SAC tang zung riantuan Non CDM pawl ralkap tla ding in auh an si tik ah Meithat pawl cu a hmasa bik ah auh an si lai tiah theih a si.
“Meithat riantuan pawl cu papek in auh colh an si lai tiah kan theih. Atu cazin an kan khomhter cang. Ramthen, pengkomh, peng le sang/khuate tiang an i tel dih. Min cazin an khawmh cang,” tiah Myanmar Meithat Zung Hmunpi thawng hram nih Khit Thit Media ah a chim.
Nawlngeihnak chuttu SAC nih February 15 ah Sang/khuate dot in ralkap tla ding mi khawmtu phu a ser cang hna i, cu phu nih cun a ra lai mi ni tlawmpal ah ralkap tla ding min cazin an thanh lai. A min aa tel mi hna nih April thla dih ah SAC ralkap khawmtu phu hna he pehtlaihnak tuah a si lai, tiah theih a si.
SAC nih Yangon ramthen tel in ram pumpi ah, ralkap tla kho ding rikhiah a tlih mi Non CDM pawl min cazin zong ni thum chung ah laak ding in lakhruak nawlpeknak ca a chuah tiah kan theih.
Myanmar ram hmun kip ah SAC nih khualtlung cazin an check i ralkap tla ding in mino tampi hramhram in an tlaih hna tiah theih a Crd:THP
Thawngpang dang: Chinram Hriamtlaiphu Hna Nih Chin Mino Mipi Ralkap Lut Ding In An Sawm Hna. SAC ralhrang nih an chuahmi ” People’s Military Service Law of 2010 ” phung thar he pehtlai in Chinram hriamtlaiphu CNA, CDF-Mara le CDF -Kanpalet hna nih Chin mino hna mipi ralkap lut ding in sawmnak cathanh an chuah.
Khuapau dothlennak kum 3 chung ah SAC ralhrang nih a ralkap thazaang ningcang loin a hman i ralkap thar a khawmhsuat khawh tilo caah kumtling mizapi cu ralkap luh ter in ralphaw ah hman a duh hna caah a tubantuk in phung thar a chuah hi a si, tiah CNF nih a chim.
SAC ralhrang nih hramhram in ralkap luhternak in nan luat khawhnak ding caah le limhang a ngeimi mipi ralkap nan si khawhnak ding caah nan mah he nan i neihniamnak sakhan le bu sin i fonh in mipi ralkap kan ṭhawn ter hna lai tiah CDF- Kanpalet Kkei Sing sakhan in rianṭuantu pakhat nih a chim.
SAC ralhrang hna cu sungh lei an panh cang caah a tubantuk in ralkap thar an khawmh hi a si, cucaah Mara ram kilven ding in le federal democracy ramthar kan ser khawhnak ding caah Mara mino hna mipi ralkap tintaan kai ding in kan in sawm hna, tiah CDF-Mara nih cathanh an chuah.
SAC ralhrang nih Kanpalet peng, Kyindway khua cozah zung hna ah umhmun khuar i mipi ralkap hna he kahdohnak a um lengmang caah khuami hna cu a himnak hmun ah thlakhat tluk ral an hrial cang, tiah theih a si. Crd:Lungmili Post