Northern Alliance Pawl Nih Ralhrang Hauruang Ngan An Baoh!
==========
Tlangcung hriamtlai phu tambik umnak le thazaang a thawngbik mi umnak hi Shanram hi a si. Cucaah ralhrang pawl nihhin a ralkap tambik hi Shan ram ah a chiah ve hna. Tlangcung States sinah Regional Military Command a chiah mi hna zoh tikah Shan ram ah an tam bik. A dang Tlangcung State ahcun Command pakhat lawng a chiah nain Shan ram ahcun Command 3 bak a chiah hna. Tlangcung hriamtlai phu lak ah thazaang a thawng bak kan timi Kachin ram ahkhin Nortthern Command pakhat lawng a chiah.
Shan ram tu ahcun Norttherm Command/ Eastern Command le Triangle Command tiin 3 a chiah hna. Culawng hmanh siloin Eastern Command ah hin infantry battions 42 a chiah hna i Command vialte ah battalions tambik an si. Atawifiannakin chim ahcun ralhrang pawl an thazaang tambik an chiahnak hi Shan ram ah a si. Khi tluk a thawngmi KIA hmunhma ah Command pakhat lawng a chiah lio ah Shan ram ah Command 3 a chiah mi hna zohtik ah zeitlik in dah Shan khi a biapi ah a chiah timi hmuh khawh a si.
Pau dohthlennak hnu ah ralhrang pawl nih a kan tuk ning zoh tikah Ralhrang nih China Cozah aa sawm i, MNDAA/ TNLA le AA pawl an itelnak UWSA hruaimi FPNCC bu pawl kha China special envoy Deng Ji Jun nih a ton hna i, i kap lo dingin hna tlak nak a tuahpi hna.
Hi i kah lonak hnatlak nak hi ralhrang pawl nih caantha ah an lak i, Shan ram a ralkap pawl hi karen ram KNU, Karenni le PDF pawl tuknak ah a hman hna.Kan Chin ram tu hi Rakhine ah a chiahmi hna ‘tatmah’ cheukhat a hman ve hna. Shan ram ah a chiahmi hna a ralkap pawl thazaang a lak mi hna hi battalions 30 hrawng an si lai’ ti hi ral lei a dothlet mi nih an zumh ning a si.
Ralhrang pawl thazaang tambik nak Shan ram ah MNDAA, TNLA le AA phufonh nih Operation 1022 min bunh in an kah hna tikah chikkhat te ah Sakhan 30 an lak colh. Pau dohthlennak vialte chungah atutan hi ralhrang pawl an sunghbik lio caan a si. Atubantuk in ralhrang pawl an sunghnak a ruang hi, Shan ram ah a chiahmi hna ralkap thazang a zuh i, hmundang ah ahman mi hna hi a ruang pakhat a si ve. Hihi Northern Alliance pawl nih caan tha ah an hman ve.
Shan ram kahdohnak a chuak paoh ah lantak awk a tha lo mi cu; China a ruahnak hi a si. Khelkhat in kan chim ahcun AA tel in Shan ram hram bunh hriamtlai phu hna an pu cu; China a si caah China nih dirh uh a ti hna paoh ah an dir i, thu uh an ti hna paoh ah an thu. Atutiang China a bia ngai tikah i kap lo hi a tha tiah kan ruah tilawng an chim rih. Kap hnih i kapnak ah remdainak ser kan i zuam lai? tibantuk bia an chim rih lo.
Cucaah China a dirhmun hi hmailei zeidah a lawh lai’ tihi theih a har ngai. Ruah awk ngai a simi cu; Northern Alliance pawl nih hin an pu China bia hi an ngai thai lai maw? ti hi a si. A ruang cu; an thanhca statement zoh tikah ralhrang pawl an hram in kan bongh hna lai’ ti biafang an hman caah an hram kan bongh hna hlan lo chung cu kan ngol lailo’ tih lei khi an statement nih a hoih. Cucaah China nih thu uh a ti hna zongah atutan cu kan thu rih lailoh, an ti khawh mi a si.
Chimhduh mi cu; cu hlan Northern pawl an statement kan zoh tikah an hram in kan bongh hna lai, ‘tih biafang hi anhman bal loh. Atutan ahcun hram bongh timi bia fang anhman caah fawi le bai cun ikah nak hi an ngol lem lai lo, ‘ti hi zumh a um ngai.
Ka chimh duh bik mi cu; ralhrang pawl nih thazang tambik an chiahnak Shan ram ah unau phufonh nih chikkhat te ah an Sakhan 30 an lak khawh mi khi, ralhrang caah cun an hauruang ngan tukmi a cimh tinak khi a si. An hau ruang thabik Shan ram hmanh a cimh ahcun a dang tlangcung an hau ruang hi cu fawi te in kan baoh khawh cang lai tinak a si. Ram pumpi in ral kan tuk tikah mah le zawn cio in ral tei hi ram pumpi teinak a si ko nain, Bu ngan deuh nih hmunhma ngan ah an tei mi nihhin a let tamtuk in hmual a ngei. Shan ram ah sakhan 30 a sungh leh cangka in Neypyidaw an hmunpi tiang a him colh tilo.
Shan ram ah a sungh leh cangka in Neypyidaw a him tilo ti an theih caah ralkap tampi nih neypyidaw an ven colh. Langhter duhmi cu bu ngan pawl nih ral an tei mi hi a lian i, hmual a lian khun. Pau dohthlennak hnu ah atutan Shan ram ikah hi an sungh bik lio caan a si caah order zong thathi in an i pe kho ti hna lo. Acunglei nih order thathi in pek khawh lo in ral va tuk khi,zan mui ah chengpalang ah tlak sual bantuk khi a si.
Biadangpi ah vaurawng ah ka rak chim balmi cu; politics hi Uico i seh bantuk a si. Uico an i seh tikah a tei mi paoh Uico dang nih an bawmh ve tawn ka ti. Kan dohthlennak hi kan tei deuh paoh ahcun cuhlan a kan bawmh duhlo mi ram pawl zong hi kan sinah an tang teh ko lai. Cucaah kan tei deuh deuh lai i, kawikawm thar le bawmhtu tam deuh kan neih ve teh lai. Credit: Van Neih Thang