Taxi caan saupi chung aa hung mah hna cu asi hnga dekmaw tiah an ruah/zumhnak palik sin ah an chim. Credit: Lungmili Media, The Chinland Post