Nihin Min Aung Hlaing Ralkap Le Mipi Hriamtlai Dirhmun!
===========
NUG nih 2023 kum cheu cawlcanghnak ah PDF le tlangcung hriamtlai komh in SAC kahdohnak ah SAC ralkap sakhaan 30, Police sakhaan 15, ramri hngak SAC ralkap leiṭang sakhaan 10, Pyusawhti sakhaan 14 cu mipi ralkap nih an lak khawh tiah thawngthanhnak a rak tuah.
“Lamkip in Naypitaw ah” ti mi raldoh operation pi cu NUG Defence Minister U Ye Mon nih thawngthanhnak a tuah hnu cun, Naypitaw pawngkam ah kahdohnak a um colh. Ralhrang Headquarter Naypitaw cu atu bantuk in mipi ralkap lei nih timh ciamman tein kahdohnak tuah an timh caah Region Command bu zong dirh a hun si. Battalion No. 801 in No. 806 tiang battalion bu 6, bah-ka-phah bu, Tandaung chaklei Special bu le ṭangrual phu hna nih an kah hna.
Naypitaw ni tlaklei Myotit, Natmouk, Taungdwingyi, Chaklei Tatkon, Yametin, nichuah lei Pyinmana, Pinlaung, thlanglei Yedashe lei in Mipi ralkap hna cu ralkap battalion bu hruaining phunglam tein command ṭha te he ral an doh. Cucaah Naypitaw peng ah bomb puahnak, kahdohnak, sakhaan laknak, Naypitaw Alar ralkap vanlawng tual kahdohnak hna an tuah khawh. Ralhrang lei nih an Headquarter he aa naihniamnak hmun ah ralkap thazang an hun chap thluahmah ve. Naypitaw peng hmanh ah humhimnak an la kho ti lo.
Myanmar ram tangka man a ngeih lo ning hi zapi theih a si. US $ 3,500 leng, Sui man ah sing 35 leng, Tuluk Yun tangka 560 leng, Rubi Rs 35 leng a phan. SAC nih kyat 2,0000 ca chuah aa timhnak cathanh a hun chuah hnu ah Myanmar ram tangka cu man ngei lo dirhmun a phanh hnu ah kyat 2,0000 tangka a chuah ngam ti lo.
Myanmar ram tangka man a tlak ruang ah Datsi man a kai i, umkalnak man a kai, Mipi eidin, sii man le inn le lo thilman a fak. Ralbawi cheukhat rual an ngeihchiah chawva thilri chiahnak hngal lo in an rum lio ah ramchung mipi tampi eidin awk ngei lo dirhmun phan in harsatnak an tong. Ramchung mino hna nikhat ah a thongthong in ramdang ah kuli ṭuan ding in an kal. Human Resource sungh zatlaknak a tam.
Khatlei ah raldohnak a fak chinchin. June, July, August, September fur caan umkalnak a har lio ah raltuk a zualhma. A bik in SAC Headquarter a umnak Naypitaw pawngkam ah kahdohnak a um pah lengmang mi nih Min Aung Hlaing ralkap lutlai ralbawi pawl a lau ter ngai cang hna.
Karenni ramkulh; June 13, 2023 kum Karenni peng Meseik peng chung ah Thai-Myanmar ramri BP 13 sakhaan, BP 14 sakhaan, BP 15 Metanwe sakhaan, BP 16 Taunghla sakhaan, Meseih Myoma Police sakhaan le Byuha kung cu Karenni mipi ralkap nih an lak khawh. Siataw peng Kyapoahsaklay point 2957 sakhan pahnih cu ralkap nih an chuahtak. Ramri veng ralkap (BGF) bantuk a um mi battalion 2 nih Karenni miphun ralkap ( Ka-la-lat-hah) phu dirh in SAC an doh.
Meseik peng la ṭhan ding in LIB 66 Byuha cu Phasaung, Sa-ka-khah 2 in Bawlakhe, Ywarthit in ralsial mi LIB 55 hna cu Karenni mipi ralkap phu nih an rak doh hna. SAC ralkap sin lak mi MM 120 hriam nih SAC harnak a pek ngai. SAC ralkap bawmhchan ding in a ra mi cu Demoso pawngkam in an rak kham khawh hna caah hmainor kho lo in an um.
Meseik sakhaan cu Karenni mipi ralkap nih an kham khawh lawng si lo in Karenni ramkulh vialte ah raldohnak cu an duh caan paoh an tuah khawh cang. 2023 June thla ah Loikaw peng ah ral voi 7, Siataw peng ah voi 2, Hpruso peng ah voi 4, Demoso peng ah kahdohnak voi 5 an tuah. July thla ah Loikaw, Demoso, Bawlakhe, Ywarthit, Phasaung, Pan Dein le Leiktu, Yardo khua ah raldohnak voi 33 a cang i SAC lei 84 an thi, 3 an tlaih tiah Karenni National Defense Force nih cathanh an chuah.
Karen ramkulh; Karen ramkulh chung ah a um mi KNU le PDF bu komh nih Pha Ann pengkomh telh lo in adang pengkomh ah raldohnak an um peng. July thla chung ah kahdohnak a fak ngai mi hi Myawaddy peng thlanglei Letkhettaung kahdohnak a si. July 2023 kum in KNU/KNLA LIB 6, Cobra phu 1, Black Leopard bu, Federal Wings phu komh nih Letkhettaung Tower tung sakhaan cu July 21 ah an lak.
Letkhettaung Tower tung sakhaan hi Myawaddy le Tinkannyinaung thlanglei kahdohnak ah a biapi ngai mi tlang pakhat a si. Cucaah SAC lei LIB 44 ralkap phu nih Letkhettaung cu Vanlawng, hriamngan in kahdohnak a tuah peng nain nihin ni tiang an la kho hlei lo.
Mon ramkulh; Nihin Mon ramkulh raldohnak zohtik ah KNU ralkap LIB 6, PDF phu foh le Mon dohthlennak bu, Ye Balu, tualchung mipi ralkap le SAC ralkap dohnak a um lengmang. Mah kahdohnak ah Ye le Mudon kar lampi cu KNU battalion 27 le PDF taungnyo ralkap phu tang ah a um.
Tanintharyi ram`hen; Taninthayi ramṭhen ah kahdohnak thawngpang a um tuk lo nain, Dawai, Maung Ma Kan, Long Lung, Tayetchaung, Taninthayi ah KNU, PDF ralkap le SAC ralkap karlak ah kahdohnak a um lengmang.
Bago ramthen; Tu lio Bago ramṭhen chung ah raldohnak hi phundang tein a um. Sittaung tiva hmailei um Shwe Cin, Kyaukkyi, Moung tlangthluan ah KNU le PDF phu pawl nih Sittaung tiva nitlak lei um Nyaunglaybin, Bein Za Loh, Kyauk Ta Ka peng chung luh in Yangon-Mandalay tlanglawng lam, motor lam hlun, motor lamthar ah kahdohnak an tuah kho lengmang.
Sagaing le Mandalay ram`hen; Sagaing ramkulh vialte le Mandalay ramṭhen Ayeyarwaddy nitlak ram vialte ah kahdohnak tuah in ral an tho. SAC lei nih khuate kip ah inn mei a khangh, mipi a bu in thahnawnnak an tuah khunnak ramṭhen a si. PDF an dihlak Battalion 190 phu an um bantuk in tualchung mipi ralkap umnak ramṭhen a si.
Mah ramṭhen pahnih chung ah hin kahdohnak a zualhma. PDF ralkap bu sakhaan pakhat ah SAC ralkap nih kahdohnak an tuah tik ah PDF ralkap 10 hrawng an nunnak a liam, hriamnam an sung lengmang nain dohthlennak ah an lung a zor hlei lo. An thazang a thawng peng. Khua tam deuh cu PDF hunhimnak tang ah an um.
Monywa Kalay lampi Yar Kyi lam, Gangaw lam in umkal khawh a si ti lo. PDF control nak tang ah an um. Kalay-Maharmaing lam lawng awnh a si nain PDF nawl lo in umkal khawh a si lo. Meng 80 lam a si mi Kalay-Tamu lampi ah kahdohnak a um pah lengmang.
Sagaing, Myitkyina lam a um mi Gate 80% cu PDF gate hna an si. Cun, Monywa chaklei Chindwin tiva kuang hrawn, Mandalay, Bamaw kar Ayeyarwaddy tiva kuang hrawng cu PDF kuttang deuh ah an um. SAC riahchaw chantu tilawng zong kahdohnak an tuah peng.
Hriamnam tling a ngei lo mi PDF cu SAC vanlawng nih a kah lengmang hna. Zahan nai Pale peng, Ceningkyi khua pawng August 7 kahnak ah Yinmarbin pengkomh PDF phu komh nih SAC ralkap 15 an thah khawh hna. SAC lei nih vanlawng in kah a bawmh lengmang.
Mandalay ramṭhen; Mandalay khuachung ah mipi ralkap cawlcanghnak a zor pah ko nain Mandalay pawngkam ah mipi ralkap cawlcangh a hun tam. Momeik, Mogok, Mattayar, Naungcho, peng ah PDF thazang a thawn bantuk in Myingyan, Nyaung Oo, Meikthila peng ah PDF cawlcanghnak a um. Naite August 4 Naungcho pawngkam SAC motor rung kahnak ah SAC ralkap 14 an thi, hliamtuar an tam, hriamnam meithal zuun 18 an lak khawh.
Yangon ramṭhen; Yangon khuachung ah cawlcanghnak a tlawm nain khuachung ah bom puahnak a um pah lengmang. SAC leitang khuabawi thahnawnnak zong a um pah ve. A caan ah mipi lei nih SAC duhlonak langhter in cawlcanghnak an tuah pah lengmang.
Ayeyarwaddy ramṭhen; Mipi ralkap cawlcanghnak a tlawm bik ramthen a si nain Pathein, Hintada ah PDF mipi ralkap bu dirh in cawlcanghnak tuah an timh ve cang tiah thawng theih a si.
Rakhine ramkulh; Tlangcung hriamtlai lak ah thazang thawng ve mi AA Rakhine ralkap bu a umnak ramkulh a si. SAC he kahdaihnak an tuah nain a herh ning in khuachung ah kahdohnak an tuah mi ram a si. Cun, AA bu le mipi PDF ralkap pehtlaihnak a tha ngaimi ramkulh a si.
Chin ramkulh; Chin ramkulh ah Hakha le Matupi peng umkalnak cu hlan ah nikhat lamkal a si nain nihin ahcun a thlathla in kalnak lam pi a si cang. Kalay-Hakha zong suimilam pa 7 kalnak lam a si nain raldoh caan ahcun SAC ralkap hi thla 3 hlei an rau. Cun, CNA Headquarter umnak Victoria base kah ding in a rak kai mi SAC ralkap cu Hakha in Thantlang lei an rak kai lengmang nain an timhning bantuk in an si kho lo.
Chin ramkulh ah hramhram in uknak a latu SAC ralkap pawl cu mah le hmunhma cio in hriamtlaih in dothlennak an tuah caan hi kum 2 leng a phan cang. Atu bantuk kum 2 leng caan chung ah Chin miphun dothlennak phu pawl nih hmunhma 90% leng cu an tlaih khawh cang. Khuapi dah ti lo cu a dang khuate kip cu mipi ralkap control nak tang ah a um cang. Khuapau Dmdohthlennak ah SAC tank motor pahnih a hrawk kho hmasatu mipi ralkap thazang a ṭhawnnak ramkulh a si.
Kachin ramkulh; Kachin ramkulh Laiza pawng Nant San Yang khua pawng ah SAC battalion phu 10 nih kahdohnak an tuah nain Laiza lei an kai kho hlei lo. KIA le PDF fonh in an kah hna. Laiza khua cu hriamngan in SAC lei nih an kah. Sihmahsehlaw mipi ralkap lei nih drone in an kah ve hna caah SAC ralkap hmainor ngam lo in an um. August 7 ah KIA nih Hpakan peng Kathaing taung sakhaan, Tamakhan sakhaan an lak. Kachin ramkulh chung ah kahdohnak ah Nant San Yang kahdohnak le Hpakan kahdohnak cu minthang mi kahdohnak a si.
Chaklei Shan ram; July thla, Shan chaklei Kutkai pawngkam ah KIA nih lamorh kahnak an tuah pah lengmang. A minthang mi kahdohnak cu Kutkai peng, Kho mun pawng Kaung Ya Pone sakhaan kahdohnak a si. SAC lei mi 24 an thi i, hriamnam tampi an lak. Cun, TNLA Ta’ang an si. July thla dongh August thla hramthawk ah Se lant, 105 mile TNLA he kahdohnak ah SAC 10 leng an thi, hriamnam tampi an lak.
Thlanglei Shan ram; SAC ralkap uknak a lak hnu in SAC he kahdonak a um lo mi ram a si. Sihmahsehlaw SSPP le Wa ram (UWSA) ralkap phu hna nih RCSS bu an pom chuah hna hnu in SAC lei nih SSPP bu cu hnu kir ding in March thla dih 2022 kum in nawl a chuah. SAC ralkap cu ramchung dihlak ah raldohnak minung thazang a ngei ti lo. UWSA bu nih Tanlwin tiva nitlak lei ah umhmun thar a lak mi cu zei a ti ngam ti lo. SSPP hmun an laknak sakhaan zong SAC nih an ṭhawl mi zong cu zei a tuah kho hlei lo.
Burma ram (U Nu-Ne Win) chan lio ramchung ralbuai/thawh lio ah ramri a um mi Burma Communist Party Headquarter Pangsai (Pangkham), Karen National Union Headquarters hlun Manerplaw, Kachin Independent Organization hlun Pajau tiang kawl cozah nih kah in hnahnawhnak an rak pek khawh. A tu khuapau dohthlennak ahcun Myanmar ram ah ral an tho bal lo mi Myanmar hmunlai bik (Central Myanmar) khua hna nih atu cu Naypitaw peng chung ahmipi ralkap le ṭangrual phu hna nih hnahnawhnak pek in umthiam lo in an kah cang hna. Credit: The Chinland Post